Te Sotaiete Tauturu: E faanahonahoraa hanahana na te mau vahine

« Mai te mea e haapa‘o outou i ta outou mau haamaitairaa, eita ïa te mau melahi e tape‘ahia ia riro ei mau tauturu no outou ».

No roto mai i te oraraa o Iosepha Semita

I te tau mahanahana no te matahiti 1842, te ohipa ra te mau melo no te Ekalesia i Nauvoo i te paturaa i te hiero no Nauvoo. E piti o taua mau melo ra o Sarah Granger Kimball e ta’na vahine nira ahu, Margaret A. Cook ïa, tei faaoti, na roto i to raua tau‘a parauraa i te hoê mahana, i te amui i ta raua tutavaraa no te tauturu i te mau taata rave ohipa no te hiero. Ua parau te tuahine Kimball e e horo‘a oia i te ahu ia nehenehe i te tuahine Cook ia nira i te mau ahu oomo no te mau tane. Ua faaoti a‘era na vahine e piti e ani i te tahi ê atu mau tuahine ia amui atu ia raua no te faatupu i te hoê sotaiete a te mau vahine no te faananea i ta ratou mau tautooraa ma te tamoni ore. Ua haamana‘o o Sarah Granger Kimball: « Ua farerei te mau tuahine i roto i to‘u piha fariiraa taata e ua faaoti i te faanahonaho. Ua tonohia vau ia farerei i te tuahine Eliza R. Snow e e ani ia’na ia papa‘i no matou te hoê păpă ture e te mau faatureraa, e ia horo‘a’tu i te peresideni Iosepha Semita hou ta matou apooraa i te mahana maha i mua ».

I muri a‘e i to’na hi‘oraa i te păpă ture e te mau faatureraa tei mana‘ohia, ua parau te peropheta e ua riro teie păpă ture ei mau faanahoraa maitai roa‘e ta’na i ite e ua parau râ oia: « E ere teie ta outou e hinaaro nei. A parau i te mau tuahine e ua fariihia ta ratou pûpûraa e te Fatu, e te vai nei ta’na te tahi mea maitai a‘e no ratou i te hoê păpă ture tei papa‘ihia. Ua ani au ia ratou paato‘a ia farerei ia‘u e te tahi o te mau taea‘e… i te avatea no te mahana maha i mua nei ».¹

Mai tei faaauhia, i te 17 no mati, ua farerei te peropheta, ma te apeehia e te mau taea‘e John Taylor e Willard Richard, i na vahine e 20 no te mau faito matahiti ato‘a i te tahua i ni‘a no te fare toa ofa‘i uteute. Ua faanaho mana te peropheta i te sotaiete tauturu a te mau vahine no Nauvoo e ua haapii i te feia i reira no ni‘a i te mau tumu no te fanahonahoraa apî. Ua ma‘iti te mau tuahine ia Emma Semita ei peresideni no te sotaeite tauturu, e ua ma‘iti o Emma i to’na na tauturu e piti. I muri iho ua tai‘o te peropheta i te hoê heheuraa tei fariihia e 12 matahiti na mua’tu i roto i te reira ua faaue te Fatu ia Emma ia haaputu i te mau himene ia nene‘ihia e ua faataa ia’na ei hoê « vahine maitihia » [PH&PF 25:3). Ua ti‘a mai o Emma Semita no te a‘o, ma te haapapû i te maitai rahi o te sotaiete e ti‘a ia faarahihia: « E rave tatou i te tahi mea faahiahia… Te ti‘a’i nei tatou i te mau taime faahiahia e te mau piiraa rû no te tauturu ».²

Ua vai noa te hoê hinaaro puai ia Emma, te peresideni rahi matamua no te sotaiete tauturu, i te tavini ia vetahi ê e i te patu i te basileia o te Atua, o tei faahiti i te hoê taime e ua hinaaro oia ia riro « ei hoê haamaitairaa no te taata ato‘a o te hinaaro nei i te tahi mea i to‘u nei rima ».³ I New York, ua nira oia i te ahu no na misionare e maha tei piihia no te poro i te evanelia i to te Ati Lamana. I Ketelani, ua rave oia i te ohipa e te tahi atu mau tuahine no te haaputuputu mai i te mau ahu taoto, te maa, e te ahu ta te feia haere no te puhaparaa no Ziona e afa‘i atu i te feia mo‘a tei roohia i te ati i Missouri. Ua tauturu oia i te faaineine i te maa e ua nira oia i te mau totini, te mau piripau avae roa, e te mau ahu mahanahana no te feia rave ohipa e patu ra i te hiero no Ketelani. Ua farii oia e rave rahi mau taata rave ohipa no te hiero ia faaea i to’na fare e ua ti‘a ia’na e ia Iosepha ia taoto noa i ni‘a i te tahua. I te mau mahana matamua no Nauvoo, ua horo‘a oia i te rahiraa o to’na taime e to’na mana‘o no te atuaturaa i te feia tei roohia i te ma‘i mariri tei puhapa i rapae au i to’na ra fare i te hiti o te anavai no Mississipi. Na roto i teie e te tahi atu â mau rave‘a, ua faahoho‘a oia i te taviniraa tei horo‘ahia e te mau tuahine i roto i ta’na mahana. Te haamana‘o râ o Polly Angell i te taime te peropheta a ite ai i te hoê pŭpŭ vahine i te niraraa i te mau paruru o tei faaohipahia no te faataa i te mau tuhaa i roto i te hiero no Ketelani: « No reira, e te mau tuahine… ua ineine noa outou i te mau taime ato‘a. I roto i te mau ohipa maitai ato‘a ua na mua roa te mau tuahine i te mau taime ato‘a ».⁴

Mai taua mau mahana matamua ra o te sotaiete tauturu, ua vai noa te mau vahine no te Ekalesia ei hoê puai u‘ana no te maitai. I te hoê apooraa tei faaterehia e hoê hebedoma i muri a‘e i te haamau-raa-hia te sotaiete tauturu, ua horo‘a o Lucy Mack Semita, te metua vahine o te peropheta, i te mau tuahine te mana‘o tauturu tei raea‘ehia i te mau milioni mau vahine i roto i te Ekalesia i teie nei mahana: « E ti‘a ia tatou ia here te tahi e te tahi, ia ti‘a’i i te tahi e te tahi, ia tamahanahana te tahi e te tahi e ia noaa ia tatou te ite, ia nehenehe paato‘a ia tatou ia parahi amui i te ra‘i ».⁵

Te mau haapiiraa a Iosepha Semita

Ua riro te sotaiete tauturu, tei faanahohia i raro a‘e i te autahu‘araa e mai te au i to’na hoho‘a, e hoê tuhaa faufaa rahi roa o te Ekalesia

Te haamana‘o râ o Sarah Granger Kimball na mua iti noa a faanahonaho ai te peropheta i te sotaiete tauturu ua parau oia e: « E faanahonaho vau i te mau vahine i raro a‘e i te autahu‘araa mai te au i te hoho‘a o te autahu‘araa… Aita roa te Ekalesia i faanahonaho-maitai-roa-hia e tae noa’tu ua faanahonahohia te mau vahine ».⁶

Te papa‘iraa i roto i te aamu o te peropheta i te 24 no mati 1842; « Ua hope roa [te] faanahonahoraa o [te sotaiete tauturu a te mau vahine] i te ravehia i teie mahana. Ua rave o Emma Semita vahine i te parahiraa no te peresideni; O Elizabeth Ann Whitney e Sarah M. Cleveland to’na na tauturu e piti; o Elvira [Cowles] vahine te papa‘i parau haapa‘o faufaa, e o Eliza R. Snow, to tatou vahine papa‘i pehe tuiroo e tei î i te taleni, te papa‘i parau ».⁷

Ua faaite mai o Eliza R. Snow e: « Ua ti‘a a‘era te peropheta Iosepha Semita i ni‘a. Parau a‘era no ni‘a i te faanahonahoraa o te sotaiete tauturu na te mau vahine; ua parau oia e ua anaanatae hohonu roa oia, e e nehenehe te reira ia patuhia i te Teitei Roa na roto i te hoê huru e fariihia ».⁸

Ua faaite faahou mai o Eliza R. Snow e: « Ua a‘o o [Iosepha Semita] i te mau tuahine ia faatumu i te mau taime ato‘a to ratou faaroo e ta ratou mau pure e ia ti‘aturi i… taua mau taata haapa‘o maitai ta te Atua i tuu i te upoo o te Ekalesia no te arata‘i i To’na ra nunaa; e e ti‘a ia tatou ia paruru e ia turu ia ratou na roto i ta tatou mau pure… Mai te mea e faaroo teie sotaiete i te a‘o a te Atua Mana Hope, na roto i te mau upoo o te Ekalesia, e mana ïa to ratou i te faatere i te mau arii vahine i rotopu ia ratou ».⁹

« E ti‘a i teie sotaiete ia farii i te haapiiraa na roto i te haapa-‘oraa ta te Atua i haamau—na roto i te feia tei maitihia no te arata‘i—e te horo‘a atu nei au i te taviri ia outou i te i‘oa o te Atua, e e oaoa teie nei sotaiete, e e tahe mai te ite e te maramarama mai teie atu taime—teie te omuaraa no te mau mahana maitai no teie sotaiete ».¹⁰

E faati‘a te sotaiete tauturu i te mau vahine ia rave mai te au i to ratou mau huru maitai, i te atuaturaa i te feia tei roto i te ati

« E sotaiete aroha teie, e mai te au i to outou mau huru natura; e ohipa natura na te mau vahine ia farii i te mau mana‘o aroha e te rave maitai. Ua tuuhia outou i teie nei i te hoê ti‘araa e nehenehe ai ia outou ia rave mai te au i taua mau mana‘o aroha ra ta te Atua i tanu i roto i to outou mau ouma ».¹¹

« Ua parau o Iesu, ‘e rave ïa outou i te ohipa ta outou i ite ia‘u i te raveraa’ [A hi‘o 2 Nephi 31:12]. Teie te mau parau tumu rahi e ti‘a i te sotaiete ia faaohipa ».¹²

Ua faaite mai o Willard Richard e; « Ua a‘o te peresideni Iosepha Semita i te apooraa a te [sotaiete tauturu a te mau vahine], no te faahoho‘a i te fâ o te sotaiete—ia nehenehe i te sotaiete o te mau tuahine ia tura‘i i te mau taea‘e ia rave i te mau ohipa maitai na roto i te hi‘oraa i te mau hinaaro o te feia vêvê— ma te maimiraa i te mau mea no te aroha, e te haamâharaa i to ratou mau hinaaro—no te tauturu na roto i te faatiti‘aifaroraa i te morare e te haapuairaa i te mau maitai o te huiraatira ».¹³

« Ua haere au na roto i te aniraa i te sotaiete tauturu a te mau vahine, e te fâ o teie sotaiete o te tautururaa ïa i te feia vêvê, tei ere, te vahine ivi e te otare, e no te faaohiparaa i te mau tumu maitai ato‘a… Ua tae rahi mai ratou i te faati‘araa o te sotaiete, e i te mau pureraa i muri mai ato‘a, te tahi o ta tatou mau vahine maramarama roa‘e, maitai roa‘e, aroha roa‘e, e te tura roa‘e; e ua haapapûhia matou na roto i te hoê iteraa no taua mau parau tumu mâ no te maitai e tahe mai na roto i to ratou mau ouma taata e te aroha, e na roto i te mau rave‘a i roto i to ratou rima, e e ma‘ue atu ïa ratou no te tauturu i te taata ĕê; e manii ratou i te hinu e te uaina i ni‘a i te mafatu mamae o te taata hepohepo; e e tamaro ratou i te mau roimata o te otare e e faaoaoa ratou i te aau o te vahine ivi.

Ua itehia ta tatou mau vahine i te mau taime ato‘a no ta ratou mau ohipa aau aroha e te maitai;… i roto i to ratou mau hamaniino-raa-hia, i te taime a rave-ê-hia’tu ai te faraoa mai ta ratou mau tamarii tauturu-ore-hia e to ratou mau taata hamani ino, ua ineine noa ratou no te iriti i to ratou mau uputa i te ratere rohirohi, no te taafa i ta ratou maa iti e te feia poia, e ia horo‘a i to ratou mau ahu tei eiâhia e tei vêvê i te feia tei hau atu i te vêvê e te ati; e i teie nei te ora nei hoi ratou i ni‘a i te hoê fenua maitai a‘e, e i rotopu i te hoê nunaa taata maitai a‘e, e te mau nei ratou i te mau taoa tei ore roa i fana‘ohia e ratou na mua’tu, ua ite matou e na roto i ta ratou mau tautooraa amui, e haamaitaihia ïa te huru o te feia vêvê e mauiui nei, o te taata ĕê e te otare ».¹⁴

Te faaitoito nei te sotaiete tauturu i te mau vahine ia faaohipa i te mo‘araa e ia haapii te tahi e te tahi

« E ere te sotaiete tauturu a te mau vahine no te tauturu noa i te feia vêvê, no te faaora ato‘a râ i te mau varua ».¹⁵

« I teie nei e mau tuahine here e… te hinaaro nei matou e ia rave outou i ta outou tuhaa, e e rave ïa matou i ta matou tuhaa, no te mea te hinaaro nei matou ia haapa‘o i te mau faaueraa a te Atua i roto i te mau mea ato‘a, mai tei horo‘a-ti‘a-hia mai te ra‘i mai ia tatou, ma te ora na roto i te mau parau ato‘a no roto mai i te vaha o te Fatu. Ia amui mai te Atua i ta’na haamaitairaa i ni‘a iho i to outou mau upoo e ia arata‘i ia outou na ni‘a i te mau e‘a no te viivii ore, te mâ e te maitai ».¹⁶

« Ua rave maitai te sotaiete [tauturu]: ta ratou mau parau tumu o te raveraa ïa i te mo‘araa. Te here nei te Atua ia outou, e mea ti‘a-rahi-hia mai ïa ta outou mau pure no‘u; ia ore ratou e faaea i te haere tamau ti‘a’tu i te Atua no‘u ».¹⁷

« E ti‘a ia outou ia faaore te ino, e na roto i to outou mau hi‘oraa maitai, ia tura‘i i te mau peresibutero ia rave i te ohipa maitai ».¹⁸

Ua faaite mai o Willard Richard e: « Ua tai‘o te peresideni Iosepha Semita i te heheuraa ia Emma Semita, i roto i te Buka no te Parau Haapiiraa e te mau Parau Fafau [PH&PF 25]; e ua parau e e ti‘a ia’na ia tatara i te taato‘araa o te mau papa‘iraa mo‘a; e ia haapii i te mau vahine no te huiraatira; e ia nehenehe ato‘a ia vetahi ê, eiaha noa ia’na ana‘e, ia noaa te hoê â mau haamaitairaa ».¹⁹

Ua faaite mai o Eliza R. Snow e: « No te mea hoi e e tei vai nei teie rave‘a i te peropheta Iosepha Semita, e e haapii oia i te mau vahine no teie sotaiete, e e faaite atu oia ia ratou te e‘a no te faatere ia ratou, ia rave ratou mai te au i te hinaaro o te Atua…

« Mai te mea e haapa‘o outou i teie mau parau tumu, auê ïa te rahi e te hanahana ta outou utu‘a i roto i te basileia tiretiera! Mai te mea e haapa‘o outou i ta outou mau haamaitairaa, eita ïa te mau melahi e tape‘ahia ia riro ei mau tauturu no outou. Mai te mea e mea mâ e e mea hara ore ratou, e nehenehe ta te mau vahine ia haere i mua i te aro o te Atua; no te mea eaha te mea au-roa-hia e te Atua maori râ te viivii ore; e ti‘a ia outou ia riro ei mea viivii ore, aita ana‘e eita ïa e nehenehe ia outou ia haere atu i mua i te Atua: mai te mea e haere tatou i mua i te Atua, e ti‘a ia tatou ia tape‘a mâ ia tatou, mai Ia’na ra te huru ».²⁰

Te faaitoito nei te sotaiete tauturu i te mau vahine ia pee i te hoho‘a o te Faaora na roto i te faaiteraa i te aroha e te aperaa i te marôraa

« Mai te mea e hinaaro outou ia hi‘o aroha mai te Atua ia outou, a hi‘o aroha’tu te tahi e te tahi… Ua î tatou i te mana‘o haapa‘o noa ia tatou iho; te faateniteni nei te diabolo ia tatou e mea parau-ti‘a ana‘e tatou, ia faatumu ana‘e tatou i ni‘a i te mau hape o vetahi ê. E nehenehe noa tatou e ora na roto i te haamoriraa i to tatou Atua; e ti‘a i te taato‘araa ia haamori i te Atua no ratou iho; aita roa e nehenehe i te hoê taata ia haamori no te tahi ê atu taata. Auê ïa te marû to te Faaora auraa ia Petero, i te na-ôraa e, ‘e ia faafariuhia mai oe ra, a faaitoito i to mau taea‘e’ [Luka 22:32]. I te tahi atu taime, ua parau atu Oia ia’na, ‘te hinaaro na oe ia‘u?’ e i to’na fariiraa i te pahonoraa a Petero, ua parau Oia, ‘a faaamu i tau mau mamoe’ [Ioane 21;15–17]. Mai te mea ua [here] te mau tuahine i te Fatu, a vaiiho ia ratou ia faaamu i te mamoe, eiaha râ e haamou ia ratou…

« E te mau tuahine no te sotaiete, e vai anei te marôraa i rotopu ia outou? Eita ïa vau e na reira. E ti‘a ia outou ia tatarahapa, e ia farii i te here o te Atua. A faatea ê i te faarahi ia outou. Te rave‘a aore râ te parau tumu maitai roa‘e ia tatarahapa te feia vêvê o te atuaturaa ïa i to ratou mau hinaaro ».²¹

Ua faaite mai o Eliza R. Snow i teie mau parau a te peropheta: Taaê noa’tu i te feia parau-ti‘a ore i rotopu ia tatou, eita e ti‘a i te feia parau-ti‘a no to ratou iho maitai, ia haamauiui e ia faatîtî faufaa ore noa, i te feia parau-ti‘a ore—ia faaitoitohia râ teie feia parau-ti‘a ore ia ora mai teie atu taime ia faaturahia ratou e teie sotaiete, o te mau vahine maitai roa‘e o te huiraatira. Ua parau oia e piti na mana‘o a‘o i te mau melo no teie sotaiete, ia haapa‘o maitai i te mea ta tatou e parau: aita roa e pŭpŭ faanahonahohia e vai, mai te mea aita roa‘e te reira mea… Te fâ o te faataui i te feia e ere i te mea maitai roa no te hoi i ni‘a i te e‘a no te viivii ore ia nehenehe ia ratou ia numerahia e te feia maitai…

« …A hi‘o i to outou iho huru—melo vi ore te arero—a tape‘a i to outou mau arero no ni‘a i te mau mea faufaa ore—e nehenehe te hoê aamu na‘ina‘i e faatupu i te mau fifi rahi ».²²

« I te mau alope rii ra e ino ai te mau vine—na te mau ino rii e faatupu i te ino rahi o te Ekalesia. Mai te mea e mau mana‘o iino to outou, e e parau atu te reira mau mana‘o i te tahi e te tahi, na te reira e faatupu i te ohipa ino ».²³

« Eiaha e tuino i te huru o te hoê taata. Mai te mea e rave te mau melo no te sotaiete i te mea eita e tano ia ratou, a faaafaro ia ratou, e a tape‘a noa ta outou mau raveraa na outou iho, e a faariro te huru o te mau taata ei mea mo‘a ».²⁴

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv

A tai‘o i te parau a Emma Semita i ni‘a i te api 509. I to outou feruriraa no teaha te mau tuahine o te sotaiete tauturu e nehenehe ai e faatupu i te mau mea faahiahia? Nahea to outou e to outou utuafare haamaitai-raa-hia na roto i te mau tautooraa a te mau tuahine no te Sotaiete Tauturu? A tai‘o i te a‘o a Lucy Mack Semita i te hopea o te api 509. Nahea te mau tuahine no te sotaiete tauturu e pee ai i teie a‘o i teie nei mahana?
Ua faanahonaho te peropheta Iosepha Semita i te sotaiete tauturu i « raro a‘e i te autahu‘araa mai te au i te hoho‘a o te autahu‘araa » (api 512). Nahea teie e faataa ê ai ia ratou i te tahi atu mau faanahonahoraa tauturu i roto i te ao nei? (No te tahi mau hi‘oraa, a hi‘o i te api 512). I to outou feruriraa no te aha te Ekalesia « i ore roa’i i faanahonaho-maitai-roa-hia e tae noa-’tu i te taime ua faanahonaho o Iosepha Semita i te sotaiete tauturu?
Nahea te mau hopoi‘a a te mau tuahine no te sotaiete tauturu i teie mahana e faaauhia ai i te mau hopoi‘a ta te mau tuahine i farii mai roto mai ia Iosepha Semita ra? (No te tahi mau hi‘oraa, a hi‘o i te mau api 512–16). A tai‘o i te taato‘araa o te paratarafa matamua i te api 513. Nahea te mau taime no te horo‘a i te taviniraa e tauturu ai ia tatou ia riro hau atu mai te Faaora ra?
A tai‘o i te paratarafa matamua i te api 513. I to outou mana‘o eaha te auraa te parau ia faaora i te hoê varua? Nahea te mau melo no te sotaiete tauturu e rave faaoti ai i teie hopoi‘a, i te pae tino e i te pae varua?
A tai‘o faahou i te taato‘araa o te paratarafa piti i te api 513 e te maha o te paratarafa i te api 515. Eaha ta te mau tuahine no te sotaiete tauturu e nehenehe e rave no te faatupu i te mau ohipa maitai i rotopu i te mau taata o tei mau i te autahu‘araa? Eaha ta te mau taata tei mau i te autahu‘araa e nehenehe e rave no te turu i te mau tuahine no te sotaiete tauturu i roto i ta ratou ohipa?
A tai‘o i te paratarafa e haamata i te hopea o te api 515. Eaha ta tatou e nehenehe e haapii mai na roto i teie faahitiraa parau no ni‘a i te mau hopoi‘a e te mau rave‘a a te tuahine tata’itahi?
Ua faaara te peropheta eiaha e «faaamu i ni‘a i te mau hape a vetahi ê » (api 516). I to outou feruriraa eiaha te auraa o te reira parau? Nahea teie huru e nehenehe ai e haamarirau i te mau tautooraa a te sotaiete tauturu—aore râ te hoê pŭpŭ autahu‘araa aore râ pŭpŭ i roto i te Ekalesia? Eaha ta tatou e nehenehe e rave no te faaamuraa i te mau mamoe a te Fatu eiaha râ e faaamu ia tatou i ta ratou mau hape?

Te mau papa‘iraa mo‘a; Maseli 31:10–31; 1 Korinetia 13:8; PH&PF 25:1–16; 88:125