I ô mai i te paruru: Te oraraa e a muri noa’tu

« E ti‘afaahou mai [te feia parau-ti‘a tei pohe] no te parahi i roto i te auahi ama ra i roto i te hanahana mure ore, eiaha no te oto, no te mauiui aore râ no te pohe faahou, e riro râ ratou ei feia tuhaa i te Atua ra e e feia tuhaa e Iesu Mesia ».

No roto mai i te oraraa o Iosepha Semita

Ua arata‘i te ohipa iritiraa i te Bibilia a Iosepha Semita e te hoê orama hau atu i te faahiahia no te oraraa a muri atu. I te 16 no fepuare 1832, te ohipa ra te peropheta i te fare o John Johnson i Hiram, Ohio, e o Sidney Ridgon ei papa‘i parau no’na. Te iriti ra oia i te evanelia a Ioane. Ua parau te peropheta i te tahi taime i muri mai e « na roto i te mau heheuraa huru rau tei fariihia, e au ra e, e rave rahi mau tuhaa faufaa rahi roa no ni‘a i te faaoraraa o te taata tei iriti-ê-hia’tu mai roto mai i te Bibilia, aore râ tei mo‘e hou te haaputuputuraa i te mau tuhaa no te Bibilia ei hoê ra. E au mau ra e na roto i te mau parau e vai noa ra i roto i te Bibilia, e ahani te Atua i faautu‘a i te mau taata ato‘a mai te au i te mau ohipa tei ravehia i roto i te tino nei, e ti‘a ïa ia vai mai i roto i te ta‘o ‘ra‘i’, mai tei mana‘ohia e te feia mo‘a ei ‘nohoraa mure ore’, hau atu i te hoê noa basileia ».¹

Ua iriti te peropheta i te Ioane 5:29, o te faaite mai e mea nahea te taato‘araa « ia haere mai » na roto i te ti‘a-faahou-raa—« te feia i mau na i te parau maitai ra, e ti‘a mai ïa e rave i te ora; e te feia hoi i mau na i te parau ino ra, e ti‘a mai ïa e rave i te pohe ». A feruri hohonu ai oia e Sidney i teie nei papa‘iraa mo‘a, ua horo‘ahia mai te hoê orama hanahana ia raua. Mai tei papa‘ihia e te peropheta; « Na roto i te mana o te Varua ra to maua pue mata i araara‘i e ua haamaramaramahia to maua feruriraa, ia ti‘a ia maua ia ite mata e ia ite papû hoi i te mau mea no te Atua ra—te reira mau mea o tei vai na hoi mai te haamataraa mai hou teie nei ao i vai mai ai, o tei haapa‘ohia e te Metua, na roto i to’na Tamaiti Fanau Tahi, o tei vai na i roto i te ouma o te Metua, mai te haamataraa mai â ra » (PH&PF 76:12–13)

Na roto i te orama hanahana, a te peropheta e a Sidney Rigdon tei ite i te Tamaiti a te Atua i te pae atau o te rima o te Metua e « ua farii hoi i ta to’na îraa » (PH&PF 76:20) Ua ite raua i na e toru basileia hanahana ta te Atua i faaineine no ta’na mau tamarii e ua haapiihia e o vai te farii i teie mau basileia. Ua ite ato‘a raua ia satane i te ti‘avaru-raa-hia i te aro o te Atua e te mau mauiui a satane i ni‘a i te feia o te hinaaro i te upooti‘a.

Ua riro teie nei orama i muri iho te tuhaa 76 no te Parau Haapiiraa e te Mau Parau Fafau. Ua haamaramarama te peropheta no ni‘a i teie nei orama: « Aita’tu e mea hau atu i te oaoa i te feia mo‘a no ni‘a i te haapa‘oraa o te basileia o te Fatu, maori râ te maramarama tei hiti mai i ni‘a i te ao nei na roto i teie nei orama. Te faaite mai nei te mau ture ato‘a, te mau faaueraa ato‘a, te mau fafauraa ato‘a, te mau parau mau ato‘a, e te mau tuhaa ato‘a no ni‘a i te oraraa o te taata, mai Genese e tae atu i te Apokalupo, i reira te mâraa o te mau papa‘iraa mo‘a i ore ai e haaviiviihia e te maamaa o te taata… te parau mau e taua papa‘iraa e iritiraa ïa no te mau buka no te ao mure ore. Te natura teitei o te mau mana‘o; te viivii ore o te reo; te hoho‘a no te ohipa; te tamau-noa-raa e ia oti te ohipa, ia nehenehe i te mau fatu no te faaora e fa‘i i te Fatu e ia fati te turi avae; te mau utu‘a no te haapa‘o-maitai-raa, e te mau faautu‘araa no te mau hara, tei tera’tu pae ïa o te aanoraa o te mana‘o taata, e e ti‘a i te mau taata parau-ti‘a ato‘a ia faahepohia ia tuo e: ‘No ô mai te reira i te Atua ra’ ».²

Te mau haapiiraa a Iosepha Semita

Ua faaineine te Atua e toru na faito hanahana no Ta’na mau tamarii.

« Ta‘u nei papa‘iraa no ni‘a ïa i te ti‘a-faahou-raa no te feia pohe, o ta outou e ite i roto i te pene 14 a Ioane—‘E rave rahi te parahiraa mau i te fare o tau Metua ra’ [Ioane 14:2].. E ti‘a ia tai‘ohia—‘E rave rahi te basileia mau i te basileia o tau Metua ra,’ ia nehenehe ia outou ia riro ei feia tuhaa e te Atua e e feia tuhaa e o vau nei… E rave rahi te mau parahiraa no ratou o te haapa‘o i te hoê ture tiretiera, e e rave rahi atu mau parahiraa no ratou o te ore e haapa‘o i te ture, te taata i roto i ta’na iho haapa‘oraa ».³

« E parau mai râ te hoê taata ‘te ti‘aturi nei au i te hoê ra‘i e te hoê hade, i reira te taata ato‘a e haere ai, e e hoê â ratou paato‘a, e e tei roto anei i te ati aore râ i te oaoa;’

« E aha ïa! i reira te mau taata ato‘a e amuihia’i—te taata tura, te viivii ore, e te feia taparahi taata e te taiata, a papa‘ihia’i e e haavâhia ratou mai te au i te mau ohipa ta ratou i rave i te tino nei? Ua faaite mai râ o Paulo Peata ia tatou no ni‘a i na hanahana e toru e e na ra‘i e toru. Ua ite oia i te hoê taata i hopoi-roa-hia i ni‘a i te ra‘i tua toru ra [a hi‘o 1 Korinetia 15:40–41; 2 Korinetia 12:2–4]… Ua parau atu o Iesu i Ta’na ra mau pĭpĭ, ‘e rave rahi te parahiraa mau i te fare o tau Metua ra; ahiri aita ra, ua parau atu ïa vau ia outou. Te haere nei au e haamaitai i te hoê vahi no outou e e hoi mai au e arata‘i ia outou i o‘u ra; ei reira ato‘a outou i te vahi e parahihia e au ra’ [A hi‘o Ioane 14:2–3] ».⁴

« A haere a tai‘o i te orama i roto i te [Parau Haapiiraa e te mau Parau Fafau 76]. Ua faaite maramaramahia te huru o te hanahana—te hoê anaana no te mahana, te tahi anaana no te marama, e te hoê anaana no te mau fetia; mai te hoê fetia e taa ê i te tahi atu fetia i te anaana, oia ato‘a te ao tiretia e taa ê i te hanahana, e te taata tata’itahi o te parahi i roto i te hanahana tiretiera e Atua ïa oia no ta’na mau mea ra…

« Te parau nei Paulo, ‘ e anaana ê to te mahana, e anaana ê to te marama, e anaana ê to te mau fetia; e huru ê hoi to te tahi fetia i to te tahi i te anaana. Oia ato‘a te ti‘a-faahou-raa o tei pohe’ [1 Korinetia 15:41–42] ».⁵

O ratou o te farii i te parau faaite a Iesu, e te farii i te mau oro‘a no te evanelia e te upootia na roto i te faaroo e fatu ïa ratou i te basileia tiretiera

Ua ite te peropheta Iosepha Semita i teie nei mau mea i muri nei i roto i te orama, tei papa‘ihia i muri iho i roto i te Parau Haapiiraa e te mau Parau Fafau 76:50–59, 62, 68–70: « E te faaite faahou atu nei maua—no te mea ua ite mata’tu maua e ua faaroo hoi, e o teie te parau faaite no te evanelia a te Mesia no ni‘a ia ratou o te ti‘a mai i roto i te ti‘a-faahou-raa o te feia parauti‘a ra—o ratou ïa o tei farii i te parau faaite a Iesu, e ua faaroo i to’na ra i‘oa e ua bapetizohia hoi na roto i te huru o to’na tanuraa-hia, ua tanuhia hoi i raro a‘e i te pape i roto i to’na ra i‘oa, e o teie mai te au i te faaueraa ta’na i horo‘a mai ra—e na roto i te haapa‘oraa i te mau faaueraa e ti‘a ia ratou ia horoihia e ia tamâhia hoi i ta ratou ra mau hara ato‘a, e ia farii i te Varua Mo‘a, na roto i te tuuraa rima no’na o tei faatoro‘ahia e ua taatihia’tu hoi i teie nei mana; e o tei upooti‘a hoi na roto i te faaroo, e ua taatihia’tu hoi e te Varua Mo‘a no te fafauraa, o ta te Metua i ninii mai i ni‘a ia ratou ato‘a o tei parau-ti‘a e tei haapa‘o maitai hoi.

« O ratou ïa o te ekalesia no te Matahiapo ra. O ratou ïa o ta te Metua i horo‘atu te mau mea ato‘a ra—o ratou ïa o te mau tahu‘a e te mau arii, o tei farii i to’na îraa, e i to’na hanahana hoi, e e mau tahu‘a hoi no tei Teitei Roa ra, mai te au i te haapa‘oraa a Melehizedeka, o tei au i te haapa‘oraa a Enoha ra, o tei au hoi i te haapa‘oraa a te Tamaiti Fanau Tahi ra.

« No reira, mai te au i tei papa‘ihia ra, ei mau atua ratou, oia te mau tamarii a te Atua—no reira, no ratou te mau mea ato‘a, noa’tu te ora e aore râ te pohe, e aore râ te mau mea e vai nei, e aore râ te mau mea e vai e a muri atu ra, no ratou ïa te mau mea ato‘a e na te Mesia ratou, e na te Atua hoi te Mesia.

« E parahi hoi teie mau taata i mua i te aro o te Atua e to’na ra Mesia e a muri e a muri noa’tu… O ratou teie o tei papa‘ihia to ratou ra mau i‘oa i te ao ra, i te vahi tei reira te Atua e te Mesia ei na haavâ na te mau taata ato‘a ra. O ratou teie o te mau taata parau-ti‘a i faati‘a-roa-hia na roto ia Iesu te arai no te fafauraa apî, o tei faatupu i teie nei taraehara ti‘a mau na roto i te haamaniiraa i to’na iho toto. O ratou hoi teie o to ratou ra mau tino ei mea celestial ïa, o to ratou ra hanahana o te mahana ïa, oia ïa te hanahana no te Atua, tei Teitei Roa ra, o ta’na ra hanahana ua papa‘ihia e e taipe te mahana o te reva nei no te reira ».⁶

Ua haapii te peropheta Iosepha Semita i teie nei mau haapiiraa i muri nei i te ava‘eno me 1843, tei papa‘ihia i muri iho i roto i te Parau Haapiiraa e te mau Parau Fafau 131:1–4: « I roto i te hanahana tiretiera ra, te vai nei ïa e toru a‘e ao e a ore râ tuhaa; E ia ti‘a ia noaa mai tei teitei a‘e ra, ia tomo mai te taata i roto i teie haapa‘oraa no te autahu‘araa e tia’i (oia hoi, te fafauraa apî e te mea mure ore no te faaipoiporaa); e ia ore oia ia na reira, e ore roa e noaa te reira ia’na. E ti‘a ïa ia’na ia tomo atu i roto i te tahi, tera râ o te hopea te reira no to’na basileia; e ore roa e ti‘a ia’na ia faarahihia ».⁷

« No reira, teie te ora mure ore—ia ite i te Atua mau e te paari; e e ti‘a ïa ia outou ia haapii e nahea outou iho ia riro ei mau atua, e ia riro ei mau arii e e mau tahu‘a i te Atua ra… na roto i te haereraa mai te hoê faito na‘ina‘i e tae atu i te tahi atu faito, e mai te hoê aravihi na‘ina‘i e tae atu i te hoê aravihi huru rahi atu; mai te maitai i te maitai, mai te faateiteiraa i te faateiteiraa, e tae noa-’tu e noaa ia outou te ti‘a-faahou-raa o te feia pohe, e ia nehenehe ai ia outou ia parahi i roto i te auahi ama ra, e ia parahi i roto i te hanahana, mai ratou o te parahi ra i ni‘a i te terono i roto i te puai mure ore…

« …E ti‘afaahou mai [te feia parau-ti‘a tei pohe] no te parahi i roto i te auahi ama ra i roto i te hanahana mure ore, eiaha no te oto, no te mauiui aore râ no te pohe faahou, e riro râ ratou ei feia tuhaa i te Atua ra e e feia tuhaa e Iesu Mesia. E aha ïa te reira? Te faturaa i te hoê â mana, hoê â hanahana, e te hoê â faateiteiraa, e tae noa’tu ua noaahia ia outou te faito o te hoê atua, e ia pa‘uma outou i te terono no te puai mure ore, mai ratou tei haere na mua’tu na teie nei haerea ».⁸

« O ratou tei noaa i te ti‘a-faahou-raa hanahana mai te pohe mai, ua faateiteihia i ni‘a‘e i te mau basileia, te mau mana, te mau terono e te mau hau e te mau melahi, e tei parau-papû-hia e feia tuhaa i te Atua ra e e feia tuhaa e Iesu Mesia, o te farii paato‘a ana‘e i te puai mure ore[a hi‘o Roma 8:17] ».⁹

« Te mau taata tura o te fenua nei », o ratou tei ore i itoito i te faaiteraa i te parau no Iesu, e feia tuhaa ïa no te basileia teretetiera

Ua ite te peropheta Iosepha Semita i teie nei mau mea i muri nei i roto i te orama, tei papa‘ihia i muri iho i roto i te Parau Haapiiraa e te mau Parau Fafau 76:71–79: « E teie faahou â, ua ite mata’tu maua i te ao teretetiera, e a hi‘o na e inaha, o ratou teie no te terrestrial ra, o to ratou ra hanahana e huru ê nei i to te ekalesia a te Matahiapo ra o tei farii na i te îraa no te Metua ra, mai te au i ta te marama e huru ê nei i te mahana o te reva ra.

« Inaha, o ratou teie o tei pohe atu ma te ture ore; e o ratou hoi teie’ o te mau varua o te taata nei i tape‘a-noa-hia i roto i te fare tape‘araa, o ta te Tamaiti i fareirei atu, e ua a‘o atu hoi i te evanelia ia ratou ra, ia ti‘a ia ratou ia haavâhia mai te au i te haavâraa o te taata i roto i te tino nei; o tei ore hoi i farii i te faaite a te Mesia i roto i te oraraa nei, ua farii râ i te reira i muri iho.

« O ratou teie o te mau taata tura o te fenua nei, o tei matapohia e te rave‘a paari o te mau taata nei. O ratou teie o te farii i to’na ra hanahana, eiaha râ i to’na ra îraa. O ratou teie o te farii i te aro o te Tamaiti, eiaha râ i te îraa no te Metua.

« No reira, ei mau tino teretetiera ratou, e eiaha hoi ei mau tino celestial, e ua huru ê to ratou hanahana mai te marama e huru ê hoi i te mahana ra. O ratou teie o tei ore i itoito i te faaitereraa i te parau no Iesu; no reira, e ore hoi e noaa ia ratou te korona i ni‘a‘e i te basileia o to tatou Atua ».¹⁰

O ratou tei rave i te ohipa ino e tei ore i farii i te evanelia aore râ te parau faaite a Iesu, e feia tuhaa ïa no te basileia tiretia

Ua ite te peropheta Iosepha Semita i teie nei mau mea i muri nei i roto i te orama, tei papa‘ihia i muri iho i roto i te Parau Haapiiraa e te mau Parau Fafau 76:81–85, 100–106, 110–112: « E teie faahou â, ua ite mata’tura maua i te hanahana no te tiretia, o te reira hanahana ra o te mea iti a‘e ïa, mai te au i te hanahana o te mau fetia e huru ê nei i te hanahana o te marama i roto i te reva ra.

« O ratou teie o tei ore i farii i te evanelia a te Mesia, aore ato‘a hoi te parau faaite a Iesu. O ratou teie o tei ore i huna i te Varua Mo‘a. O ratou teie o tei hurihia’tu i raro i hade ra. O ratou teie o te ore e faaorahia mai i o te diabolo ra e tae noa’tu i te ti‘a-faahou-raa hopea, e tae noa’tu te taime te Fatu, oia te Mesia te Arenio, e faaoti ai i ta’na ra ohipa…

« O ratou teie o te parau mai e, no te hoê te tahi e no vetahi ê ra te tahi—no te Mesia te tahi e no Ioane te tahi, e no Mose te tahi, e no Elia te tahi e no Esaia te tahi e no Isaia te tahi, e no Enoha hoi te tahi; aore râ ratou i farii i te evanelia, aore ato‘a hoi te faaite a Iesu, aore ato‘a te mau peropheta, aore roa ato‘a hoi te fafauraa mure ore ra.

« E i te hopea roa ra, o ratou hoi teie o te ore e haaputuputuhia i piha‘i iho i te feia mo‘a, ia tahitihia’tu i ni‘a i te ekalesia a te Matahiapo, e ia fariihia hoi i roto i te ata ra.

« O ratou teie o te feia parau haavare, e te feia tahutahu, e te feia faaturi, e te feia taiata, e o oia ato‘a o tei hinaaro e o tei faatupu hoi i te haavare ra. O ratou teie o te haamamaehia i te riri rahi o te Atua i ni‘a i te fenua nei. O ratou teie o te hurihia’tu i raro i hade ra e o te faaoromai noa i te riri rahi no te Atua Mana Hope, e tae noa’tu i te îraa o te mau tau, ia haavî te Mesia i te mau enemi ato‘a i raro a‘e i to’na ra avae, e ua tia ia’na ra ta’na mau ohipa…

« E ua faaroo hoi [maua] i te reo o te Fatu i te na‘oraa mai e: E tuu paato‘a teie nei feia i te turi avae i raro, e e fa‘i mai te mau arero ato‘a ra ia’na o tei parahi i ni‘a i te terono e a muri e a muri noa’tu; no te mea e haavâhia ratou mai te au i ta ratou ra mau ohipa, e e farii mai te taata ato‘a mai te au i ta’na iho ohipa, i to’na ihora hau, i roto i te mau aorai o tei faaineinehia ra; e e riro ratou ei mau tavini no tei Teitei Roa ra; tera râ i te vahi te Atua e o te Mesia e parahi ai ra e ore roa e ti‘a ia ratou ia haere, i te mau a‘o hopea ore ra ».¹¹

Te mauiui rahi o te feia iino o te iteraa ïa e aita i noaa ia ratou te hanahana e ti‘a ia ratou ia oaoa

« Ua faaoti te Atua e te mau taata ato‘a o te ore e faaroo i To’na ra reo e ore roa ïa ratou e ape i te faautuaraa no hade. E aha te faautuaraa no hade? O te haereraa’tu ïa i taua pŭpŭ taata ra o tei ore i haapa‘o i Ta’na ra mau faaue… Ua ite au e e faautuahia te mau taata ato‘a mai te mea eita ratou e haere na ni‘a i te e‘a Ta’na i iriti, e teie te e‘a tei faaitehia mai e te parau a te Fatu ».¹²

« Te ati rahi o te mau varua tei haere atu i te ao varua, i reira ratou e haere ai i muri i te pohe, o te iteraa ïa e aita i noaa ia ratou te hanahana ta vetahi ê e oaoa ra e o tei ti‘a ia ratou ia oaoa, e o ratou iho to ratou taata faahapa ».¹³

« Aita e mauiui hau atu i te rahi i te mauiui no te papû-ore-raa. Teie te faautuaraa o te feia iino; e faatupu to ratou feaa, to ratou mana‘o tapitapi e te tia‘ii-noa-raa i te oto, te aueraa, te auauraa niho ».¹⁴

« Ua riro te taata ei oto e ei faauturaa no’na iho. Teie râ tei parauhia, e tomo ratou i roto i te roto auahi e te gopheri e ama ra [ A hi‘o Apokalupo 21:8]. Te mauiui o te oto o te mana‘o o te taata e au ïa i mai te puai o te auahi e te gopheri e ama ra. Te parau nei au e, oia’toa ïa te oto o te taata nei…

« …E ti‘a mai vetahi no te haere i roto i te ama auahi mure ore a te Atua, no te mea e noho te Atua i roto i te ama auahi mure ore e e ti‘a mai vetahi i roto i te faauturaa o ta ratou iho mau ohipa faufau, oia ïa mai te puai o te hoê mamae rahi mai te roto o te ama o te auahi e o te gopheri ».¹⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv

Te feruri hohonu ra o Iosepha Semita e Sidney Rigdon no ni‘a i te hoê irava no te papa‘iraa mo‘a a farii ai raua i te heheuraa tei papa‘ihia i roto i te Parau Haapiiraa e te mau Parau Fafau 76 (te mau api 247–49 hi‘o ato‘a PH&PF 76:15–19). E aha te mau ohipa tei tupu ia outou tei tauturu ia outou ia taa maitai e e nehenehe ta te feruriraa e arata‘i i te rahiraa o te ite? A tuatapapa aore râ a aparau ai outou i teie nei pene, mai te tahi atu mau pene, a rave i te taime no te feruri hohonu i te mau parau mau ta outou e tai‘o nei.
A tai‘o Ioane 14:2–3 e 1 Korinetia 15:40–41. Nahea te mau haapiiraa i roto i teie nei pene e tauturu ai ia outou ia taa maitai i teie nei mau irava?
Na roto i te faaiteraa e o vai te farii i te hanahana tiretiera, teretetiera, e tiretia, te irava parau « te iteraa papû no Iesu » tei faaohipahia e pae taime (te mau api 250–55). E aha te mau tapa‘o no te hoê taata tei «itoito i te iteraa papû no Iesu? » Eaha te mau fafauraa tei horo‘ahia ia ratou o tei itoito i te iteraa papû no Iesu?
A tai‘o i te paratarafa matamua i te api 250 te haapa‘o maitai i te irava parau « upooti‘a na roto i te faaroo ». E aha te tahi mau mea e ti‘a ia tatou ia upooti‘a atu? Nahea te faaroo ia Iesu Mesia e tauturu ai ia tatou ia upooti‘a i to tatou mau fifi i roto i teie nei oraraa?
A tai‘o i te taato‘araa o te paratarafa hopea i te api 251. I roto i to tatou haereraa mure ore i mua, no te aha i to outou feruriraa e tia’i ia tatou ia haamaitai « mai te hoê faito na‘ina‘i e tae atu i te tahi faito? » E aha te mau ohipa tei tupu ia outou o te faahoho‘a mai i to tatou hinaaro ia haapii e ia tupu na roto i teie nei rave‘a?
A tai‘o faahou i te piti o te paratarafa i te api 254, o te faaite mai i te tahi o te mau taata o te riro ei feia tuhaa no te basileia teretetiera. Nahea tatou ia ape ia ore tatou « ia matapohia e te rave‘a paari o te taata nei? » E aha ta tatou e nehenehe e rave no te tauturu ia vetahi ê ia ore e matapohia?
I te api 255, a imi i te mau ta‘o e te mau irava parau ta Iosepha Semita i faaohipa no te faaite i te huru o te mau taata iino i roto i te oraraa a muri atu. E aha ta teie nei mau ta‘o e irava parau e faaite mai nei ia outou? Nahea ta te hoê taata e riro ai « to’na iho taata haamauiui e to’na iho taata faahapa? »

Te mau papa‘iraa mo‘a: Alama 41:2–8; PH&PF 14:7; 76:20–49; 88:15–39