Nganong si Jesukristo Importante sa Akong Kinabuhi?

Usa sa mga rason nganong si Jesus importante kaayo niadtong matinud-anong nagsunod Kaniya kay kitang tanan nagkulang ug nagkinahanglan sa gasa sa paghinulsol nga gitanyag pinaagi sa Pag-ula.

Kon kita masayop ug makasala, gusto ni Satanas nga kita maghunahuna nga kita dili takus nga mobarug ug mobalik sa saktong dalan. Gusto usab niya nga kita makalimot nga ang ebanghelyo mao ang “ebanghelyo sa paghinulsol” (D&P 13:1; emphasis gidugang). Apan kita nasayud nga “ang grasya ni Kristo tinuod, mohatag og kapasayloan ug kalimpyo ngadto sa naghinulsol nga makasasala.”²

Ang gahum sa Pag-ula ni Jesukristo anaa para kanatong tanan, apan kita kinahanglang mopili nga moepekto kini sa atong kinabuhi. Hunahunaa nga mohatag kamo og espesyal nga regalo ngadto sa usa ka higala—usa ka butang nga gikinahanglan gyud sa inyong higala ug butang nga inyong giandam pinaagi sa personal nga sakripisyo. Dayon hunahunaa ang tubag sa inyong higala, “Salamat, apan wala nako kinahanglana ang imong regalo.” Unsay imong bation?

Kon dili nato dapiton si Jesus sa pagtabang nato nga malimpyo pinaagi sa paghinulsol, sama ra nga wala nato dawata ang Iyang gasa.

Kausa, human nga ang daghang tawo dili na molakaw uban Kaniya, si Jesus nangutana sa Napulog Duha ka mga Apostoles, “Buot ba usab kamong mobiya kanako?” Si Pedro mitubag, “Ginoo, kang kinsa man kami moadto? ikaw mao ang may mga pulong mahitungod sa kinabuhing dayon” (Juan 6:67–68).

Inyong makaplagan ang “mga pulong sa kinabuhing dayon” sa Manluluwas diha sa kasulatan, mga pagtulun-an sa buhing mga propeta, ug sa mga paghunghong sa Espiritu Santo. Kini nagtanyag og pundasyon sa “kalipay dinhi niini nga kinabuhi ug sa kinabuhing dayon sa kalibutan nga moabut,”³ ug kini mogiya kanato balik ngadto sa atong Langitnong Amahan ug sa atong Manluluwas.

Unsa ang pipila sa talagsaong mga kamatuoran nga gitudlo sa Manluluwas? Si Presidente Dieter F. Uchtdorf, Ikaduhang Magtatambag sa Unang Kapangulohan, milista og upat niini sa bag-ohay lang nga kinatibuk-ang komperensya:

• “Ang atong Amahan mihatag sa Iyang mga anak sa mahinungdanong plano sa kalipay.”

• “Pinaagi sa Pag-ula … , kita makapuyo sa kahangturan uban sa atong mga minahal.”

• “Kita makabaton og mahimayaon, hingpit, ug imortal nga mga lawas, dili masakit o walay kakulangan.”

• “Ang atong mga luha sa kaguol ug kapakyasan mapulihan og dakong kalipay ug kamaya.”⁴

Kon kita moatubang og lisud nga mga hagit, usahay kita maglisud sa pagsalig sa Ginoo. Apan ang pagsalig diha Kaniya makahatag kanato og paglaum nga atong gikinahanglan sa pag-atubang sa atong mga hagit.

Mao kana ang nahitabo sa mga sakop sa pamilyang Gatrell, kinsa nagpuyo sa ward ni Sister Jean A. Stevens. Si Sister Stevens, unang magtatambag sa kinatibuk-ang kapangulohan sa Primary, miingon nga ang pamilya misalig gyud sa ebanghelyo ug sa ilang mga pakigsaad sa templo human si Brother Gatrell nahiling nga may kanser. Ang pagbuhat niini mihatag kanila og paglaum sa mga saad sa Dios nga sila mag-uban pag-usab human niining kinabuhia.

Panahon sa lisud nga mga adlaw sa wala pa mitaliwan iyang bana, si Sister Gatrell miingon, “nasayud ko nga ang Ginoo nagbantay kanamo. Kon mosalig ka sa Ginoo, sa tinud-anay mabuntog nimo ang mga hagit sa kinabuhi.”⁵

Ang gasa sa Pag-ula naghatag kanato og paglaum sa kinabuhing dayon—usa ka butang nga atong gikinahanglan kon kita mag-antus sa mga pagsulay o sa kamatayon sa usa ka minahal.

“Ang atong mahigugmaong Langitnong Amahan mihatag kanato og gasa sa Iyang Hinigugmang Anak, si Jesukristo, isip atong Manluluwas,” miingon si Presidente Henry B. Eyring, Unang Magtatambag sa Unang Kapangulohan. “Kanang mahinungdanong gasa ug panalangin sa Pag-ula ni Jesukristo nagdala og kinatibuk-ang kabilin: sa saad nga Pagkabanhaw ug posibilidad sa kinabuhing dayon sa tanang matawo.”⁶

Imahe

Kon kamo nakasinati og natural nga kalamidad, nahimong hilisgutan sa pintas nga pagpanlibak, nakasinati og hagit nga makapausab sa kinabuhi, nakalalis og usa ka higala, o gibarugan ang unsay husto, kamo nasayud nga gikinahanglan ninyo ang kalinaw sa Ginoo. “Ang kalinaw sa Manluluwas,” miingon si Elder Neil L. Andersen sa Korum sa Napulog Duha ka mga Apostoles, “mobuntog sa nagliyok-liyok nga mga alimpulos sa kalibutan.”⁷

Sa miagi lang nga kinatibuk-ang komperensya, si Elder Andersen mipakigbahin og istorya kabahin sa usa ka Laurel kinsa gibiay-biay ug ginganlan og bati tungod kay siya mibarug alang sa tradisyonal nga kaminyoon. Ang biay-biay, iyang nakat-unan, usahay mao ang bili nga mahimong “matinuoron sa Dios ug sa mga pagtulun-an sa Iyang buhi nga mga propeta.”⁸

Apan ang pagbarug wala magpasabut nga magbarug nga mag-inusara. Kita kanunay makadangup sa Prinsipe sa Kalinaw kon kita mobati nga nag-inusara o nabug-atan, naguol o nabalaka, nahadlok o walay pulos. Ato kining mahimo pinaagi sa:

• Pag-ampo sa Langitnong Amahan aron ang Espiritu magauban kanato.

• Pagbasa sa mga pulong sa Ginoo diha sa kasulatan ug ingon nga gipadayag pinaagi sa buhing mga propeta.

• Pag-adto sa templo.

• Pagtuon sa kinabuhi sa Manluluwas diha sa simbahan ug sa seminary.

• Paggamit sa Iyang Pag-ula pinaagi sa paghinulsol sa atong mga sala.

• Pagpakigbahin sa atong mga pagpamatuod kabahin Kaniya.

Kon kita mobati og kalinaw sa Manluluwas, ang atong kasingkasing dili kinahanglan nga mabalaka o mahadlok (tan-awa sa Juan 14:26–27).

“Ang Magtutudlo lang ang nasayud sa kagrabehon sa atong pagsulay, kasakit, ug pag-antus,” miingon si Presidente Thomas S. Monson. “Siya lang ang naghatag kanato og mahangturong kalinaw panahon sa kalisdanan. Siya lang ang makatandog sa atong gisakit nga mga kalag uban sa Iyang makapahupay nga mga pulong.”⁹

Imahe

Sa tibuok Niya nga pangalagad, wala lang gitudlo ni Jesus ang dalan padulong sa kalipay—Siya naggiya diha sa agianan. Pinaagi sa Iyang Pag-ula, Siya naggiya kanato ngadto sa paghigugma. Pinaagi sa Iyang mga pagtulun-an, Siya naggiya kanato ngadto sa mahangturong mga kamatuoran. Pinaagi sa Iyang hingpit nga kinabuhi, Siya naggiya kanato ngadto sa dalan sa pagkamasulundon.

“Ang labing maayong panig-ingnan kinsa nabuhi dinhi sa kalibutan mao ang atong Manluluwas, si Jesukristo. Ang Iyang mortal nga pangalagad napuno sa pagtulun-an, pagserbisyo, ug paghigugma sa uban,” miingon si Elder Richard G. Scott sa Korum sa Napulog Duha ka mga Apostoles. Ang Manluluwas, midugang siya, “nagdapit kanato sa pagsunod sa Iyang hingpit nga panig-ingnan.”¹⁰

Kon kita nakasabut nga ang Manluluwas nakapahimo sa paghinulsol nga posible ug pagkabanhaw, nagtudlo sa mahinungdanong mga kamatuoran, nagtanyag og paglaum ug kalinaw, ug nagpakita sa hingpit nga ehemplo, Siya nahimong sentro sa atong kinabuhi. Ug uban Kaniya isip atong higala, kita makabaton og kaisug sa pagsalikway sa kahadlok ug mopadayon sa unahan nga may hugot nga pagtuo.