Ang Sentro sa Akong Kinabuhi

Sa dihang nag-18 anyos na ko, ang akong amahan mitugot kanako nga mabunyagan sa bisan unsang simbahan nga akong gusto. Gusto ko nga mamiyembro sa Kristyanong simbahan tungod kay nakatuon nako sa Biblia diha sa daghang kongregasyon ug mituo kang Jesukristo.

Usa ka adlaw ang akong tiyo midapit sa duha ka mga sister nga mga misyonaryo sa among panimalay. Sila namulong nga may dakong konbiksyon sa ilang pagtuo diha sa Basahon ni Mormon isip lain nga tugon ni Jesukristo, nag-ingon nga Siya mibisita sa kontinente sa Amerika.

Niana nga punto, mipahayag ko sa akong opinyon nga tingali nasayop sila, sukad-sukad wala pa gyud ko makatuon niana. Usa sa mga sister nga misyonaryo, nanglugmaw ang mga luha sa iyang mga mata ug uban sa pagkamabination, miingon nako, “Brother Roberto, ang kamatuoran nga wala pa ka masayud nga ang Basahon ni Mormon tinuod wala magpasabut nga kami nasayop. Nasayud ko nga si Jesukristo nahigugma kanato ug Siya mianhi niini nga kontinente ug nga Iyang gitudlo ang Iyang ebanghelyo sama sa Iyang gibuhat didto sa Balaan nga Yuta.”

Sila naningkamot sa pagtabang nako sa akong daghang mga pangutana ug pagduhaduha nianang unang diskusyon, nagkasabut nga sila mobisita nako sa sunod semana.

Nianang gabhiona misugod ko sa pagbasa sa Basahon ni Mormon. Samtang akong gibasa ang ulohan nga pahina, usa ka hugpong sa mga pulong nakakuha sa akong atensyon: “Si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.” Gibasa usab nako ang 3 Nephi 11 kabahin sa pagbisita sa Manluluwas ngadto sa Amerika, ug mibati ko og kamaya diha sa akong kasingkasing. Busa gibuhat nako unsay gisulti sa mga misyonaryo: miluhod ko ug nangutana sa akong Langitnong Amahan kon ang basahon tinuod ba.

Sa pagtapos sa akong pag-ampo, mibati ko og kalinaw ug kasiguroan nga kini tinuod. Sa makadiyot naghunahuna ko nga ang mga luha sa mga sister nakatandog nako ug nakapahimo kanako sa pagtuo sa ilang pagpamatuod. Busa nagpadayon ko sa pagbasa sa Basahon ni Mormon hangtud lapas og gamay sa alas-4:00 sa buntag. Matag higayon nga mag-ampo ko, mibati ko og mas lig-ong kumpirmasyon nga si Kristo miadto sa Amerika ug nga gusto Niya nga ako mas makakat-on pa sa Iyang tinuod nga ebanghelyo.

Sa pipila lang ka semana, nahuman nako og basa ang Basahon ni Mormon ug mibati ko sa panginahanglan nga mabunyagan sa tinuod nga Simbahan.

Ang pagbasa sa Basahon ni Mormon nakatabang nako nga mas maduol ngadto kang Jesukristo ug sa paghimo Kaniya nga sentro sa akong kinabuhi. Mapasalamaton kaayo ko nga gibutang sa Manluluwas ang mga misyonaryo ug Iyang Simbahan diha sa akong dalan.