Si Flora ug Ako: Magkauban sa Buhat sa Ginoo
Samtang kita magkat-on sa mabuligon, mahigugmaong panag-uban nga nasinati ni Presidente Ezra Taft Benson uban sa iyang asawa, nga si Flora, kita makaangkon og mas lalum nga pagsabut sa iyang pagpangalagad.
Usahay, kon kita maminaw og maayo, ang mubo nga hugpong sa pulong mahimong ingon ka epektibo sama sa usa ka wali. Sama niini ang nahitabo niadtong Nobyembre 11, 1985. Ang hugpong sa pulong mao ang “Si Flora ug Ako.”
Si Presidente Ezra Taft Benson (1899–1994) nagbasa niadtong mga pulonga isip kabahin sa inandam nga pahayag para sa mga tigbalita sa adlaw human siya gi-set apart isip Presidente sa Ang Simbahan ni Jesukristo sa mga Santos sa Ulahing mga Adlaw. Si Presidente Spencer W. Kimball (1895–1985) namatay unom na ka adlaw ang milabay, nagbilin ni Presidente Benson isip senior nga Apostol.
Si Presidente Benson ug iyang asawa, si Flora, nag-uban sa dihang ilang nasayran ang pagtaliwan ni Presidente Kimball, ug sila diha-diha dayon “miluhod” aron mag-ampo.1 Karon, sa unang paragraph sa pamahayag nga imantala sa tibuok kalibutan, mipahimutang na usab si Presidente Benson sa iyang kaugalingon sa kiliran ni Flora. Miingon siya: “Kini mao ang adlaw nga wala nako damha. Ang akong asawa, si Flora, ug ako kanunay nga nag-ampo nga lugwayan pa ang kinabuhi ni Presidente Kimball dinhi sa yuta ug laing milagro ang mahitabo para kaniya. Karon nga ang Ginoo namulong, among buhaton ang among pinakamaayo, ubos sa iyang direksyon, sa pagpadayon sa buhat dinhi sa yuta.”2
Human sa 59 ka tuig nga kaminyoon, ang hugpong sa pulong nga “si Flora ug ako” nahimong natural na para kang Presidente Benson. Ug sa dihang siya miingon, “among buhaton among pinakamaayo, ubos sa iyang paggiya, sa pagpadayon sa buhat,” wala niya gamita ang pulong nga among sa pagpasabut sa iyang kaugalingon ug sa ubang mga General Authority, bisan tuod sigurado nga siya makighiusa kanila. Niini nga pamahayag, ang propeta, manalagna ug tigpadayag sa Simbahan namulong nga makighiusa uban sa iyang asawa sa buhat sa Ginoo.
Ug nganong dili man? Siya ug si Flora nagkahiusa diha sa buhat sa Ginoo sa hapit unom ka dekada. Samtang daghang aspeto sa ilang kinabuhi nausab sulod sa katuigan, ang ilang panag-uban nahimong kanunay nga tinubdan sa kalig-on alang nilang duha.
Karong tuiga ang latid sa tun-anan sa mga sister sa Relief Society ug sa mga tighupot sa Melchizedek Priesthood naglakip sa oportunidad nga makat-on gikan ni Presidente Ezra Taft Benson. Samtang kamo magtuon sa iyang mga pagtulun-an, kamo mahimong maganahan nga makat-on kabahin sa iyang kinaiya. Kini nga artikulo nagpakita og pipila ka daklit sa iyang kinabuhi ug pangalagad, sumala sa panglantaw sa iyang asawa, si Flora Amussen Benson. Tanan nga kapitulo ug pahina sa artikulo nagpasabut sa Mga Pagtulun-an sa mga Presidente sa Simbahan: Ezra Taft Benson.
“Gusto kong Maminyo og usa ka Mag-uuma”
Sa tinglarag sa 1920, ang 21 anyos nga si Ezra Taft Benson mibiyahe gikan sa umahan sa iyang pamilya sa Whitney, Idaho, USA, ngadto sa Logan, Utah, diin siya nagpa-enroll sa Utah Agricultural College (karon Utah State University). Usa ka adlaw sa dihang kauban niya ang iyang pipila ka higala sulod sa eskwelahan, usa ka batan-ong babaye nakadani sa iyang pagtagad. Sa kaulahian siya mihinumdom:
“Anaa mi sa duol sa dairy barn sa dihang usa ka batan-ong babaye—madanihon kaayo ug maanyag—nag-drayb sa iyang gamayng sakyanan padulong sa dairy barn aron magkuha og gatas. Samtang ang mga lalaki miwara-wara ngadto kaniya, motimbaya usab siya. Miingon ko, ‘Si kinsa siya?’ Sila miingon ‘Kana si Flora Amussen.’
“Giingnan nako sila, ‘Kabalo mo, aduna lang koy impresyon nga minyoan nako siya.’”
Ang mga higala ni Ezra nahimuot niining istoryaha. Sila miingon, “Sikat ra kaayo siya para sa usa ka bata nga nagtubo sa umahan.” Iyang tubag? “Kana mas nakadasig pa gani.”3
Ang mga higala ni Ezra nasayop sa ilang paghukom ni Flora Amussen. Sukad pa sa iyang pagkatin-edyer, espesyal para niya ang mga lalaki nga mag-ugmad og yuta. Usa ka adlaw sa dihang ang iyang inahan, si Barbara, misulti niya “nga dili niya makab-ot ang kinatas-ang himaya kon dili maminyo sa templo, si Flora mitubag, tingali wala tuyoa apan may kahulugan, ‘Nan gusto ko nga maminyo og lalaki nga kabus sa materyal nga paagi, apan adunahan sa espirituhanong paagi, aron dungan namong makuha among gusto.’ Mihunong siya og kadiyot dayon midugang, ‘Gusto kong maminyo og usa ka mag-uuma.’”4
Sila si Flora ug Ezra nagkaila-ila niadtong mga 1920, ug ang ilang panaghigalaay sa wala madugay mipaingon sa pagpangulitawo. Kang Ezra Taft Benson, si Flora nakakaplag og batan-ong lalaki kinsa adunahan sa espirituhanong paagi nga bililhon kaayo para kaniya. Ug sama sa iyang gidahuman, ang mga gamot sa espirituhanong kalig-on ni Ezra ingon nga naamumahan diha sa yuta sa umahan sa iyang pamilya.
Sa pagbasa kon sa unsang paagi ang kinabuhi sa uma mihulma sa kinaiya ni Ezra Taft Benson, tan-awa sa Mga Pagtulun-an sa mga Presidente sa Simbahan: Ezra Taft Benson, mga pahina 2–7.
Pagtinabangay aron Unahon ang Dios
Sa dihang si Flora ug Ezra nagsugod nga magkasuod sa usag usa, ilang nasayran nga magkalagyo sila sulod sa duha ka tuig. Si Ezra nakadawat og call nga moserbisyo sa British Mission. Siya ug si Flora naghinam-hinam kabahin niining oportunidad sa pagserbisyo, ug sila “nag-istoryahanay kabahin sa ilang relasyon. Gusto nila nga ipadayon ang ilang panaghigalaay, apan ila usab nga giila ang panginahanglan ni Ezra nga mahimong matinud-anon nga misyonaryo. ‘Sa wala pa ko molarga, si Flora ug ako nagsabut nga magsinulatay kausa sa usa ka bulan,’ miingon siya. ‘Nagsabut usab mi nga among isulat ang butang nga makapadasig, makapasalig, ug mga balita. Kini among gibuhat.’”5
Niini nga paagi sa pagtagad sa call sa misyon, ilang gipakita ang usa ka kamatuoran nga itudlo ni Ezra sa mga Santos sa daghang katuigan: “Kon atong unahon ang Dios, ang tanan nga mga butang mapahimutang sa tukma nilang dapit o mawala kini sa atong mga kinabuhi. Ang atong gugma sa Ginoo modumala sa mga pag-angkon alang sa atong pagbati, sa gipangayo sa atong panahon, sa mga kaayohan nga atong gitinguha, ug sa pagpahimutang sa atong mga prayoridad.”6
Samtang hapit na matapos ang misyon ni Ezra, siya ug si Flora naghinam-hinam nga magkakita sa usag usa. Apan “mas sobra pa ang gibuhat [ni Flora] kaysa magpaabut nga makauban si Ezra. Sa tinuoray naglantaw siya sa umaabut—sa kaugmaon ug potensyal ni Ezra. … Siya nalipay sa dakong tinguha ni Ezra nga mopuyo sa umahan sa pamilya sa Whitney, Idaho. Apan, mibati si Flora nga kinahanglang humanon una ni Ezra ang iyang pag-eskwela.”7 Sa paningkamot ni Flora nga tabangan si Ezra, miduyog siya ni Ezra nga unahon ang Dios. Wala kaabut og usa ka tuig human miuli si Ezra sa misyon, gisurprisa siya ni Flora pinaagi sa pagsulti nga siya mismo moserbisyo og misyon. Aron mas masayud sa iyang desisyon, tan-awa sa mga pahina 12–13.
Aron magbasa sa asoy sa pagserbisyo ni Ezra Taft Benson isip full-time nga misyonaryo, tan-awa sa mga pahina 10–11 ug 123–25 sa manwal. Aron magbasa mahitungod sa iyang pagserbisyo human sa Ikaduhang Gubat sa Kalibutan didto sa Europe panahon sa iyang pagka-apostol, tan-awa sa mga pahina 20–23, 65–67, 81–83, 316, ug 321.
Usa ka Dyamante nga Sagansangon Pa
Si Flora ug Ezra na-sealed sa Salt Lake Temple niadtong Septyembre 10, 1926. Bisan pa sa tiunay nga kabuotan ni Ezra ug sa iyang kalampusan sa pag-eskwela, “pipila ka tawo padayon nga nagduhaduha sa desisyon ni Flora. Wala sila kasabut ngano nga ang usa ka babaye nga daghan og kalampusan, datu, ug sikat makigminyo sa usa ka mag-uuma. Apan padayon siya sa pagsulti nga ‘gusto niyang makigminyo og usa ka mag-uuma.’ Si Ezra ‘praktikal, kamao ug lig-on,’ miingon siya. Ug, siya nakaobserbar nga, ‘Si Ezra mapinanggaon sa iyang ginikanan, ug ako nasayud nga kon siya motahud kanila, siya motahud nako.’ Giila ni Flora nga si Ezra ‘dyamante nga sagansangon pa,’ ug siya miingon, ‘Himoon nako ang tanan kutob sa akong mahimo aron pagtabang kaniya nga maila ug makita nga maayo, dili lang niining gamayng komunidad apan mailhan siya sa tibuok kalibutan.’”8
Uban niining panglantaw sa potensyal sa iyang bana, si Flora malipayong mokuyog bisan asa sila kinahanglan nga moadto aron sa pagsangkap sa ilang mga anak ug sa pagserbisyo sa Simbahan, sa ilang komunidad, ug sa ilang nasud. Usahay kini nagkinahanglan nga siya magkinabuhi nga mas simple kaysa iyang naandan, apan iyang gidawat ang hagit.
Sama pananglit, sa adlaw sa ilang kasal, “ang bugtong salo-salo … mao ang pamahaw para sa pamilya ug mga higala. Human sa pamahaw, ang bag-ong magtiayon mibiya dayon sakay sa ilang Model T Ford pick-up truck padulong sa Ames, Iowa,” diin si Ezra moeskwela og master’s degree sa agricultural economics. “Padulong didto, migahin sila og walo ka gabii sa usa ka busluton nga tolda. Sa ilang pag-abut sa Ames, miabang sila og apartment usa ka eskina gikan sa eskwelahan. Ang apartment gamay, ug dunay daghang ok-ok, apan si Ezra miingon ‘sa wala madugay kini ang pinakakomportable nga gamayng balay nga mahunahuna sa tawo.’”9
Samtang si Ezra nahimong mas “dyamante” ug dili na kaayo “sagansangon”, siya mas nalambigit sa pagserbisyo gawas sa panimalay. Kini nakahashas usab ni Flora. Kon anaa sa layo si Ezra usahay siya nanlimbasug sa kamingaw ug mawad-an sa kadasig. Apan ganahan kaayo siya isip asawa ug inahan, ug siya mipahayag og pasalamat sa kabuotan ug debosyon sa iyang bana ngadto sa pamilya. Aron makat-on og dugang kabahin sa sayong bahin sa kaminyoon ug pagkaginikanan ni Flora ug Ezra, tan-awa ang mga pahina 15–18.
Duha ka Tawag sa Telepono nga Makapausab sa Kinabuhi
Niadtong Hulyo 27, 1943, si Flora nakadawat og tawag sa telepono gikan sa iyang bana. Si Ezra anaa sa Siyudad sa Salt Lake, Utah, nangandam nga mouli gikan sa biyahe tungod sa negosyo uban sa ilang anak nga lalaki nga si Reed. Si Flora anaa sa ilang balay duol sa Washington, D.C., mga 2,000 ka milya (3,200 km) kalayo. Human sa walay tulog nga kagabhion nga puno sa pag-ampo ug mga luha, si Ezra mitawag niya gamit ang telepono aron sa pagpahibalo nga sa miaging adlaw siya gi-call sa pagserbisyo isip sakop sa Korum sa Napulog Duha ka mga Apostoles.
Ang balita wala makasurprisa ni Flora. Siya “adunay impresyon nga may dakong butang nga mahitabo atol sa pagbiyahe [sa iyang bana].”10 Siya mipahayag og pagsalig ni Ezra, ug ang iyang mga pulong nakapakalma ni Ezra. Sa kaulahian si Ezra mihinumdom: “Mibati ko og kasiguradoan sa pakig-istorya kaniya. Kanunay siyang mopakita og dagkong pagtuo ngari kanako kaysa ako mismo sa akong kaugalingon.”11
Bisan tuod si Flora adunay pagsalig sa iyang bana, siya nasayud nga dili matuman ni Ezra ang iyang calling nga mag-inusara—siya nagkinahanglan og suporta gikan sa iyang pamilya ug kalig-on gikan sa langit. Sa usa ka kinatibuk-ang komperensya, usa ka mensahe nga gihunghong ang nagpakita sa gugma ni Flora para sa iyang bana ug sa iyang pagsabut sa pagsalig ni Ezra sa Ginoo (tan-awa sa mga pahina 56–57).
Si Flora nakadawat og laing tawag diha sa telepono gikan sa iyang bana nga makapausab sa kinabuhi niadtong Nobyembre 24, 1952. Niining higayona ang iyang bana nagbisita sa Washington, D.C., ug si Flora anaa sa ilang balay sa Siyudad sa Salt Lake. Si Dwight D. Eisenhower, kinsa sa dili madugay magsugod sa iyang pagserbisyo isip presidente sa Estados Unidos, bag-ohay lang nga mihangyo ni Elder Benson nga moalagad isip iyang secretary sa agrikultura, usa ka taas og ranggo nga posisyon nga nagkinahanglan og dakong sakripisyo ug pagpahinungod. Gidawat ni Elder Benson ang posisyon, human gitambagan sa pagbuhat niini sa Presidente sa Simbahan, David O. McKay (1873–1970).
Sa dihang giingnan ni Elder Benson si Flora nga ang Napili nga Presidente nga si Eisenhower mitanyag kaniya og posisyon ug iya kining gidawat, siya mitubag, “Nasayud ko nga iya kadtong buhaton. Ug nasayud ko nga imong dawaton.” Siya miila nga kini mahimong lisud alang sa pamilya apan midugang, “Kini kabubut-on sa Dios.”12
Si Elder Benson nagserbisyo isip secretary sa agrikultura sulod sa walo ka tuig. Nianang panahona, ang pamilya milahutay og mga panahon nga magbulag, ug si Elder Benson kinahanglang makigbatok sa pagpanaway ug sobrang pagdayeg nga kanunay anaa sa pagserbisyo sa publiko. Ang mga Benson nakasinati og daghang oportunidad. Sama pananglit, kausa gikuyog ni Elder Benson si Flora ug ilang mga anak nga babaye sila si Beverly ug Bonnie para sa upat ka semana nga biyahe diin nagtrabaho siya sa pag-establisar og relasyon sa komersyo [trade] ngadto sa 12 ka lain-laing mga nasud (tan-awa sa mga pahina 215-17). Usa ka imbitasyon gikan sa usa ka tigbalita nahimong talagsaon nga misyonaryo nga kasinatian para sa pamilya (tan-awa sa pahina 28).
Si Elder Ezra Taft Benson nagserbisyo isip secretary sa agrikultura sa Estados Unidos sulod sa walo ka tuig samtang siya nagserbisyo usab isip usa ka Apostol. Aron magbasa kon sa unsang paagi niya natuman kining mga responsibilidad, tan-awa sa mga pahina 24–29 ug 55–57.
Managsama nga mga Instrumento diha sa mga Kamot sa Ginoo
Sama sa ubang mga Presidente sa Simbahan, si Ezra Taft Benson giorden nang daan sa iyang calling. Apan sa iya lang kaugalingong siya dili makatuman nianang giorden nang daan nga calling o makaserbisyo sa ingon kalig-on. Siguradong walay laing tawo nakaimpluwensya kaniya sama sa nabuhat ni Flora. Diha sa Simbahan ug sa ilang pamilya, sila nagtinabangay isip gamhanang mga instrumento sa kamot sa Ginoo.
Sama nga si Presidente ug Sister Benson dungan nga magluhod sa dihang ilang nasayran nga siya modumala sa Simbahan, sila nagtinabangay sa “pagpadayon sa buhat dinhi sa yuta.”13 Sama sa gihandom ni Flora sa dihang tinedyer pa, ilang nakab-ut ang ilang gusto—nga nag-uban.14
Gikan sa pulpito, si Presidente Benson miawhag sa mga Santos sa Ulahing mga Adlaw sa paglukop sa yuta ug sa ilang kinabuhi sa Basahon ni Mormon (tan-awa sa mga kapitulo 9–10). Sa panimalay, si Flora mobasa sa Basahon ni Mormon ngadto kaniya matag adlaw, ug dayon ilang hisgutan unsay ilang nabasa.15 Gikan sa pulpito, si Presidente Benson miawhag sa mga Santos nga kanunay moserbisyo ug mosimba diha sa templo (tan-awa sa kapitulo 13). Sa pridado, sila si Flora ug Ezra Benson mitambong sa templo matag Biyernes sa buntag sa dihang ila pa kining mahimo.16 Gikan sa pulpito, si Presidente Benson mipasidaan sa sala sa garbo ug sa “pasidungog sa kalibutan.”17 Bisan tuod si Flora milampus sa pagtabang “nga mailhan siya sa tibuok kalibutan,”18 silang duha, kontento sa hilom nga “pasidungog sa kalangitan.”19
Si Presidente Ezra Taft Benson nakapamulong og gatusan ka mga wali isip Apostol ug Presidente sa Simbahan. Lisud hunahunaon ang bisan asa niadtong mga wali nga walay impluwensya niadtong tulo ka pulong nga wali nga iyang gipamulong niadtong Nobyembre 11, 1985: “Si Flora ug Ako.”