Te pahonoraa i te hamani-ino-raa ma te faaroo e te itoito

« Ua faahaerehia mai te hamani-ino-raa i ni‘a iho ia tatou i tera taime e tera taime… mai te mau haruru patiri no ta tatou haapa-‘oraa faaroo ».³

« Tei mua te mau tumu parau no ta tatou haapa‘oraa i te ao nei e ua ineine i te titorotorohia e te taata ato‘a, e ua ite tatou e ua tupu mai te mau hamani-ino-raa ato‘a i to tatou mau hoa na roto i te mau pariraa [faahaparaa haavare] e te mau tatararaa hape tei ore i niuhia i roto i te parau mau e te parau-ti‘a. Ua faaoroma‘i tatou i teie nei hamani-ino-raa mai te tahi ê atu mau ekalesia a haamata ai ratou ».⁴

« No reira eiaha e maere, mai te mea e hamani-ino-hia outou; a haamana‘o râ i te mau parau a te Faaora: « Aore te tavini i hau i to’na ra Fatu. I hamani ino na ratou ia‘u ra, e hamani ino ato‘a ïa ratou ia outou’ [a hi‘o Ioane 15:20]; e te mau ati ato‘a ta te feia mo‘a e farii, ei faatupuraa ïa i te mau parau ta te mau peropheta i parau mai te matamua mai â o te ao nei ».⁵

« Ia rave ana‘e au mai te maraa ia‘u—ia rave ana‘e au i te maitai rahi, i reira ïa te mau mana‘o ino roa‘e e ti‘a mai ai i mua ia‘u… E ore roa te mau enemi o teie nei nunaa e paruparu i roto i ta ratou hamani-ino-raa i te Ekalesia, e tae noa’tu i to ratou poheraa. Te ti‘aturi nei au e e hohora mai ratou i te mau mea ato‘a mai te au i to ratou mana no te haavî e no te aro mai ia‘u, e e tama‘i rahi e te roa te tupu i rotopu ia tatou e o ratou. O oia o te aro i te hoê aroraa Keresetiano mau i te mau mea ino o teie tau hopea nei e ite tamau noa ïa oia i mua ia’na te mau taata ino e te mau melahi no te diabolo, e te mau mana pouri no hade o te aro mai ia’na. Ia pato‘i ana‘e te mau taata ino e te viivii, teie ïa te hoê tapa‘o no te haavâ mai te mea te aro ra te hoê taata i te aroraa keresetiano. E ao to outou ia pari haavarehia outou i te mau ino e te mau taata, e te tahi atu â; [a hi‘o Mataio 5:11]. E ti‘a anei ia faarirohia te hoê taata ei taata ino, ia faainohia ana‘e oia e te taata? Aita. Mai te mea e ti‘a mai te hoê taata no te pato‘i i te ao o te hara, e nehenehe ia ta’na e ite e e aro mai te mau varua ino e te viivii ato‘a ia’na.

« E riro râ teie nei mau mea no te hoê noa tau poto, e e faatea-ê-hia’tu teie nei mau ati ato‘a ia tatou, mai te mau i to tatou haapa‘o-maitai-raa, e e ore roa tatou e haavîhia e teie nei mau ino. Na roto i te hi‘oraa i te mau haamaitairaa o te oro‘a hiero i te tupuraa, e te rahiraa o te basileia e te parareraa mai tera moana i tera’tu moana, e oaoa ïa tatou e aita tatou i haavîhia e teie nei mau mea maamaa ».⁶

« Ua mana‘ohia e te tahi mau taata e e mauruuru to tatou mau enemi ia pohe au; te parau atu nei râ vau ia outou e i to ratou ihoa haamaniiraa i to‘u nei toto e hiaai ato‘a ai ratou i te toto o te mau taata ato‘a e aau to ratou i reira e vai ai te hoê noa‘e pura no te varua o te îraa o te evanelia. Ua tura‘ihia te pato‘iraa a teie nei mau taata e te varua no te enemi i te mau parau-ti‘a ato‘a. E ere noa no te haamou ia‘u, no te haamou ra i te mau tane e te mau vahine ato‘a o te ti‘aturi hua i te mau haapiiraa ta te Atua ia faaurû ia‘u ia haapii i teie nei u‘i ».⁷

« Ua haapii mai au e na roto i te ohipa o tei tupu, e eita te enemi o te parau mau e taoto, eita ato‘a oia e faaea i ta’na mau tautooraa no te faariri i te mau mana‘o o te mau taata i te mau tavini a te Fatu, na roto i te faatupuraa i te riri o te taata i ni‘a i te mau mea faufaa rahi aore râ te mau mea e anaanataehia ».⁸

« E te feia mo‘a ato‘a! a fana‘o na i teie nei taviri faufaa rahi— e i roto i ta outou ato‘a mau tamataraa, mau pe‘ape‘a, mau faahemaraa, mau ati, mau faatîtîraa, mau tape‘araa e te pohe, a ara, ia ore outou e huna i te ra‘i; ia ore outou e huna ia Iesu Mesia; ia ore outou ia huna i te mau taea‘e; ia ore outou ia huna i te mau heheuraa a te Atua, i roto anei i te Bibilia, te Buka a Moromona, aore râ te Parau Haapiiraa e te mau Parau Fafau, aore râ i te mau mea ato‘a o tei horo‘ahia aore râ o te horo‘ahia mai e o tei heheuhia mai i te taata i roto i teie nei ao aore râ i te mea o te tae mai. Oia, i roto i ta outou ato‘a mau tueraa e mau aroraa, a ara e ia ore outou e rave i teie nei ohipa, oi iteahia’i te toto hara ore i ni‘a iho i to outou mau ahu, e ia haere atu oia i hade ra »⁹

I te tau mahanahana no te matahiti 1830 ua hamani-ino-hia te feia mo‘a no te nene‘i-raa-hia te Buka a Moromona: « Ua nene‘ihia te Buka a Moromona (te raau a Iosepha i roto i te rima a Epharaima) tau taime i teie nei, e mai ta te peropheta tahito ra i tohu, ‘ua faarirohia te reira ei mea huru ê’ [a hi‘o Hosea 8:12]. Ua tupu te hoê arepurepuraa rahi na roto i to’na nene‘i-raa-hia. Ua apee te pato‘iraa rahi e ua rahi te hamani-ino-raa i te feia tei ti‘aturi i te parau mau o te buka. Ua tae râ i te taime e ua tupu mai te parau mau no roto i te fenua, e ua hi‘o mai hoi te parauti‘a mai te ra‘i mai [a hi‘o Salamo 85:11; Mose 7:62], no reira, eita matou e măta‘u i to matou mau enemi, ua ite matou e tei to matou ra pae te parau mau e te parau-ti‘a, e tei ia matou ra te Metua e te Tamaiti, no te mea tei ia matou ra te mau haapiiraa a te Mesia, e te haapa‘o nei matou i te reira; e no reira ua tamau matou i te poro e i te haamaramarama i te taata ato‘a o te hinaaro i te faaroo ».¹⁰

I te ava‘e tiurai 1839, ua papa‘i o Wilford Woodruff: « Ua paraparau poto noa mai o Iosepha ia matou i te na-ô-raa e, ‘a haamana‘o, e te mau taea‘e, e mai te mea e tape‘ahia outou i te fare auri, ua tape‘ahia te taea‘e Iosepha i te fare auri na mua ia outou. Mai te mea e tuuhia outou i te vahi e nehenehe noa ta outou e ite i to outou mau taea‘e na roto noa i te mau auri o te hoê haamaramarama a tape‘ahia’i outou i te fare auri no te evanelia a Iesu Mesia, a haamana‘o e ua na reira ato‘a mai te taea‘e Iosepha’ ».¹¹

I te matahiti 1841, ua papa‘i o Iosepha Semita e to’na na tauturu i roto i te Peresideniraa Matamua: « Ua ti‘a noa te parau mau, mai te tumu raau pautuutu, ma te tuino-ore-hia i rotopu i te mau mea e mârô nei, tei topa’tu i ni‘a iho ia’na ma te puai u‘ana. Ua tahe te mau pape pu‘e, te are i muri i te are, ma te vitiviti, e aita i horomii i te reira. ‘Ua faateitei ratou i to ratou reo, e te Fatu; ua faateitei te mau pape i to ratou reo; E puai rahi to Iehova Sabaota i te mau are rahi o te miti ra’ [a hi‘o Salamo 93:3–4]; aita’toa i noaa i te mau auahi no te hamani-ino-raa e te mana ato‘a o te mau taata ino i te haamou i te reira; mai te pu aihere a Mose, ua ti‘a noa ïa aore i pau, e i teie nei i teie nei taime te hohora nei te reira i te hoê hi‘oraa i te taata e te mau melahi.

« I hea tatou e nehenehe ai e fariu i to tatou mau mata no te hi‘o te tahi e te tahi? Te ite nei tatou i te hoê nunaa tei farii i te hoê faanahoraa faaroo, o tei ore e auhia e te taata, e na te amuiraa’tu i te reira haapa‘oraa faaroo i afai mai i ni‘a iho ia ratou te mau hamani-ino-raa tamau. Te hoê nunaa, no to ratou here i te Atua e no to ratou atiraa’tu i Ta’na ra parau, o tei pohe i te po‘ia, tei vai tahaa-noa-raa, te mau ati, e ua fatata te mau faaereraa ato‘a. Te hoê nunaa, no te maitai o ta ratou haapa‘oraa faaroo, o tei oto i te pohe vitiviti o te mau metua, o te mau tane faaipoipo, o te mau vahine faaipoipo, e o te mau tamarii no ta ratou ra haapa‘oraa faaroo. Te hoê nunaa tei ma‘iti i te pohe eiaha râ te faatîtîraa e te haavare, tei tape‘a au noa i to ratou huru taata, e tei ti‘a ma te paari e te aueue ore i roto i te mau tau tamataraa i te aau o te taata ».¹²

A tape‘ahia’i oia i te fare auri no Liberty, ua papa‘i o Iosepha Semita i te feia mo‘a: « Eiaha e mana‘o e te paruparu nei to matou aau, noa’tu e au ra e ua roohia matou i te tahi mea ê [a hi‘o 1 Petero 4:12], no te mea ua ite matou e ua faaitehia mai teie nei mau mea ato‘a na mua‘e, e te tia‘i nei matou i te hoê ti‘aturiraa maitai atu i te ti‘aturiraa a to matou feia hamani ino. No reira i haapaari ai te Atua ia matou ia maraa ia matou te hopoi‘a. Te oaoa nei matou i roto i to matou ati, no te mea te ite nei matou e tei piha‘i iho te Atua ia matou, e o Oia to matou nei hoa, e e faaora Oia i to matou mau varua. Eita matou e măta‘u i tei taparahi mai i te tino; eita râ to matou varua e pohe ia ratou [a hi‘o Mataio 10:28]. Aita matou e ani nei i te mau maitai no ô mai i te rima o te taata ino, aita ato‘a i to te ao, aore râ i te diabolo, aita ato‘a i to’na mau ti‘a faahapa, e ia ratou o tei here e o tei rave e o tei parau i te parau haavare, no te rave ê atu i to matou nei mau ora. Aita roa’tu matou i huna i to matou mau mana‘o mau e eita ato‘a matou e na reira no te faaora i to matou mau oraraa… Te ite nei matou e ua tutava matou ma to matou aau, ma to matou mana e ma to matou puai ato‘a ia rave i te hinaaro o te Atua, e i te mau mea ato‘a Ta’na i faaue ia matou…

« …Ua parau te Faaora, ‘e tupu mai ihoa te mau mea e hapa‘i ra, e ati ra to ratou o te faatupu i te mea e hapa‘i’ [A hi‘o Mataio 18:7]. E faahou â, ‘e ao to outou ia faaino mai, e ia hamani ino mai, e ia pari haavare noa mai te taata ia outou i te mau ino ato‘a nei, no‘u; a oaoa, e ia ou‘au‘a noa i te oaoa, e utua rahi hoi ta outou i te ao ra, i na reira hoi ratou i te hamani ino i te mau peropheta ra, o mua ïa ia outou’[Mataio 5:11–12].

« I teie nei, e au mau taea‘e here e, mai te mea te vai nei te tumu no te taata ia titau i teie nei fafauraa, o tatou ïa te mau taata; no te mea ua ite tatou e aita te ao i au ore noa ia tatou, ua parau ato‘a râ ratou i te parau haavare no tatou, no te mea aita’tu e tumu i tutava ai tatou i te haapii i te îraa o te Evanelia a Iesu Mesia…

« E i teie nei, e au mau taea‘e here e—e ia parau ana‘e matou e mau taea‘e, te parau nei ïa matou ia ratou tei tamau noa i roto i te faaroo i te Mesia, te mau tane, te mau vahine e te mau tamarii—te hinaaro nei matou i te tiaoro atu ia outou i te i‘oa o te Fatu ra ia Iesu Mesia, ia puai i roto i te faaroo i roto i te fafauraa apî e te mure ore, ma te măta‘u ore i to tatou mau enemi… A tape‘a noa e tae atu i te pohe; no te mea ‘o tei hinaaro hoi i te tape‘a i to’na ora, e ere ïa i te ora; e o tei ti‘a ia’na i te tuu i to’na ora ia‘u e te Evanelia nei, e ora ïa to’na’ te parau maira o Iesu Mesia [a hi‘o Mareko 8:35].¹³

Mai roto ato‘a mai i te fare auri no Liberty, ua papa‘i te peropheta i to’na na tauturu i roto i te Peresideniraa Matamua i te feia faatere o te Ekalesia: « E au mau taea‘e, eiaha e măta‘u, a faaea puai râ i roto i te Fatu e i roto i te mana o to’na ra puai. E aha hoi te taata e măta‘u ai te tavini a te Atua ia’na, aore râ te Tamaiti a te taata e rurutaina ai te tavini a te Atua i mua ia’na? Eiaha e mana‘o e e mea huru ê te mau tamataraa u‘ana ta matou e faaruru nei, e au ra ua roohia matou e te tahi mea ê. A haamana‘o e ua farii te taato‘araa i te hoê â mau ati. [A hi‘o 1 Petero 4:12–13.] No reira, a oaoa i roto i to tatou mau ati, na roto hoi i te reira outou e haamaitaihia’i e na roto hoi i te reira te tumu o to tatou nei ora i haamaitai-ato‘a-hia’i. [A hi‘o Hebera 2:10]. Ia tamahanahanahia to outou aau e te aau o te feia mo‘a ato‘a na roto ia outou, e ia ou‘au‘a noa i te oaoa, e utua rahi hoi ta outou i te ao ra, i na reira hoi ratou i te hamani-ino-raa i te mau peropheta ra, o mua ïa ia tatou [a hi‘o Mataio 5:11–12]».¹⁴