Eliaha e te faahoi-raa-hia mai o te mau taviri no te taatiraa

« Nahea râ ïa te Atua e haere mai e faaora i teie nei u‘i? E tono mai ïa Oia ia Eliaha te peropheta ».

No roto mai i te oraraa o Iosepha Semita

I te haamataraa no te tau mahanahana i te matahiti 1836, i muri a‘e e toru matahiti i te haaraa e te faatusiaraa, ua ite te feia mo‘a no te Ketelani te hopearaa no te paturaa no ta ratou hiero nehenehe, te hiero matamua i roto i teie nei tau tuuraa evanelia. I te sabati, 27 no mati, hau atu i te 900 taata tei haaputuputu mai i roto i te fare pureraa no te hiero e te vahi fariiraa no te oro‘a haamo‘araa. E rave rahi atu mau taata tei ruru i roto i te hoê oro‘a i roto i te hoê piha haapiiraa i piha‘i iho noa, a faaroo noa’i te tahi atu mau taata i rapae atu i te mau haamaramarama iritihia no te hiero. Ua tauturu te peropheta iho i te haaparahiraa i te mau melo tei tae mai.

Ua faaroo te amuiraa i te hoê a‘oraa a Sidney Ridgon, te hoê tauturu i roto i te Peresideniraa Matamua, e ua himene amui a‘era « oaoa tatou i te tau no te ora » e « Adamu-Onidi-Ahamana », tei papa‘ihia e William W. Phelps. Ua ti‘a a‘era o Iosepha Semita i ni‘a no te horo‘a i te pure haamo‘araa, ta’na i farii na roto i te heheuraa. I roto i te pure, ua faaite oia i te mau haamaitairaa faahiahia e rave rahi e tae mai i ni‘a i te feia o te haere mai ma te parau-ti‘a i te mau hiero a te Atua (a hi‘o PH&PF 109). Ua himene te pŭpŭ himene « Auê te Varua o te Atua », ua ti‘a a‘era te amuiraa i ni‘a e ua tuo ihora i te pii hosana « ma te puai rahi e au ra e nava‘i no te amo i te tapo‘i fare i ni‘a ».¹

« Ua parau te peropheta i roto i te pure haamo‘araa « a tuu mai ia faaîhia to oe fare nei, mai te mata‘i farara puai ra, i to oe hanahana na » (PH&PF 109:37). Ua tupu mau ihoa te reira, no te mea ua faaite e rave rahi feia mo‘a e ua parahi mai te mau taata no te ra‘i mai i roto i te oro‘a haamo‘araa. Ua haamana‘o o Eliza R. Snow: « E nehenehe paha te mau oro‘a no taua haamo‘araa ra e faati‘ahia, aita râ e reo tahuti e nehenehe e faaite i te mau faaiteraa no te ra‘i no taua mahana faahiahia ra. Ua fâ mai te mau melahi i te tahi, a itehia’i te mana o te Atua e te feia ato‘a i reira, e ua î te mau aau ato‘a ‘i te oaoa eita e ti‘a ia parau e te î hoi i te hanahana’[a hi‘o 1 Petero 1:8] ».²

I taua aru‘i ra, a putuputu ai te peropheta e fatata e 400 taata tei mau i te autahu‘araa i roto i te hiero, « ua faaroohia te hoê maniania mai te haruru o te hoê mata‘i farara puai, tei faaî i te hiero, e ua ti‘a amui ihora te amuiraa i ni‘a, mai tei tura‘ihia e te hoê mana ite-ore-hia e te mata ». Mai te faaiteraa a te peropheta, « ua haamata e rave rahi i te parau na roto i te mau reo ĕê e i te tohu; ua ite te tahi i te mau orama hanahana; e ua ite au i te hiero tei î i te mau melahi, te mea ïa ta‘u i parau atu i to te amuiraa ».³

I roto i te hoê pureraa tei tupu i roto i te hiero hoê hepetoma i muri iho, i te Sabati, 3 no eperera, ua tupu mai te mau orama faufaa rahi roa. I muri a‘e i to te peropheta tautururaa i te tahi atu feia faatere no te Ekalesia i te faatereraa i te oro‘a, ua haere atu oia e o Oliver Cowdery i te fata i muri mai i te mau paruru tei faatopahia e tuturi ihora i roto i te pure mo‘a. A ti‘a mai ai raua i ni‘a i muri a‘e i te pure, ua faaite mai te Faaora Ia’na iho ia raua e ua faaite i To’na fariiraa i te hiero: « No te mea inaha, ua farii au i teie fare nei, e e vahi hoi to‘u i‘oa i ô nei; e e faaite au ia‘u iho i ta‘u mau taata na roto i te aroha i roto i teie fare nei » (PH&PF 110:7).

I muri iho i te opaniraa o teie nei orama, ua ite o Iosepha e Oliver i na orama e toru taa ê maitai i reira te mau peropheta tahito fâraa’tu ia raua no te faahoi mai i te mau taviri titauhia no te ohipa a te Fatu i te mau mahana hopea nei. Ua fâ mai te peropheta Mose e ua horo‘a ia raua « te mau taviri no te haaputuputuraa o Iseraela mai te na tuhaa e maha o te ao nei », e ua haere mai o Elia e ua horo‘a ia raua « te tau tuuraa no te evanelia a Aberahama » (a hi‘o PH&PF 110:11–12)

I muri iho i roto i te tahi atu orama ua ite atu o Iosepha e o Oliver i te peropheta Eliaha (A hi‘o PH&PF 110:13–16). No te faufaa rahi o te taeraa mai o Eliaha e te faahoiraa mai i teie nei mana taati i tohu ai o Malaki no ni‘a i te reira e mau tenetere na mua’tu, e ua tapiti te Faaora i te tohuraa i te mau Ati Nephi e ua faaue ia ratou ia papa‘i i te reira (a hi‘o Malaki 4:5–6; 3 Nephi 25:5–6; 26:1–2). Ua haere mai oEliaha e ua horo‘a ia Iosepha e Oliver te mau taviri no te taatiraa—te mana no te taati e no te haamana i te ra‘i te mau oro‘a ato‘a tei ravehia i ni‘a i te fenua nei. E mea titauhia te faahoiraa mai o te mana taati no te faaineine i te ao no te tae-piti-raa mai o te Faaora, no te mea ahiri aita, « e hope roa te fenua i te faainohia i to’na taeraa mai » (Iosepha Semita—Te Aamu 1:39)

Te mau haapiiraa a Iosepha Semita

Ua faaite atea te peropheta tahito o Malaki i te taeraa mai o Eliaha

Ua parau te peropheta Semita i teie nei mau parau no ni‘a i to Moroni haereraa’tu e farerei ia’na i te pô no te 21 no tetepa 1823, mai tei papa‘ihia i roto i te Iosepha Semita—Te Aamu 1:36–39: « Ua faahiti mai o [Moroni] na mua i te hoê tuhaa o te pene toru o te Malaki, e oia ato‘a i te pene maha, oia hoi te pene hopea o te reira ihoa tohu ra, area râ ua huru ê rii te faahitiraa i to tei papa‘ihia i roto i ta tatou nei Bibilia. Aita oia i faahiti i te irava matamua mai tei papa‘ihia i roto i ta tatou mau buka; ua na ô maira oia:

« Inaha hoi, te fatata maira te mahana mai te umu ra i te amaraa, e te feia ato‘a i te‘ote‘o ra e te feia ato‘a i rave i te parau ino ra e ama ïa mai te aihere ra; e na ratou o te haere mai ra e tutu‘i ia ratou, te na reira maira te Fatu Sabaota ra, e ore e faatoehia te tumu e te amaa ato‘a ra.

« Ua faahiti ato‘a mai oia i te irava pae, i te na-ô-raa e; Inaha, e tuu atu vau i te autahu‘araa ia outou na roto i te rima o te peropoheta ra o Eliaha, a tae atu ai i taua mahana rahi măta‘u o te Fatu ra.

« Ua faahiti oia ma te faahuru ê rii i te irava i raro mai: E e tuu hoi oia i roto i te aau o te mau tamarii te mau fafau i faaauhia i to ratou metua, e e fariu hoi te aau o te tamarii i to ratou mau metua. Ahiri aita ra, e hope roa te fenua i te faainohia i to’na taeraa mai ».⁴

Ua fâ atu o Eliaha ia Iosepha Semita e Oliver Cowdery i roto i te hiero no Ketelani

Ua faaiteite mai o Iosepha Semita i te fâraa mai o te peropheta tahito o Eliaha ia’na e Oliver Cowdery i te 3 no eperera 1836, i roto i te hiero no Ketelani tei papa‘ihia i muri iho i roto i te Parau Haapiiraa e te Mau Parau Fafau 110:13–16: « Ua faaitehia mai te tahi orama rahi e te mea hanahana ia maua; no te mea ua ti‘a maira o Eliaha te peropheta, o tei tahitihia’tu i ni‘a i te ra‘i ra ma te ite ore i te pohe, i mua ia maua nei, e ua na ô maira:

« Ianaha, ua tae roa mai te tau, o tei parauhia maira e te vaha o Malaki—o tei faaite mai e e tonohia mai oia [o Eliaha], hou te mahana rahi e te mea hanohano ra o te Fatu e tae mai ai—no te faafariu mai i te aau o te mau metua i te tamarii, e to te mau tamarii hoi i te mau metua, oi ta’irihia mai te ao nei i te hoê ahua ra—no reira, ua tuuahia’tu te mau taviri no teie tau tuuraa i roto i to orua na rima; e na roto i teie e ite ai orua e ua fatata mai te mahana rahi e te mea hanohano o te Fatu ra, oia tei te pae opani ïa ».⁵

Ua faahoi mai o Eliaha i te mau taviri no te taatiraa—te mana e te mana faatere no te haamau i te ra‘i ra te mau oro‘a ato‘a tei ravehia i ni‘a i te fenua nei

« E tono na vau i te peropheta ra ia Elia ia outou na hou te mahana rahi măta‘u o te Fatu, e te tahi atu â. [a hi‘o Malaki 4:5]. No te aha e tono ai ia Eliaha? No te mea ua mau oia i te mau taviri no te mana no te faatere i te mau oro‘a ato‘a no te autahu‘araa, e [ia ore ana‘e] te mana e horo‘ahia, eita te mau oro‘a e nehenehe ia ravehia ma te parau-ti‘a ».⁶

Ua parau te peropheta Iosepha Semita i teie nei mau parau i roto i te hoê rata i te feia mo‘a, tei papa‘ihia i muri iho i roto i te Parau Haapiiraa e te mau Parau Fafau 128:8–11: « Te huru no teie nei oro‘a [te bapetizoraa no te feia pohe] tei roto ïa i te mana no te autahu‘araa, na roto i te heheuraa a Iesu Mesia, i roto i te reira i faati‘ahia e, o ta outou e haamau i te ao nei e haamauato‘a-hia ïa i te ra‘i ra, e o ta outou e haamatara i ni‘a i te ao nei e haamatara-ato‘a-hia ïa i te ra‘i ra…

« E riro paha te feruriraa o te tahi mau taata e mea maerehia te parau haapiiraa ta tatou e parau nei no ni‘a i—te hoê mana o te papa‘i nei e aore râ e haamau nei i ni‘a i te ao nei e o te haamau nei hoi i te ra‘i ra. Teie ra, i roto i te mau tau ato‘a no te ao nei, i te mau tau ato‘a a horo‘a ai te Fatu i te hoê tuuraa autahu-‘araa i te hoê taata na roto i te heheuraa mau, e aore râ i te hoê pupu taata, ua horo‘a-ato‘a-hia mai teie nei mana. No reira, te mau mea ato‘a o ta taua mau taata ra i rave na roto i te mana, i roto i te i‘oa no te Fatu, e ua rave hoi i te reira mai te parau mau e te haapa‘o, e ua tapa‘o hoi i te mau parau-ti‘a e te parau mau no taua ohipa ra, ua riro hoi te reira ei ture i ni‘a i te ao nei e i te ra‘i ra, e e ore roa e ti‘a ia faaorehia, mai te au i te mau faaueraa mana a Iehova rahi. E parau mau roa teie nei parau. O vai te ti‘a ia faaroo i te reira?

« E teie faahou â, no te hi‘oraa no mua ra, Mataio 16:18,19: E te parau ato‘a’tu nei au ia oe, o Petero oe, e ei ni‘a iho i teie nei păpă e patu ai au i tau ekalesia; e e ore roa ïa e noaa i te uputa o hade. E e horo‘a’tu hoi au i te mau taviri o te basileia o te ao ra ia oe, e te mau mea ato‘a ta oe haamau i ni‘a i te ao nei e haamau-ato‘a-hia ïa i te ao ra; e te mau mea ato‘a ta oe e tuu i ni‘a i te ao nei e tuu-ato‘a-hia ïa i te ao ra.

I teie nei te parau aro e te faufaa rahi no te ohipa taato‘a, e te summum bonum (te faufaa mau) no te haapiiraa i mua ia tatou nei, o te noaaraa ïa te mau mana no te autahu‘araa mo‘a. O oia o tei horo‘ahia ia’na teie mau taviri aore ia e fifi no te noaaraa mai ia’na te mau parau mau no ni‘a i te faaoraraa i te mau tamarii a te taata nei, no te feia i pohe ra e te mau taata ora ato‘a hoi ».⁷

Na roto i te mana no te taatiraa, e nehenehe te mau utuafare e taatihia no te taime e no a muri noa’tu, e e nehenehe te mau oro‘a mo‘a e ravehia no tei pohe.

« Te varua, te mana, e te piiraa o Eliaha, teie ïa, tei ia outou na te mana no te mau i te taviri no te heheuraa, no te mau oro‘a, no te mau orama, te mau mana e te mau oro‘a hiero no te îraa o te autahu‘araa a Melehizedeka e te basileia o te Atua i ni‘a i te fenua nei; e ia farii, ia noaa e ia rave i te mau oro‘a ato‘a no te basileia o te Atua, e tae noa’tu i te faafariuraa i te aau o te mau metua i te tamarii e to te mau tamarii i te mau metua, e tae noa’tu ia ratou i te ra‘i ra.

« Ua parau Malaki, ‘e tono na vau i te peropheta ra ia Elia ia outou na, a tae atu ai i taua mahana rahi măta‘u o Iehova ra: ia faafariu oia i te aau o te mau metua e te tamarii, e te aau o te tamarii e to ratou mau metua, o te haere mai hoi au, e o te ta‘iri i te fenua nei i te ino’ [Malaki 4:5-6].

« I teie nei, te mea ta‘u e hinaaro nei ia noaa o te iteraa ïa no ni‘a i te Atua, e te rave nei au i to‘u iho e‘a ia noaa te reira. E aha te mea e ti‘a ia tatou ia maramarama no ni‘a i teie nei irava i te mau mahana hopea nei?

« I te tau o Noa, ua haamou te Atua i te ao nei na roto i te hoê diluvi, e ua fafau Oia e haamou i te reira na roto i te auahi i te mau mahana hopea: hou râ te reira e tupu ai, e ti‘a ia Eliaha ia tae mai na mua e ia faafariu i te aau o te mau metua i te tamarii, e te tahi atu â…

« Teie te uiraa i teie nei taime. E aha te toro‘a e te piiraa a Eliaha? O te hoê ïa o te mau tumu parau rahi roa‘e e te faufaa rahi roa‘e ta te Atua i heheu mai. E tono mai oia ia Eliaha no te taati te mau tamarii i te mau metua, e te mau metua i te mau tamarii.

« I teie nei ua faataa-noa-hia anei teie nei oro‘a no te feia e ora nei, no te faaafaro i te mau fifi e te mau utuafare i ni‘a i te fenua nei? Aita roa ïa. E ohipa rahi roa’tu â. E Eliaha! E aha ïa ta oe e rave ahani tei ŏ nei oe? E tape‘a noa anei oe i ta oe ohipa no te feia ora ana‘e? Aita: E faahaere au ia outou i te mau papa‘iraa mo‘a, i reira te tumu parau i faaitehia mai ai: oia, ia ore tatou nei, eita ratou e nehenehe e maitai roa, e ore ato‘a tatou e maitai roa ia ore ratou; te mau metua ia ore te mau tamarii, te mau tamarii ia ore te mau metua [a hi‘o Hebera 11:40].

« Te hinaaro nei au e ia taa maitai outou i teie nei tumu parau, no te mea e mea faufaa rahi roa, e mai te mea e farii outou i te reira, o teie ïa te varua o Eliaha, ia faaora tatou i to tatou feia pohe, e ia taati atu ia tatou i to tatou mau metua tei te ra‘i ra, e ia taati i to tatou feia tei pohe no te ti‘a mai i te ti‘a-faahou-raa matamua; e te hinaaro nei tatou i ô nei i te mana no Eliaha no te taati i te feia e parahi nei i te fenua nei i te feia e parahi ra i te ra‘i ra. Teie te mana o Eliaha e te mau taviri no te basileia o Iehova…

« Faahou â: Teie te haapiiraa aore râ te mana taatiraa no Eliaha:—Mai te mea e mana to outou no te haamau i ni‘a i te fenua nei e i te ra‘i, e ti‘a ïa ia tatou ia rave paari. Te mea matamua ta outou e rave, a haere e taati i ni‘a i te fenua nei i ta outou mau tamaroa e tamahine ia outou iho, e outou i to outou mau metua i roto i te hanahana mure ore ».⁸

Ua riro te taeraa mai o Eliaha ei faaneineraa o te titauhia no te Tae-Piti-Raa mai o te Faaora.

« E ti‘a i te mau aau o te mau tamarii a te taata ia faafariuhia-’tu i te mau metua, e te mau metua i te mau tamarii, te ora nei e tei pohe, no te faaineine ia ratou no te taeraa mai o te Tamaiti a te Taata. Ahani aita o Eliaha i haere mai, e ta’irihia ïa te taato‘araa o te fenua nei ».⁹

« Ua riro o Elia te hoê taata tei tonohia na mua no te faaineine i te e‘a, e e haere mai te varua e te mana o Eliaha i muri iho, ma te mau i te mau taviri no te mana, te paturaa i te hiero e tae noa-’tu i te tapo‘i fare, ma te tuu i te mau titiro o te autahu‘araa a Melehizedeka i ni‘a i te utuafare no Iseraela, e no te faaineine i te mau mea ato‘a; i reira te Mesia e haere mai ai i To’na ra hiero, o te hopea o te mau mea ato‘a… E haere mai o Eliaha no te faaineine i te e‘a e no te patu i te basileia hou te taeraa mai te mahana rahi o te Fatu ».¹⁰

« Ua opuahia ia tanina i te ao nei i te mau mahana hopea. E e tono mai ïa Oia ia Eliaha te peropheta, e e heheu mai oia i te mau fafauraa a te mau metua i ta ratou mau tamarii, e te mau fafauraa a te mau tamarii i to ratou mau metua ».¹¹

« Nahea te Atua e haere mai ai e faaora i teie nei u‘i? E tono mai ïa Oia ia Eliaha te peropheta… E heheu mai o Eliaha i te mau fafauraa no te taati i te mau aau o te mau metua i te mau tamarii, e te tamarii i te mau metua ».¹²

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv

I to te Faaora fâraa mai i roto i te hiero no Ketelani, ua parau Oia ia Iosepha Semita e Oliver Cowdery, « e faite atu vau ia‘u iho i ta‘u mau taata na roto i te aroha i roto i teie nei fare » (api 351). Nahea te faahoi-raa-hia mai te mau taviri no te taatiraa i riro ai ei faaiteraa no te aroha o te Fatu? E aha te tahi atu mau rave‘a e faaite ai Oia Ia’na iho i roto i te hiero?
A tuatapapa i te toru e te maha o te paratarafa i te api 352. E aha ta teie nei na paratarafa e piti e haapii mai nei no ni‘a i te misioni a Eliaha ta tatou i ore i haapii mai i roto i te Malaki 4:5–6? E aha te faufaa rahi no ni‘a i teie nei mau huru-ê-raa?
A tuatapapa i te tatararaa no te mana taatiraa tei itehia i te mau api 353–54. E aha te mana taatiraa? No te aha teie nei mana e riro e mea faufaa rahi roa no outou e to outou utuafare?
A tai‘o i te tatararaa a Iosepha Semita no ni‘a i te ohipa a Eliaha (te mau api 354–56). E aha te Varua o Eliaha? No te aha e mea faufaa rahi roa e ia haere mai o Eliaha no te faatupu i ta’na ohipa i teie mau mahana hopea nei?
E aha te mau mea tei tupu ia outou a faafariu ai outou i to outou aau i te mau melo no te utuafare tei pohe? E aha ta te mau metua e nehenehe e rave no te tauturu i ta ratou mau tamarii ia faafariu i to ratou aau i to ratou mau hui tupuna?
A tai‘o i te paratarafa piti no te api 353 e te paratarafa matamua i te api 356. I to outou feruriraa no te aha te fenua e « ta‘irihia’i e te ino » mai te mea aita e mana taatiraa?

Te mau papa‘iraa mo‘a: Helamana 10:4–10; PH&PF 132:45–46; 138:47–48; Ditionare Bibilia, « Elijah », 664