Propetikanhong Tambag ug mga Panalangin sa Templo
Ni Elder Koichi Aoyagi
Sa Seventy
Ako mopamatuod nga kon kita mag-ampo alang sa giya, mosunod sa buhing mga propeta, ug himoong prayoridad ang templo sa atong kinabuhi, ang Langitnong Amahan mogiya ug mopanalangin kanato.
Sa dihang batan-on pa ko, si Elder Spencer W. Kimball (1895–1985), kaniadto sakop pa sa Korum sa Napulog Duha ka mga Apostoles, mibisita sa Japan ug namulong sa usa ka komperensya nga akong gitambongan. Mahinumduman gihapon nako ang iyang tambag: “Ang mga batan-on kinahanglang mag-misyon, ug sila kinahanglang magminyo diha sa templo.”
Ako mibati nga gidasig sa Espiritu Santo ug mihukom nga magmisyon ko ug magminyo diha sa templo, bisan tuod ang Japan wala pay templo.
Nianang higayona, 19 anyos ko ug anaa sa ikaduhang tuig sa pagtungha sa kolehiyo. Ang akong mga ginikanan, kinsa dili mga Santos sa Ulahing mga Adlaw, kusganong midumili sa akong desisyon nga magmisyon. Kada adlaw nag-ampo ko nga sila motugot ug mosugot. Paglabay sa unom ka bulan ang Ginoo mitubag sa akong pag-ampo.
“Kita naglisud sa pinansyal, ug dili na kami makabayad sa imong pag-eskwela ug sa mga galastuhan sa pagpuyo,” giingnan ko sa akong ginikanan. “Sugod karon magkinaugalingon na ka. Dili ra sab mi manginlabut kon mag-misyon ka!”
Gitugutan nako sa akong ginikanan, mao nga mihunong ko sa pag-eskwela, miserbisyo og misyon sa pagpangtukod og edipisyo sa Simbahan, ug dayon misugod sa pagpangita og trabaho aron makatigom og kwarta para sa proselyting nga misyon. Uban sa tabang sa Ginoo, nakakita ko og tulo ka trabaho! Kada adlaw gawas sa Dominggo sa mosunod nga tuig, naghatud ko og mga newspaper gikan sa alas-3:00 sa kaadlawon hangtud alas-7:00 sa buntag, naglimpyo og mga building gikan sa alas-9:00 sa buntag hangtud sa alas-4:00 sa hapon, ug nagtrabaho isip tigluto gikan sa alas-5:00 sa hapon hangtud sa alas-7:30 sa gabii. Dayon mag-ilis ko ug magserbisyo isip district missionary magabii.
Sa dihang 22 anyos nako, gi-call ko sa pagserbisyo sa Northern Far East Mission. Pinaagi sa pagserbisyo og misyon akong nasinati ang labing dako nga kalipay nga akong gibati sukad, adunay daghang mga oportunidad nga mabati ang gugma sa Dios, ug nakadawat og daghang panalangin. Ang akong pamilya napanalanginan usab panahon sa akong pagserbisyo sa dihang nasulbad ang ilang mga problema sa pinansyal.
Pagsunod sa Propeta
Sa dihang nahuman nako ang akong misyon, ang Espiritu miaghat nako sa pagsunod sa ikaduhang tambag ni Presidente Kimball ug dili langanon ang pagminyo diha sa templo. Sa usa ka tuig sa wala pa kini mahitabo, ang mga miyembro sa Simbahan sa Japan nagplano nang daan nga mobiyahe ngadto sa Salt Lake Temple. Tungod kay sila mobiya na sa tulo ka bulan, nag-ampo ug nagpuasa ko aron magiyahan ngadto sa usa ka takus nga batan-ong babaye nga akong madala ngadto sa templo.
Wala lang madugay mitambong ko og kalihokan sa Simbahan sa akong lungsod nga natawhan sa Siyudad sa Matsumoto. Didto akong naila-ila si Shiroko Momose, kinsa mieskwela sa samang high school diin ko nagtungha sa dihang namiyembro ko sa Simbahan. Ang Espiritu mikumpirmar diha-diha dayon nga siya mao ang babaye nga giandam para kanako.
Mihalad ko og kaminyoon ni Shiroko wala madugay human mi nagsugod sa pagpakig-date. Nalipay ko sa dihang siya miuyon, apan iya ko nga gisurprisa sa sunod niyang gisulti.
“Nalipay kaayo ko sa pagkahibalo nga ang imong Ginoo akong Ginoo,” miingon siya. “Dihang gipahibalo nila ang pagbiyahe ngadto sa Salt Lake Temple, nangandoy ko nga moadto. Kadaghan ko nag-ampo nga ang Ginoo motabang nako sa pagpangita og tawo nga akong minyoan didto. Usa ka tuig ang milabay akong nasayran pinaagi sa Espiritu samtang nag-ampo ko nga kinahanglang magpaabut ko nimo ug ikaw mohalad og kaminyoon nako sa imong pag-uli gikan sa misyon.”
Kadto talagsaon kaayo nga espirituhanong kasinatian para namo, ug kini nakapalig-on sa among desisyon nga magminyo sa Salt Lake Temple. Gamay ra ang among kwarta aron makabiyahe, apan kini wala makapawala sa among kadasig. Nianang higayuna kami nasayud nga kon kami mosalig sa Ginoo ug mosunod sa Iyang mga sugo, Siya motabang kanamo sa pagtuman sa mga butang nga dili namo matuman.
Kami nangamuyo sa atong Langitnong Amahan diha sa pag-ampo ug nagkugi og maayo aron maabut ang gikinahanglan nga kwarta. Kadto nga mga paningkamot, inubanan sa pinansyal nga tabang gikan sa usa sa mga higala ni Shiroko, nakapahimo namo nga makauban sa Japanese nga mga Santos kinsa miadto sa Salt Lake Temple.
Lisud sa pagpahayag sa kalipay nga among gibati nga mabugkos didto isip usa ka mahangturong magtiayon. Dili gayud namo makalimtan kini nga kasinatian. Ang nakadugang sa among kalipay mao nga kami nakasiksik og lima ka henerasyon sa among mga katigulangan ug nag-andam sa ilang mga ngalan alang sa buhat sa templo. Samtang didto sa Siyudad sa Salt Lake kami nakahimo og puli nga mga ordinansa alang niadtong katigulangan. Ang pagbuhat niadtong mga ordinansa mitabang namo nga mobati nga suod nila. Kami nasayud nga sila napuno sa kalipay tungod sa among paningkamot.
Kami bag-ong magtiayon nga naglisud, apan gihimo namong prayoridad ang pag-adto sa templo, sa wala madugay mag-adtoan mi sa Laie Hawaii Temple kutob sa itugot sa pinansyal.
Napanalanginan pinaagi sa Templo
“Atong gikinahanglan ang templo labaw sa bisan unsa nga butang,” miingon si Propeta Joseph Smith.1
Diha sa plano sa Dios sa kaluwasan, ang templo mahinungdanon sa atong mahangturon nga kalipay tungod kay kita mopahigayon og sagradong mga seremonya ug mga ordinansa sa kaluwasan didto. Ang Bible Dictionary naghulagway nato nga ang templo mao ang labing balaan nga dapit sa pagsimba dinhi sa yuta ug usa ka “dapit diin ang Ginoo moabut.”2
Kon atong tumanon atong mga pakigsaad diha sa templo ug moadto “uban sa mapainubsanon nga kasingkasing, kalimpyo, ug dungog, ug kaligdong,”3 atong mabati ang Espiritu Santo ug makadawat og dugang kahayag ug kahibalo. Inigbiya nato sa templo, kita mobiya nga gisangkapan sa gahum gikan sa Ginoo ug sa Iyang pangalan ngari kanato, Iyang himaya palibut kanato, ug ang Iyang mga anghel sa pagbantay kanato (tan-awa sa D&P 109:13, 22).
Sa among pagbalik sa Japan human sa among kasal, ang mga saad sa Ginoo natuman samtang nangita ko og permanente nga trabaho.
Ang Ginoo Motuman sa Iyang mga Saad
Part-time lang ang akong trabaho sa dihang natawo ang among una nga anak. Nalipay mi, apan nasayud ko nga dili ko makasuporta sa among nagtubo nga pamilya kon dili full-time akong trabaho. Misugod mi sa pag-ampo nga matinguhaon para sa tabang sa langit.
Sa wala pa ko mag-misyon, gusto ko nga motrabaho sa foreign trade. Apan para makatrabaho sa usa ka trading company, ang aplikante kinahanglang gradwado sa unibersidad kinsa adunay mga sertipiko. Wala ko kahuman sa kolehiyo ug walay mga sertipiko, apan kon mag-ampo mi, mibati mi nga ang Ginoo mopanalangin namo ug nag-andam og trabaho para kanako.
Mihukom ko nga mokuha sa hiring exam sa pipila ka mga trading company bisan sa akong kakulang sa edukasyon. Ang unang duha mibalibad kanako, apan ako adunay lahi nga kasinatian sa dihang mi-apply ko sa ikatulong kompanya.
Ang Simbahan adunay pipila lang ka miyembro nga Japanese nianang panahona, ug daghang tawo batok pa sa Simbahan. Sa dihang tulo ka representante gikan sa ikatulo nga trading company miinterbyu nako, ilang gitan-aw ang akong résumé ug nasayran nga usa ko ka Santos sa Ulahing mga Adlaw. Misugod sila sa pagpangutana mahitungod sa Simbahan, nangita og detalyado nga mga tubag. Tungod kay bag-ohay lang miuli gikan sa akong misyon, ako walay problema sa paghisgot kabahin sa gipahiuli nga Simbahan ni Jesukristo.
Sa wala mominos og 40 ka minutos, namulong ko mahitungod sa ebanghelyo ug nagpamatuod sa kinabuhi ni Jesukristo, sa Apostasiya, sa Unang Panan-awon ni Joseph Smith, sa Basahon ni Mormon, sa Pagpahiuli sa tinuod nga Simbahan ni Jesukristo, ug sa mga pagtulun-an sa Simbahan.
Walay usa sa tig-interbyu mipahunong nako samtang namulong ko. Paglabay sa pipila ka adlaw ang kompanya mitanyag nako og trabaho nga dako kaayo ang sweldo. Wala madugay, sa dihang nangutana ko sa akong manager nganong ila ko nga gidawat, siya mitubag, “Atol sa interbyu mibati ko og kasiguroan nga ikaw manggihunahunaon, sinsero, ug maunungon, ug ikaw motrabaho niining paagiha sa among kompanya.”
Ako mopamatuod nga ang Ginoo motuman sa Iyang mga saad. Atol sa akong interbyu mibati ko sa gahum ug sa Espiritu sa Ginoo nga anaa kanako, sama gyud sa Iyang gisaad niadtong mosulod sa templo ug motuman sa ilang mga pakigsaad sa templo. Nabati usab nako ang Iyang Espiritu samtang nagtrabaho ko sa kompaniya, diin nakahimo ko og daghang bililhon nga kontribusyon.
Usa ka Templo ang Itukod sa Japan
Sa usa ka regional conference sa Tokyo niadtong 1975, si Presidente Kimball mipahibalo sa pagtukod sa Tokyo Japan Temple. Ang mga Santos nga Japanese, napuno sa emosyon, diha-diha dayon mihugyaw sa pagpakita sa ilang hingpit nga kalipay ug pasalamat.
Ang Tokyo Japan Temple nahuman niadtong 1980. Panahon sa open house ug sa mga seremonya sa pagpahinungod, ang mga Santos napanalanginan og talagsaong espirituhanong mga kasinatian ug dakong kalipay. Kadto nga mga kasinatian nagpadayon human sa pagpahinungod sa templo samtang ang mga Santos misugod sa pagdawat sa ilang mga ordinansa sa templo ug sa pagbarug isip puli alang sa ilang namatay nga mga katigulangan.
Karon, hapit 45 ka tuig human si Shiroko ug ako naminyo, ang akong desisyon sa pagsunod sa propetikanhong tambag nagpadayon sa pagpanalangin sa among kinabuhi ug sa kinabuhi sa among mga anak. Kami mitukod og maanindot nga balay sumala sa pamaagi sa Ginoo—pinasikad sa ebanghelyo ni Jesukristo, lakip sa mga pakigsaad sa templo.
Mopamatuod ko nga kon kita mag-ampo alang sa giya, mosunod sa buhing mga propeta, ug himoong prayoridad ang templo sa atong kinabuhi, ang Langitnong Amahan mogiya ug mopanalangin nato.