Ang Serbisyo Nga Gihatag Agi Og Balus

Imahe

illustration for lds voices

Mga paghulagway pinaagi ni Bradley Clark

Sa dihang ako usa pa ka freshman sa kolehiyo, mokuyog ko sa akong kauban sa kwarto sa pagbisita sa iyang 98 anyos nga apohan sa apohan sa tuhod nga tiyo nga mabinationg gitawag nga Tiyo Joe. Nag-inusara siyang nagpuyo ug nagmingaw, mao nga naningkamot kaming mobisita niya kutob sa mahimo. Atol sa among mga pagbisita siya moistorya namo mahitungod sa dihang siya nagpuyo pa didto sa Mexico ug sa mga utlanang mga lungsod sa Arizona, lakip ang Nogales.

Sa dihang ang akong kauban sa kwarto temporaryong mipauli, nadasig ko sa pagpadayon sa pagbisita ni Tiyo Joe. Siya nahimong usa ka suod nga higala, ug ako mibisita kaniya hangtud siya namatay paglabay sa usa ug tunga ka tuig. Naguol ko nga mawad-an sa akong higala apan mapasalamaton sa bililhon nga panahon nga among gigahin sa usag usa.

Napulo ka tuig human mamatay si Tiyo Joe, nagbasa ko sa journal sa akong apohan sa tuhod. Ang journal naghisgot sa iyang bana nga mibiya niya nga walay kwarta, $30 nga bayranan sa abangan, ug siyam ka mga ba-ba nga pakan-on.

Dayon misulat siya: “Sa Bisbee [Arizona] ang mga tawo maayo kaayo kanamo. Bisan kon kami nagpuyo sa gawas sa lungsod sa habagatan sa Bisbee, gihatud mi nila pauli [gikan sa simbahan]. Si Brother Joseph Kleinman, kinsa nagpuyo sa Mexico, mihatud namo sa makadaghan, ug dili lang kana, apan ang [iyang pamilya] midala namong tanan nga manihapon uban nila. Gipakaon mi nila og adobong rabbit uban sa lain-laing matang sa pagkaon, diin kami nalamian pag-ayo. Mibalhin sila ngadto sa Nogales … ug ilang gihatag namo ang ilang mga rabbit, nindot nga puti nga mga rabbit, ug daghan gayud kami og makaon niadto.”

Samtang nagbasa ako niini, nakaamgo ko nga si Joseph Kleinman kinsa mitabang sa akong apohan sa tuhod mao si Tiyo Joe! Akong gibati ang hunghong sa Espiritu nga nadasig ko sa pagpadayon sa pagbisita ni Tiyo Joe isip usa ka gamay nga pasalamat sa pagkamabination nga iyang gipakita sa akong apohan sa tuhod ug sa iyang pamilya.

Naghinamhinam ako nga nahimong kabahin sa usa ka istorya sa gugma ug serbisyo nga gihatag agi og balos. Nasayud ako nga ang Ginoo nasayud sa Iyang mga anak. Kon kita mosunod sa mga aghat sa Espiritu Santo, kita makapanalangin sa kinabuhi sa uban ug agi og balos mapanalanginan ang atong mga kaugalingon.