Indexing Challenge Nakahimo og Rekord

Ang mga partisipante sa International Indexing Challenge nakahimo og bag-ong rekord nga labing daghan og partisipante sa indexing online sa usa ka adlaw. Ang total nga 66,511 ka mga boluntaryo naggamit og Internet niadtong Hulyo 22, 2014, sa pagtan-aw og mga kopya sa mga rekord sa kasaysayan ug gisulat ang impormasyon aron i-apil diha sa masiksik nga database sa FamilySearch.org. Ang kaniadtong usa ka adlaw nga rekord sa 49,025 ka mga boluntaryo gitakda niadtong Hulyo 2012 atol sa kinakusgang tabang og indexing sa 1940 U.S. census.

Ang hagit nakahimo usab og ikaduhang labing taas nga gitipong (indexed o arbitrated) total sa gi-submit nga mga rekords, nga mikabat og labaw lang og diyutay sa 5.7 ka milyon. (Ang kada rekord gi-index sa duha ka mga boluntaryo ug dayon gi-ribyu sa ikatulo nga boluntaryo, nga giilhan nga arbitrator, aron sa pagsiguro sa kalidad ug ka eksakto.)

“Ang atong mga miyembro, batan-on ug tigulang, malipayong miapil,” miingon si Bishop Crouet sa Toulouse, France. “Unsa ka nindot nga kasinatian.”

Miingon si Christopher Jones sa Wales, “Among gihan-ay ang among family home evening aron kaming tanan maka-index—duha ka ginikanan ug pito ka anak nga nag-edad og 18 ngadto sa 5. Tanan nabuhat, isip usa ka pamilya kami naka-index og labaw og gamay sa 900 ka mga rekord!”

Si Natalie Terry sa Bangkok, Thailand, miingon nga gusto siyang moapil og tibuok kalibutan nga adlaw sa indexing uban sa iyang 13 anyos ang panuigon nga anak nga babaye. Ug si Chris Shead sa Chorley, England, miingon nga siya nakakaplag og mga 30 ka bag-ong mga apelyido, lakip sa “usa ka gamayng batang babaye kinsa namatay human dayon sa iyang bunyag ug wala maapil kaniadto sa mga rekord sa census.”