Tambag alang sa Lisud nga mga Pagpili

Si Presidente Henry B. Eyring, Unang Magtatambag sa Unang Kapangulohan, misulti kabahin sa usa ka panahon nga siya misunod sa propetikanhong tambag. Atol sa usa ka kinatibuk-ang komperensya, si Presidente Ezra Taft Benson (1899–1994) miawhag sa mga miyembro sa paglingkawas sa utang—ilabi na pagdata-data.

Si Presidente Eyring miingon: “Milingi ko sa akong asawa human sa miting ug nangutana, ‘Sa imong hunahuna aduna bay paagi nga mahimo nato kana?’ Sa sinugdanan dili namo mahimo.” Apan nianang pagkagabii naghunahuna siya sa usa ka kabtangan nga gisulayan nila pagbaligya sa daghan na nga mga katuigan apan wala gayud mahalin. “Kami misalig sa Dios ug … sa mensahe sa Iyang sulugoon, [mao] nga nanawag mi. … Akong nadungog ang tubag nga hangtud niining adlawa nakapalig-on sa akong pagsalig sa Dios ug sa Iyang mga sulugoon.” Nianang sama nga adlaw usa ka tawo mitanyag nga mopalit sa kabtangan sa mga Eyring sa kantidad nga sobra pa sa ilang gidata-datahan. Ang mga Eyring sa wala madugay wala nay utang (tan-awa sa “Salig sa Dios, Dayon Lakaw ug Buhata,” Liahona, Nob. 2010, 72–73).

Tingali kamo walay gidata-datahan, apan ang propetikanhong tambag makagiya kaninyo dinhi ug karon sa lisud nga mga desisyon kabahin sa trabaho, edukasyon, usa ka misyon, ug sa pagpakig-date. Hisguti uban sa inyong pamilya o mga higala kon sa unsang paagi kamo makasunod sa propeta kon kamo kinahanglang mohimo og mga desisyon.