Sunda ang mga Propeta

Nagserbisyo ko sa United States Navy sa hapit na mahuman ang Ikaduhang Gubat sa Kalibutan. Usa ko ka seaman, ang kinaubsang ranggo sa navy. Dayon nahimo kong kwalipikado sa pagka-Seaman First Class, human niini nahimo ko nga kwalipikado sa pagka-Yeoman Third Class.

Natapos ang Ikaduhang Gubat sa Kalibutan, ug sa wala madugay gipaundang ko. Apan midesisyon ko nga kon mobalik ko sa militar, gusto ko nga moserbisyo isip usa ka opisyal sa militar. Naghunahuna ko, “Dili nako manlimpyo sa hugaw nga mga kusina, ug manlampaso sa mga salug, kon malikayan ni nako.”

Human ko gipaundang, miapil ko sa United States Naval Reserve. Miapil ko sa mga pagbansay kada Lunes sa gabii. Nagtuon ko pag-ayo nga unta makwalipikar ko sa akademik nga paagi. Ako mikuha sa tanang mahunahuna nga eksamin: mental, pisikal ug emosyonal. Sa katapusan, dihay miabut nga nindot nga balita: “Ikaw nakadawat sa komisyon isip ensign sa United States Naval Reserve.”

Malipayon ko kining gipakita sa akong asawa, si Frances, ug miingon, “Nadawat ko! Nadawat ko!” Iya kong gigakos ug miingon, “Naningkamot ka pag-ayo aron madawat.”

Dayon adunay usa ka butang nga nahitabo. Gi-call ko isip magtatambag diha sa bishopric. Ang miting sa konseho sa bishop pareho nga gabii sa akong pagbansay sa navy. Nasayud ko nga may dakong problema. Nasayud ko nga wala koy igong panahon sa pagpadayon sa Naval Reserve ug sa akong mga buluhaton sa bishopric. Unsay angay nakong buhaton? Kinahanglang modesisyon ko.

Nag-ampo ko kabahin niini. Dayon miduol ko sa akong presidente sa stake sa dihang bata pa ko, si Elder Harold B. Lee (1899–1973), nga kaniadto sakop pa sa Korum sa Napulog Duha ka Mga Apostoles. Milingkod ko atbang niya. Giingnan nako siya kon unsa kaimportante para nako ang komisyon. Gani, akong gipakita niya ang kopya sa sulat sa pagtudlo [appointment] nga akong nadawat.

Imahe

illustration of Thomas Monson with President Harold B. Lee

Paghulagway pinaagi ni Paul Mann

Human sa kadiyot nga pagpamalandong niining butanga, siya miingon nako, “Ania ang angay nimong buhaton, Brother Monson. Sulati ang Bureau of Naval Affairs ug ingna sila nga tungod sa imong calling isip sakop sa bishopric, dili nimo dawaton ang komisyon sa United States Naval Reserve.”

Nasubo ko pag-ayo. Siya midugang, “Dayon sulati ang komandante sa Twelfth Naval District sa San Francisco ug sultihi siya nga ganahan kang moundang sa serbisyo.”

Miingon ko, “Elder Lee, wala nimo masabti ang militar. Siyempre dili sila mosugot nga ihatag nako ang komisyon kon dili ko kini dawaton, apan dili gihapon ko buhian sa Twelfth Naval District. Tungod sa naglambo nga gubat sa Korea, ang usa ka noncomissioned officer siguradong tawagon. Kon tawagon ko og balik, ganahan ko nga mobalik isip usa ka commissioned officer, apan dili ni mahitabo kon dili ni nako dawaton nga komisyon. Sigurado ka ba nga mao ni nga tambag ang angay para nako?”

Gibutang ni Elder Lee ang iyang kamot sa akong abaga ug sa inamahan nga paagi miingon, “Brother Monson, pagbaton og mas lig-ong pagtuo. Ang militar dili angay para nimo.”

Miuli ko. Akong gisulod ang nalamaan og luha nga komisyon balik sa envelope apil ang sulat niini ug sulat nga dili kini dawaton. Dayon misulat ko ngadto sa Twelfth Naval District ug mihangyo nga moundang na sa Naval Reserve.

Ang akong pag-undang sa Naval Reserve naapil sa katapusang grupo nga giproseso sa wala pa magsugod ang Gubat sa Korea. Ang akong kagrupo sa militar gipaserbisyo og balik. Unom ka semana human ko gi-call nga mahimong magtatambag sa bishopric, gi-call ko nga mahimong bishop sa akong ward.

Wala unta ko niining posisyona sa Simbahan karon kon wala pa nako sunda ang tambag sa propeta, kon wala ko mag-ampo kabahin niining desisyon, kon wala pa ko makasabut sa usa ka importante nga kamatuoran: ang kaalam sa Dios sa kasagaran makita nga binuang sa katawhan.¹ Apan ang pinakamakahuluganong leksyon nga atong makat-unan sa mortalidad mao nga kon ang Dios mamulong ug mosunod ang Iyang mga anak, sila kanunay anaa sa husto.

Ginaingon nga ang kasaysayan mag-agad sa gagmayng mga butang, ug mao usab ang atong kinabuhii. Mga desisyon motino sa destinasyon. Apan dili kita pinasagdan sa atong mga desisyon.

Kon gusto ninyo nga makita ang kahayag sa langit, kon gusto ninyo nga mabati ang inspirasyon sa Makagagahum nga Dios, kon gusto ninyo nga mabati kana nga pagbati sa inyong dughan nga ang inyong Langitnong Amahan naggiya ninyo, nan sunda ang mga propeta sa Dios. Kon kamo mosunod sa mga propeta, anaa mo sa luwas nga teritoryo.