Magtinambagay Kanunay: Mga Konseho sa Pamilya para sa mga Magtiayon
Ang tagsulat nagpuyo sa Utah, USA.
Ang mga magtiayon mag-atubang og daghang mga problema ug desisyon. Kining unom ka mga baruganan sa mga konseho sa pamilya makatabang.
Ang mga konseho sa Simbahan nagsunod og balaan nga mga sumbanan sa matag lebel, gikan sa Konseho sa Unang Kapangulohan ug Korum sa Napulog Duha ka mga Apostoles ngadto sa konseho sa stake, ward, branch, korum, ug uban pang mga konseho sa pagpangulo. “Ang pinakaunang konseho sa Simbahan,” miingon si Presidente Spencer W. Kimball (1895–1985), mao ang konseho sa pamilya.1
Si Elder M. Russell Ballard sa Korum sa Napulog Duha ka mga Apostoles mitudlo nga “ang mga konseho sa pamilya mao ang sulundon nga katiguman aron mahitabo ang epektibo nga komunikasyon.”2 Kini, mipasabut siya, usa ka panahon “sa paghisgut kabahin sa mga panginahanglan sa pamilya ug sa mga panginahanglan sa tagsa-tagsa ka sakop sa pamilya, … sa pagsulbad sa mga problema, paghimo og mga desisyon sa pamilya, [ug] pagplano sa matag adlaw ug taas og tagal nga panahon sa mga kalihokan ug tumong sa pamilya.”3
Kon kamo wala pa makahimo og konseho sa pamilya, kamo makasugod karon. Kon kamo adunay mga anak nga nagpuyo uban ninyo, mahimo ninyo silang iapil. Hinoon, importante usab nga ang bana ug asawa adunay lain nga konseho sa pamilya diin sila pribadong makahisgot sa mga problema sa pamilya ug sa personal.
Ania ang pipila ka mga baruganan ug praktikal nga mga sugyot nga mahimo ninyong magamit sa inyong konseho sa pamilya tali sa bana ug asawa.
Magsugod pinaagi sa Pag-ampo
“Kon madaut ang komunikasyon ngadto sa Langitnong Amahan, ang komunikasyon sa magtiayon madaut usab.”4
Ang Ginoo mahimong mahinungdanon nga partisipante sa inyong kaminyoon. Sa inyong pag-ampo, pasalamat sa Langitnong Amahan sa daghan ninyong mga panalangin, lakip ang inyong kapikas, ug hangyoa nga ang Iyang Espiritu modasig sa inyong pag-istoryahanay. Ang Iyang Espiritu makagiya sa inyong diskusyon ug makatabang sa pagpalambo og maayong mga pagbati ug maayong komunikasyon.
Mag-uyon sa Pagdesisyon
“Ang panag-uyon sa tanang mga sakop sa konseho kinahanglang makab-ut, pinaagi sa pag-ampo ug diskusyon, aron mahitabo kanang panaghiusa nga kinahanglangon para sa tabang sa Ginoo.”5
Kamo ug ang inyong kapikas kinahanglang mohimo og importanting mga desisyon, sama sa pagdawat o pagbalibad og tanyag sa trabaho, asa paeskwelahon ang mga bata, kanus-a magbaton og anak, o unsaon pagbahin-bahin sa buluhaton sa balay. Ang mga bana ug asawa mahimong mosugyot og posible nga mga solusyon sa mga problema ug hisgutan kini. Mapainubsanong maminaw sa ideya sa inyong kapikas. Kini makatabang ninyo nga makakat-on og laing panglantaw ug makapahinumdom sa inyong kapikas nga inyong gihatagan og bili ang iyang opinyon.
Sa konseho sa pamilya, kinahanglang makab-ut ang atong importanting desisyon “pinaagi sa balaanong panag-uyon sa tanan, dili sa pagkompromiso.”6 Mahimong dili ninyo makab-ut kining panaghiusa sa tanang problema diha-diha dayon. Mahimong molanat pa og pipila pa ka konseho ug sinserong pag-ampo—sa indibidwal ug uban sa inyong kapikas—aron mauyunan ang desisyon. Apan “kon inyo kining hisgutan diha sa konseho sama sa gilauman nga inyong buhaton, ang Dios mohatag kaninyo og mga solusyon sa problema nga inyong giatubang.”7
Makatabang usab nga mohukom nang daan sa hilisgutan para sa konseho sa pamilya. Kini makahatag ninyo og panahon sa pagpamalandong sa hilisgutan aron kamo ug ang inyong kapikas mobati nga mas andam sa pagsulti sa inyong mga gihunahuna.
Magtimbang-timbang sa Inyong Kaugalingon
“Nganong tan-awon mo man ang puling nga anaa sa mata sa imong igsoon, ug wala hinoon nimo tagda ang troso nga anaa sa kaugalingon mong mata?” (Mateo 7:3).
Kamo adunay gahum sa pag-usab sa usa ka tawo lamang: inyong kaugalingon. Mahimong matintal kamo sa paggamit sa konseho sa pamilya nga mopresentar og lista sa pagsaway sa inyong kapikas. Hinoon, tagda kini nga konseho uban sa tinguha sa pagpalambo sa inyong kaugalingon. Pangutan-a ang inyong kapikas kon nakamatikod ba siya nga dunay problema o makaguol diha sa imong mga pulong o kinaiya. Paghimo og mga tumong para sa personal nga pagpalambo ug pangayo og suporta sa inyong kapikas samtang maningkamot mo nga mausab. Suportahi ang inyong kapikas sa bisan unsang personal nga mga tumong nga gusto niyang himoon.
Maghisgut kabahin sa Lisud nga mga Butang
“Ang kada pamilya adunay mga problema ug mga hagit. Apan ang malampusong pamilya magtinabangay sa paghimog solusyon imbis nga manaway ug mag-away.”8
Ang lig-on nga kaminyoon mapalambo pinaagi sa pagbuntog sa mga hagit, dili sa pagbaliwala o paglikay niini. May mga panahon diin motumaw ang seryusong mga problema nga kinahanglang hisgutan. Kamo mahimong nanlimbasug sa pagbuntog sa mga isyu sa sala ug paghinulsol o mga kalisud sa pinansyal, sama pananglit, apan ang dayag ug matinuoron nga komunikasyon diha sa konseho sa pamilya makapahumok sa bug-at nga mga pagbati. Ang konseho sa pamilya mahimong angay ug komportable nga panagtigum aron hisgutan ang problema o sa pagpangayo og tabang.
Itumong ang inyong mga kusog sa posible nga mga solusyon sa problema ug likayi ang panaglalis o pagsaway. Pagmapainubsanon. Higugmaa ang inyong kapikas ug pahinumdumi ang matag usa nga kamo nagtinabangay sa pagpalambo og malipayon, mahangturong kaminyoon ug pamilya.
Magmapositibo sa Kanunay
Kon kamo magpatawag lang og konseho sa pamilya “panahon sa kalisud … ug dili moila … sa mga nakab-ut o sa pagpasalamat [sa inyong sakop sa pamilya] ug sa pagpakita sa inyong gugma ngadto kanila, nan mawad-an sila og gana nga moapil sa konseho sa pamilya.”9
Dili tanang mga miting sa konseho sa pamilya magtutok sa mga problema o mga desisyon. Kini mahimong oportunidad sa pagpakigbahin og usa ka butang nga positibo kabahin sa inyong kapikas o sa pagpakigbahin sa mga panalangin sa inyong kinabuhi. Kamo makasaulog sa indibidwal nga mga kalampusan, makahisgot og mga pamaagi nga malig-on ang inyong kaminyoon ug pamilya sa espirituhanong paagi, dungan nga maghimo og mga tumong, o pagpahayag og pasalamat sa kalig-on o buhat sa pagserbisyo sa inyong kapikas. Gamita ang konseho sa pamilya sa “pag-establisar og mga pamatasan sa komunikasyon ug pagtahud sa usag usa diin … [kamo ug ang inyong kapikas] makasalig kon motumaw ang dako ug lisud nga mga problema.”10
Molahutay
“Buhaton nato ang atong pinakamaayo ug maningkamot nga molambo matag adlaw. Kon motumaw ang atong mga kahuyang, maningkamot ta kanunay sa pagkorihir niini. Kita mahimong mas mapasayloon sa atong mga kahuyang ug niadtong atong mga gimahal.”11
Sa katapusan, hinumdumi nga ang pagpuli sa bati nga mga pamatasan sa komunikasyon ngadto sa positibong mga pamatasan nagkinahanglan og panahon ug pagbansay. Ang inyong una nga konseho sa pamilya daw kiwaw o makahadlok, apan samtang kamo mapainubsanong maningkamot sa pagpakig-istorya sa usag usa ug ilakip ang Ginoo sa inyong mga desisyon, mas inyong masabtan ang mga panalangin sa konseho sa pamilya.
Ang Ginoo nagtinguha nga maanaa ang kalinaw sa atong panimalay ug sa atong komunikasyon. Siya motabang kanato kon asa kita mapakyas ug mopanalangin sa atong mga paningkamot. Uban sa Iyang panabang, kita makapalambo og “palibut nga may pagtahud, pagsabut, ug panag-uyon”12 nga makapahimo sa atong panimalay, sama sa gisaad ni Presidente Thomas S. Monson, “daklit sa langit dinhi sa yuta.”13