Te orama matamua: To te Metua e te Tamaiti fâraa ia Iosepha Semita

Iospeha Semita—Aamu 1:5, 7–13: « Ua tupu te mârôraa rahi no ni‘a i te pae faaroo i te vahi ta matou e parahi ra. Ua haamatahia te reira i roto i te haapa‘oraa Metodi, e aita i maoro ua tupu ato‘a te reira i roto i te mau faaroo ato‘a o taua fenua ra. Ua arepurepu hoi te taato‘araa o te mataeinaa, e e rave rahi te taata tei amui atu i taua mau pŭpŭ faaroo ĕê ra.Ua tupu te amahamaha i rotopu i te taata e ua tuo noa te tahi pae i te na ôraa e, « Inaha, teie! » e te tahi atu pae, « Inaha, tei ŏ! » Te mârô ra te tahi pae no te faaroo Metodi, e te tahi pae no te faaroo Perebiteriana, e te tahi pae no te faaroo Bapetizo.

« Hoê ahuru ma pae matahiti to‘u i taua taime ra. Ua faafariuhia te utuafare o to‘u metua tane i te faaroo Perebiteriana, e e maha ratou o tei amui atu i taua ekalesia ra, oia hoi, to‘u metua vahine o Lucy to‘u na tuaana o Haeramu e o Samuela Harisson, e to‘u tuahine o Sophoronia.

« I roto i taua taime aehuehu rahi ra, ua tupu te fifi i roto i to‘u mana‘o. Noa’tu râ te huru o teie mau mana‘o hohonu e te papû i tera taime e tera taime, aita vau i amui atu i taua mau pŭpŭ taata ra. Ua haere pinepine râ vau i ta ratou mau pureraa. I muri rii mai, ua au vau i te haapa‘oraa Metodi e ua huru hinaaro vau ia amui atu ia ratou. No te tahi râ o te mârôraa e te mau pe‘ape‘a i roto i taua mau haapa‘oraa ĕê ra, e mea fifi roa ïa na te hoê taata apî mai ia‘u, o tei ore i mâtau i te taata e te huru o te mau mea, ia ite papû e, o vai tei ti‘a e o vai tei hape.

« Ua fifi roa to‘u mana‘o i te tahi mau taime; te tuoraa e te maniania, ua haere roa ïa i te rahiraa e te tuutuu ore. Ua au ore roa te feia Perebiteriana i te feia Bapetizo e te feia Metodi, e ua faaohipa ratou i te mau huru mârôraa e te parau aravihi ato‘a no te faaite papû i to ratou mau hapa, e aore râ no te faaite i te mau taata e mea hape ratou. E oia ato‘a, ua itoito te Feia Metodi e te feia Bapetizo i te imiraa i te rave‘a ia fariihia ta ratou haapiiraa e ia faahapahia ta te tahi atu pae.

« I rotopu i taua mau aroraa parau ra e te maniania no te faaiteraa i te mana‘o, ua parau pinepine au ia‘u iho e; Eaha ra ïa te rave? O vai tei tano i roto i taua mau pŭpŭ ato‘a ra; e aore râ, ua hape anei ratou paato‘a? Mai te mea ua tano te hoê o ratou, o te hea ïa, e nafea vau e ite ai i te reira?

« A faaea teimaha noa ai au i raro a‘e i te mau fifi rahi i faatupuhia e te mârôraa a taua mau pŭpŭ faaroo ra, te tai‘o ra vau, i te hoê mahana, i te Episetolo a Iakobo, pene hoê e te irava pae, o tei na ô mai e: Te ere ra râ te hoê o outou te ite, e ani oia i te Atua ra, o tei horo‘a hua mai i te maitai i te taata ato‘a ra, ma te pato‘i ore; e e horo‘ahia mai ta’na.

« Aita roa â te hoê papa‘iraa mo‘ a i ô ma te puai rahi a‘e i roto i te aau o te taata nei, mai to teie nei irava i ô mai i roto i to‘u nei aau. Ua ô mai te reira ma te puai rahi i roto roa i to‘u nei aau. Ua feruri pinepine noa vau i te reira, e ua ite au e mai te mea e faufaahia te hoê noa a‘e taata i te ite no ŏ mai i te Atua ra, o vau ïa. Aita hoi au i ite i te mea ti‘a ia rave, e ia ore to‘u ite ia faarahihia, e ore roa ïa vau e ite. E mea ê te tatararaa a te mau orometua o taua mau haapa‘oraa ĕê ra no ni‘a i te mau irava i roto i te papa- ‘iraa mo‘a, na te reira i haamou i to te mau taata ti‘aturi i roto i te Bibilia no te faaafaro i te fifi.

« I te pae hopea, ua faaoti au e mea ti‘a ia‘u ia parahi noa i roto i te poiri e te papû ore e aore râ ia haapa‘o i ta Iakobo i faaite mai, oia hoi, ia ani i te Atua. I te hopea, ua faaoti au ia « ani i te Atua », e mai te mea e horo‘a oia i te ite ia ratou tei ere i te ite, e e horo‘a hua mai hoi ma te pato‘i ore, e tamata ihoa ïa vau ».⁴

Iosepha Semita—Aamu 1:14–16: « No reira, mai te au i ta‘u faaotiraa ia ani i te Atua, ua haere atura vau i roto i te uru raau no te tamata. E poipoi ïa te reira no te hoê mahana nehenehe e te ata ore, i te haamataraa no te tau mahanahana o te matahiti 1820. O te taime matamua te reira i roto i to‘u nei oraraa a tamata’i au i te reira, no te mea, i rotopu i to‘u mau mana‘o tapitapi, aita e â vau i tamata i te pure vaha.

« I muri a‘e i to‘u taeraa’tu i te vahi ta‘u i mana‘o, ua hi‘o haaati au ia‘u, e no te mea o vau ana‘e to reira, ua tuturi ihora vau i raro e ua haamata i te pûpû atu i te hinaaro o to‘u aau i mua i te Atua. Aita vau i maoro i te na reiraraa, ua haruhia vau e te hoê mana tei hau a‘e i to‘u, e no te puai o taua mana ra i ni‘a iho ia‘u, ua tape‘a-roa-hia to‘u arero e aita ta‘u e nehenehe ia parau faahou. Ua faaati-roa-hia vau e te poiri ta‘ota‘o, e ua mana‘o vau e e haamou-roa-hia vau.

« Area râ, ua faaitoito noa vau na roto i to‘u puai ato‘a ia tiaoro atu i te Atua ia faaora ia‘u i te mana o teie nei enemi tei haru mai i‘au; e i te taime mau ta‘u i mana‘o e ua fatata vau i te haamouroa- hia—e ere hoi i te haamouraa mana‘o noa, i te mana ra o te hoê varua mau no roto mai i te hoê ao ê, e tei ia’na te mana maere rahi roa tei ore â i itehia e au i roto i te hoê noa’tu taata—I taua taime măta‘u rahi ra, ua ite atura vau i te pou maramarama i te faaatiraa i ni‘a noa a‘e i to‘u upoo, e ua pou maira te reira i ni‘a iho ia‘u. Ua hau atu hoi to te reira maramarama i to te mahana.

Iosepha Semita—Aamu 1:17–20: « I te taeraa mai te reira maramarama, ua tuuhia vau e taua enemi i tape‘a ia‘u. I te ma‘iriraa taua maramarama ra i ni‘a iho ia‘u, ua ite atura vau e piti taata; to raua teatea e te hanahana a ti‘a noa’i raua i ni‘a a‘e ia‘u i roto i te reva ra, e ore roa ïa e ti‘a ia faaauhia i te hoê noa’tu mea. Ua parau maira te hoê o raua ia‘u, ma te faatoro atu i to’na rima i ni‘a i te tahi, e ma te faahiti i to‘u i‘oa, i te na ôraa mai e: « O Ta‘u Tamaiti Here Teie. A faaroo Ia’na! »

« Te tumu vau i haere atu ai e ui i te Fatu, oia hoi, ia ite au e, o tei hea râ i rotopu i taua mau haapa‘oraa ato‘a ra te haapa‘oraa mau, e ia ite au e o tei hea ta‘u e amui atu. No reira, i to‘u hoiraa i to‘u ihora huru mau, e ua nehenehe faahou ia‘u ia paraparau, ua ani atura vau i teie na taata te ti‘a ra i ni‘a a‘e ia‘u i roto i te maramarama, e o tei hea te haapa‘oraa mau i roto i te mau haapa‘ oraa ato‘a (no te mea i taua taime ra aita roa’tu i puta noa‘e i roto i to‘u aau e e mea hape ana‘e ratou paato‘a)—e o tei hea hoi ta‘u e amui atu.

« Ua pahonohia maira vau e, eiaha roa vau e amui atu i te hoê noa’tu o ratou no te mea e mea hape ana‘e ratou; ua parau faahou maira oia o tei pahono mai i ta‘u uiraa, na ô maira e, e mea ino rahi ta ratou mau haapa‘oraa i mua ia’na; e mea ino ana‘e to ratou mau taata maramarama. « Te haafatata mai nei ratou ia‘u i to ratou ra mau utu, tei te atea ê râ to ratou aau ia‘u nei; te haapii ra ratou i te parau i tuuhia mai e te taata ana‘e ei parau mau. E huru paieti to ratou, ua huna râ i te mana mau no te reira ».

« Ua opani faahou maira oia ia‘u eiaha ia amui atu ia ratou; e e rave rahi atu â te mau mea ta’na i parau mai ia‘u, o te ore e nehenehe ia‘u ia papa‘i i teie taime. I to‘u hoiraa mai i to‘u ihora huru mau, ua ite au e, te tiraha ra vau ma te hi‘o ti‘atu i ni‘a i te ra‘i. I te revaraa’tu o te maramarama, aita to‘u e puai; aita râ i maoro, ua huru maitai au, e ua hoi au i te fare. A ti‘a noa’i au i te pae auahi, ua ui maira to‘u metua vahine e eaha te pe‘ape‘a. Pahono ihora vau e, « eiaha e pe‘ape‘a, e mea maitai te mau mea ato‘a—e mea maitai au ». I reira vau i parau atu ai i to‘u metua vahine e, « ua ite au iho e, e ere te faaroo Perebiteriana i te faaroo mau ». E au e, ua ite te enemi, i to‘u apîraa e, e riro ihoa vau ei haapeapea e ei tafifi i to’na basileia; ahiri aita, eaha te mau mana o te poiri i tama‘i amui noa mai ai ia‘u? Eaha te tumu vau i pato‘ihia’i e i hamani-ino-hia’i i to‘u apî-roa-raa?⁶

Iosepha Semita—Aamu 1:21–26: « I na mahana rii i muri mai i to‘u iteraa i teie nei orama, ua farerei au i te hoê orometua Metodi, e taata itoito hoi oia i roto i te ohipa mârôraa evanelia, mai ta‘u i faaite i ni‘a nei, e i to‘u paraparauraa ia’na no ni‘a iho i te parau no te evanelia, ua faaite atura vau ia’na i te mau mea ta‘u i ite i roto i taua orama na‘u. I reira, ua maere roa vau i to’na huru; ua faariro oia i ta‘u mau parau ei mea faufaa ore roa, e ua parau maira oia e, na te diabolo ana‘e taua mau mea ra e aore e orama faahou e aore ato‘a e heheuraa i teie mau mahana, ua hope ana‘e te reira mau mea i te tau no te mau Aposetolo, e aore roa taua mau mea ra e tupu faahou.

« Ua ite oi‘oi râ vau e, no to‘u faaiteraa i taua mau parau ra, ua faahapa puai mai te mau orometua o taua mau faaroo ra ia‘u, e o te tumu hoi te reira no te hamani-ino-raa rahi tei tupu noa i te rahi. Noa’tu e tamaiti mâtau-ore-hia vau i ropu i te ahuru ma maha e te ahuru ma pae o to‘u matahiti, e noa’tu aita te huru o to‘u oraraa i faariro ia‘u ei taata ite-maitai-hia i roto i teie nei ao, noa’tu te reira, te vai ra te tahi mau taata ti‘araa teitei tei hi‘o mai ia‘u e ua faatupu ratou i te riri o te taata i ni‘a iho ia‘u e te hamaniino- raa rahi. Mai te reira te huru o te mau faaroo ato‘a, ua tahoê ratou no te hamani ino mai ia‘u.

« Ua maere pinepine au mai te reira taime, i te mea e, e tamaiti itea-ore-hia vau e te taata, hoê ahuru ma maha e tiahapa noa iho to‘u matahiti, e aore hoi e faufaa ta‘u no te oraraa maori râ na roto i te rave-noa-raa i te ohipa, area râ, i roto i te mata o taua mau taata rarahi no taua mau haapa‘oraa roo maitai ra, e au e, e taata rahi au, i tupu ai i roto ia ratou te varua hamani ino puai roa, e te varua faahapa. Noa’tu ra, e mea maere ïa, o te reira ihoa ïa te huru, e na te reira i faatupu pinepine i to‘u oto rahi.

« Area râ, oia mau roa, ua ite au i te orama. Ua mana‘o iho nei au e, ua riro vau mai ia Paulo i roto i to‘u ra feruriraa a paruparu ai oia ia’na iho i mua i te Arii ra ia Ageripa. Ua faaite atu Paulo i te orama ta’na i farii, i to’na iteraa i te maramarama e i to’na faarooraa i te reo; e mea iti roa ra te taata tei ti‘aturi ia’na. Na ô mai ra te tahi pae, e haavare ïa; na ô maira te tahi pae, e maamaa to’na. Ua atahia oia, e ua faainohia oia. Aita roa râ te reira i faaore i te orama ta’na i ite ra. I ite na oia i te orama, ua papû roa te reira ia’na, e aore roa te taato‘araa o te hamani-ino-raa i raro a‘e i te ra‘i e faaore i te reira. E noa’tu e hamani ino paha ratou ia’na e tae noa’tu ua pohe oia, ua ite oia, e e ite oia e tae noa’tu i to’na hutiraa aho hopea, e ua ite oia i te maramarama, e ua faaroo ato‘a i te reo i te parauraa mai ia’na, e aore roa te mau mea ato‘a o teie nei ao e faahuru ê i to’na feruriraa.

« Oia ato‘a ïa ia‘u nei. Ua ite mau vau i te maramarama, ei roto i taua maramarama ra, ua ite au na taata toopiti, e ua paraparau mai ihoa raua ia‘u; e noa’tu ua au-ore-hia vau, e ua hamani-inohia vau no te mea ua parau vau e, ua ite au i te orama, e parau mau ihoa ïa. E a hamani ino mai ai ratou ia‘u, e a faahapa haavare mai ai ratou ia‘u no to‘u parauraa i te reira, ua parau vau i roto i to‘u aau e: Eaha ratou e hamani ino mai ai ia‘u no to‘u faaiteraa i te parau mau? Ua ite mau vau i te orama, e o vai hoi au e ti‘a’i ia‘u ia pato‘i i te Atua? Eaha to te ao nei i mana‘o ai e, e huna vau i ta‘u i ite mata? No te mea, ua ite mau vau i te orama. Ua papû te reira ia‘u, e ua papû ato‘a ia‘u e, ua ite te Atua i te reira, e aita e nehenehe ia‘u ia huna i te reira. Ua papû ia‘u e, na roto i to‘u hunaraa i te reira, e faariri au i te Atua e faahapahia vau e ana.

« Ua papû ia‘u to‘u feruriraa i teie nei no ni‘a i te mau haapa- ‘oraa o te ao nei, oia hoi, e ere ïa i te mea ti‘a ia amui atu i te hoê noa’tu o ratou, ia haere noa râ i to‘u haerea e tae noa’tu ua parau-faahou-hia vau. Ua ite au e, e parau mau te parau faaite a Iakobo ra e, te taata tei ere i te ite, e nehenehe ta’na ia ani i te Atua, e roaa ia’na te ite, ma te pato‘i-ore-hia ».⁷