Ang Sekreto nga Hinagiban

“Ayaw si Ivy! Usa siya ka batang babaye,” mihunghong si Braden diha sa luyo ni Adam.

Apan si Adam mao ang team captain alang sa dodgeball nianang adlawa, ug siya mihimo sa iyang pagpili. “Akong pilion si Ivy,” iyang gisubli nga mas kusog-kusog. Si Tyler, ang laing team captain, nagtingsi. Bisan si Coach Garcia nahingangha sa ikaduhang napili ni Adam.

Nasurprisa usab si Ivy ug dayon maulawong miduol. Si Braden miagulo.

Si Ivy dili lang basta-basta nga babaye. Siya mao ang pinakagamay nga batang babaye diha sa klase. Ingon og dili siya paspas kaayo, ug ang bola daw mas dako pa niya. “Tingali dili gani siya makadaug sa bola,” miingon si Braden samtang naglakaw si Ivy.

“Tingali siya ang atong sekreto nga hinagiban,” miingon si Adam, naningkamot nga mora og sigurado. Apan dili kana mao nganong gikuha niya siya. Si Ivy kausa misulti kang Adam nga dili siya ganahan kon sila magdula og sport tungod kay siya kanunay maoy katapusan nga pilion. Ang ubang mga batang lalaki misungog ni Ivy, apan si Mama ug Papa misulti kang Adam nga ang batang mga lalaki kinahanglan nga magpakita og pagtamud sa batang mga babaye. Mao nga iyang gipili si Ivy. Samtang siya nagtan-aw ni Tyler nga mipili sa pinakadako nga batang lalaki sa klase, si Adam nanghinaut nga siya mihimo og husto nga desisyon.

Human ang tanan naa na sa team, si Coach Garcia mipito, ug nanagan ang mga team sa isig ka tumoy sa korte. Gitunol ni Coach Garcia ngadto ni Tyler ang bola, ug gianinaw ni Tyler ang team ni Adam sa wala pa siya motutok ni Ivy. Iyang gihuyad ang iyang bukton ug milabay sa bola.

Bam! Ang bola mipaka sa yuta ug miuntol nga walay naigo bisan usa. Si Adam mikipat. Si Ivy igo lang gyud nga nakalikay. Ang tanan nga naglibut kaniya ingon og nahingangha, apan mipahiyum lang si Adam. Tingali ang pagpili ni Ivy usa ka maayong ideya.

Ang dula nagpadayon. Naningkamot si Tyler sa pag-igo ni Ivy sa bola, apan pirme siyang makalihay ug makapalayo. Walay makaigo kaniya sa bola. Si Tyler ug pipila sa iyang mga kauban sa team busy kaayo sa pagpaningkamot nga ma-out si Ivy nga sila wala mogahin og daghang panahon sa pagpuntariya sa uban. Mingisi si Adam—ang gidak-on ni Ivy nakapahimo kaniya nga mas makalihay tungod sa kagamay ug kakusog nga maoy nakapalisud nga maigo siya.

Sa katapusan ang team ni Adam nakadaog sa dula. “Ang sekreto nga hinagiban husto,” miingon Braden. “Si Ivy maayo kaayo.”

“Oo,” miingon si Tyler. “Sa sunod nga higayon, siya anaa sa akong team. Sigurado tang makadaog!” Mipahiyom si Ivy samtang siya naglakaw balik ngadto sa klase, gilibutan sa mga kauban sa team.

Si Adam dili makahunong sa pagpahiyom samtang siya misunod sa grupo. Maayo siya ngadto ni Ivy, ug siya nakatabang sa ubang batang mga lalaki nga mas motahud sa batang mga babaye. Ang labing dako nga sekreto nga hinagiban dili gyud usa ka sekreto—ang pagkamabination lang.