Kining Kahibulongan nga Buhat
Kon kamo makadungog sa mga pulong nga anaa, unsay inyong mahunahunaan? Usa ka barko nga molawig? Pag-apil sa dako nga kawsa? Ang pagsugod sa usa ka panaw?
Kon kamo “anaa sa pag-alagad sa Dios,” kamo nag-apil sa labing talagsaon nga panaw sukad. Kamo nagtabang sa Dios sa pagpadali sa Iyang buhat, ug kini dako, makalipay, ug kahibulongang kasinatian.
Ayaw lang dayon tuohi ang among gisulti. Sa miaging tuig sa usa ka gamay nga lungsod sa Utah, ang batan-ong mga lalaki sa teachers quorum mibisita sa website sa mga kalihokan sa kabatan-onan (lds.org/youth/activities) sa pagpangita og mga ideya para sa usa ka kalihokan. Usa ka butang ang nakadani gyud sa ilang atensyon: “Pito ka Adlaw nga Pagserbisyo.”
Kining batan-ong mga lalaki mihukom sa pagbuhat og mas dakong butang: sila moserbisyo kada adlaw sa tibuok semana ngadto ni bisan kinsa nga miyembro sa ward nga mohangyo niini. Sa dihang 19 ka pamilya ang mihangyo nga magpaserbisyo, ang batan-ong mga lalaki nasurprisa ug tingali medyo nabug-atan. Unsaon nila pagbuhat kining dakong pagserbisyo sulod sa mubong panahon? Apan sila mipasalig, busa mihukom sila sa pagserbisyo sa tanang pamilya.
Sulod lang sa usa ka semana, sila nakakab-ut og sobra sa 250 ka oras sa hiniusang pagserbisyo, nagbuhat sa mga proyekto sama sa pagbalhin og dagkong mga bato, pagkalot og sandbox, paglimpyo sa mga kanal, ug pagpundok og mga kahoy. Ug kini nakapausab sa batan-ong mga lalaki.
Sila natingala sa kalig-on nga ilang nabati ug sa mga panalangin nga ilang nadawat. Sila mihulagway nga mibati nga nagkahiusa isip korum ug sa pagdawat og balaanong tabang aron sa pagbuhat sa mga homework ug uban pang mga responsibilidad. Karon, kon ang ilang ward nanginahanglan og serbisyo, ang teachers quorum abtik nga motubag. Wala lang sila magserbisyo og usa ka semana—sila naningkamot sa pagserbisyo kada adlaw.
Ang pagserbisyo ug pagtukod sa gingharian sa Dios sa tinuoray kahibulongan nga buhat. Kini nagdala og kalipay niining batan-ong mga lalaki, ug kini makahatag og kalipay kaninyo samtang inyong tabangan ang uban ug makita ilang kinabuhi nga nausab pinaagi sa putli ug matinuoron nga paningkamot. Sama sa gihatagan og gibug-aton sa kinatibuk-ang kapangulohan sa Young Women diha sa pahina 48, usa ka pribilehiyo ang pagserbisyo sa Dios.
Sugdi na karon ang pag-alagad sa Dios uban sa “tibuok ninyo nga kasingkasing, gahum, hunahuna ug kusog” (D&P 4:2). Gusto namong masayran ang inyong mga kasinatian sa pagserbisyo! Paghimo og mga video ug litratuhi ang inyong pagserbisyo, i-upload kini ngadto sa mga social media site, ipakigbahin kini sa inyong pamilya ug mga higala, ug i-email kini sa liahona@ldschurch.org. Mahimo usab nga inyo kining ipahibalo sa uban diha sa site sa mga kalihokan sa kabatan-onan. Palihug dapita ang uban nga moapil kaninyo niining kahibulongan nga buhat, ug tan-awon nato kon unsa kadako ang atong mausab sa kalibutan.