Haapotoraa aamu

1805, 23 no titema:

Fanauhia i Sharon, tuhaa fenua no Windsor, Vermont, te paeraa o na tamarii hoê ahuru ma hoê i roto i te utuafare o Iosepha Semita metua, e o Lucy Mack Smith.

I te area 1813: (7 matahiti)

Ua ma‘ihia i te fiva aau; no te mau fifi ua titauhia e ia tapuhia to’na avae aui. I taua taime ra, te ora ra te utuafare Semita i West Lebanon, New Hampshire, i te hoê o te mau vahi i reira to te utuafare faaearaa i roto i te area matahiti 1808 e te matahiti 1816 no te imi i te tau maitai no te ohipa.

1816: (10 matahiti)

Ua haere e to’na utuafare i te oire no Palmyra, New York.

I te area matahiti 1818–19: (12 aore râ 13 matahiti)

Ua haere e to’na utuafare mai te oire iti no Palmyra i roto i te hoê fare hamanihia i te raau i te Oire no Palmyra, New York.

1820, omuaraa no te tau mahanahana: (14 matahiti)

Ua pure i roto i te uru raau i piha‘i iho i to’na nohoraa. Ua fâ mai te Atua te Metua e Iesu Mesia ia’na. E ua ani teihea te haapa‘oraa o ta’na e ti‘a ia amui atu. Ua parau te Faaora ia’na e e mea hape ana‘e ratou eiaha roa oia e amui atu i te hoê noa’tu o ratou.

1823, 21–22 no tetepa: (17 matahiti).

Ua fâ mai o Moroni tei parau atu ia’na no ni‘a i te ohipa a te Fatu i ni‘a i te fenua i te mau mahana hopea nei e te Buka a Moromona. Ua ite mata i te mau api auro, tei hunahia i roto i te hoê aivi i piha‘i iho i to’na nohoraa, ua opanihia râ ia rave i te mau ăpĭ auro i taua taime ra.

1825: (19 matahiti).

Ua faaru‘e oia e to’na utuafare i te fare raau no te haere atu i roto i te hoê fare hamani-apî-hia i te vahi i reira te vairaa ta ratou faaapu i te oire no Manchester, New York.

1827, 18 no tenuare: (21 matahiti).

Faaipoipo ia Emma Hale no Harmony, Pennsylvania; ua faaipoipohia raua i South Bainbridge, New York.

1827, 22 no tetepa:

Farii i te mau papaa parau mai roto mai i te rima o Moroni, i muri a‘e i te farereiraa ia Moroni i te 22 no tetepa i te mau matahiti ato‘a mai te matahiti 1823 mai â.

1827, titema: (21 aore râ 22 matahiti).

Ua haere atu i Harmony, Pennsylvania, no te tapuniraa i te mau taata ino i Palmyra e Manchester o te tamata i te eiâ i te mau papaa parau. Aita i maoro roa i muri iho, ua haamata i te iriti i te Buka a Moromona.

1828, fepuare: (22 matahiti).

Ua faaite o Martin Harris i te tahi mau papa‘iraa o te Buka a Moromona i te mau aivanaa, mai ia Charles Anthon e Samuel L. Mitchill i te Oire no New York.

1828, Tiunu–Tiurai:

Na 116 api papa‘i-rima-hia o tei iritihia no te Buka a Moromona o tei mo‘e na roto atu ia Martin Harris.

1829, 5 no eperera: (23 matahiti).

Ua tae mai o Oliver Cowdery i Harmony no te tavini ei papa‘i parau no te Buka a Moromona; ua haamata faahou te iritiraa i te 7 no eperera.

1829, 15 no me:

Ua farii oia e o Oliver Cowdery i te autahu‘araa a Aarona i raro a‘e i te rima o Ioane Bapetizo. Ua bapetizo o Iosepha e Oliver te tahi i te tahi i roto i te anavai no Susquehanna.

1829, Me–Tiunu:

Ua farii oia e o Oliver Cowdery i te autahu‘araa a Melehizedeka i raro a‘e i te rima o te mau Aposetolo no mutaa iho o Petero, Iakobo et Ioane i piha‘i iho i te Anavai no Susquehanna i ropu i te oire no Harmony, in Pennsylvania e te oire no Colesville i New York.

1829, Tiunu:

Faaoti i te iritiraa o te Buka a Moromona i te fare no Peter Whitmer Metua, i te oire no Fayette, New York. Ua ite na ite tootoru i te mau papaa parau e i te melahi o Moroni i Fayette, ua ite e ua fafa na ite e va‘u i te mau api i te Oire no Palmyra.

1830, 26 no mati: (24 matahiti)

Ua noaa i te taata te mau hoho‘a tei nene‘i-matamua-hia no te Buka a Moromona i te hooraa buka a E. B. Grandin i Palmyra.

1830, 6 no eperera:

Ua Faanahonaho oia ma te mana i te Ekalesia i te fare o Peter Whitmer metua, i Fayette (a hi‘o PH & PF 20:1). I te haamataraa te i‘oa mana o te Ekalesia o te Ekalesia ïa a te Mesia. I te 3 no me 1834, ua tauihia te i‘oa i Te Ekalesia a te Feia Mo‘a i te mau Mahana Hopea nei. I te 26 no eperera 1838, ua tauihia te i‘oa na roto i te heheuraa i Te Ekalesia a Iesu Mesia i te Feia Mo‘a i te mau Mahana Hopea nei (a hi‘o PH&PF 115:4).

1830, Tiunu:

Ia au i te faaueraa a te Fatu, ua haamata e ua faauruhia oia ia faatitiaifaro i te Bibilia, tei piihia te Iritiraa o te Bibilia na Ioseph Semita.

1830, 9 no tiunu:

Faatupu i te amuiraa matamua a te Ekalesia i Fayette.

1830, Tetepa:

Faanuu oia mai Harmony, Pennsylvania, haere atu i Fayette, New York. I ropu i te ava‘e titema 1827 e tae roa mai i teie taime, ua ora o Iosepha raua o Emma i Harmony, tera râ, ua ratere tamau noa o Iosepha i tera taime e tera taime i Manchester, Fayette, e i Palmyra no te rave i te mau ohipa no ni‘a i te iritiraa i te Buka a Moromona, te faanahoraa no te nene‘iraa i te Buka a Moromona, te faati‘araa i te Ekalesia, te peresideniraa i te amuiraa matamua a te Ekalesia, e te haapa‘oraa i te tahi atu mau ohipa a te Ekalesia.

1830, Tetepa:

Farii oia i te hoê heheuraa e e ti‘a i te mau misionare ia haere atu « i te Ati Lamana » no te poro i te evanelia (PH&PF 28:8; a hi‘o ato‘a 30:5–6; 32:1–3). I te ava‘e atopa, ua tere atu na peresibutero e maha no te hoê misioni no te haapii i roto i te fenua Initia i te tooa o te râ no te tuhaa fenua no Missouri.

1830, Titema: (25 matahiti)

Farii i te hoê heheuraa e ia haaputuputu te feia mo‘a i Ohio (a hi‘o PH&PF 37)

1831, omuaraa no fepuare:

I muri iho a tere ai hau atu e 250 maire mai New York, ua tae i Ketelani, Ohio

1831, 20 no tiurai:

I Inidipenideni, Mataeinaa Iakona, Missouri, ua farii i te hoê heheuraa no te iteraa ia Inidipenideni ei « vahi haaputuputuraa » no Ziona (a hi‘o PH&PF 57:1–3).

1831, 2 no atete:

Ua peresideni oia a haamo‘a ai o Sidney Rigdon i te mataeinaa Iakona, Missouri, ei fenua no Ziona.

1831, 3 no atete:

Haamo‘a hoê hiero no te fenua i Inidipenideni.

1832, 25 no tenuare: (26 matahiti).

Paturuhia ei peresideni no te autahu‘araa teitei i Amherst, Ohio.

1832, 8 no mati:

Ua faanaho i te Peresideniraa Matamua, o Sidney Rigdon e Jesse Gause ei mau tauturu, i Ketelani. I te 18 no mati 1833, ua mono atu o Frederick G. Williams ia Jesse Gause.

1832, 27–28 no titema: (27 matahiti).

Farii i te hoê faaueraa ia patu i te hoê hiero i Ketelani (a hi‘o PH&PF 88:119–20)

1833, Tenuare:

Haamata te haapiiraa a te mau peropheta.

1833, 2 no tiurai:

Faaoti i ta’na ohipa matamua no ni‘a i te iritiraa faauruhia no te Bibilia, tei matauhia i teie nei ei iritiraa o te Bibilia na Iosepha Semita. Na roto i teie ohipa ua horo‘a mai i te buka a Mose e Iosepha Semita—Mataio, tei roto i teie nei i te Poe Tao‘a Rahi.

1833, 20 no tiurai:

Ua vavahi te mau taata ino i te nene‘iraa ve‘a i Inidipenideni, Missouri, a nene‘ihia ai hoi i reira te buka o te mau faaueraa, e te rahiraa o te mau api tei piahia. I te ava‘e tetepa 1835 ua nene‘ihia te mau heheuraa no roto mai i te buka o te mau faaueraa, e te tahi ato‘a’tu mau heheuraa, i Ketelani i roto i te nene‘iraa matamua no te Parau Haapiiraa e te mau Parau Fafau.

1833, 23 no tiurai:

Ua tuuhia te mau ofa‘i tihi no te hiero no Ketelani.

1833, 18 no titema:

Ua faatoro‘ahia o Iosepha Semita metua, patereareha na te Ekalesia.

1834, Me–Tiurai: (28 matahiti).

Ua arata‘i i te puhaparaa a Ziona mai Ketelani, Ohio e tae atu i te mataeinaa no Clay, Missouri, no te afa‘i i te tauturu i te feia mo‘a tei ti‘avaruhia i rapae au i to ratou mau fare i te mataeinaa no Iakona, Missouri. Ua hoi i Ketelani i muri a‘e i te fariiraa i te hoê heheuraa e e ti‘a i te feia mo‘a ia « tia‘irii no te hoê tau poto no te faaoraraa ia Ziona » (PH&PF 105:9)

1835, 14 no fepuare: (29 matahiti).

Faanaho i te Pŭpŭ no te Tino Ahuru ma Piti Aposetolo.

1835, 28 no fepuare:

Faanaho i te hoê Pŭpŭ no te Hitu Ahuru

1835, Tiurai:

Farii i te mau papa‘iraa Aiphiti e vai ra i roto i te mau papa‘iraa a Aberahama.

1836, 27 no mati: (30 matahiti).

Ua haamo‘a i te hiero no Ketelani (a hi‘oPH&PF 109)

1836, 3 no eperera:

Ua fâ atu o Iesu Mesia ia Iosepha Semita e Oliver Cowdery i roto i te hiero no Ketelani e ua farii oia i te hiero. Ua fâ ato‘a’tu o Mose, Elia, e Eliaha e ua horo‘atu te mau taviri ia Iosepha e Oliver (a hi‘o PH&PF 110).

1837, Tiunu: (31 matahiti)

Ua tono i te mau peresibutero mai Ketelani e Canada i ni‘a, no te tavini ei misionare i Peretane, te misioni matamua i rapae ia Amerika apato‘a.

1838, 12 no tenuare: (32 matahiti).

Faaru‘e ia Ketelani no te haere atu i Far West, Missouri, no te horo i te hamaniino-raa a te mau taata ino.

1838, 14 no mati:

Tae i Far West e ua haamau i te pû faatere o te Ekalesia i reira.

1838, 27 no eperera:

Ua haamata i to’na iho aamu, tei nene‘ihia ei « aamu no Iosepha Semita » i roto i te mau ve‘a a te Ekalesia tei haamata i te matahiti 1842; tei nene‘i-faahou-hia ei Te Aamu no te Ekalesia.

1838, 27 no atopa:

Ua pia te tavana rahi no Missouri o Lilburn W. Boggs i te « parau mana haamouraa ». Na teie nei faaotiraa mana e te hamani-ino-raa u‘ana i tura‘i i te feia mo‘a ia faaru‘e i te tuhaa fenua no Missouri no te haere atu i te tuhaa fenua no Illinois i te tau to‘eto‘e e te tau mahanahana no te matahiti 1838–39.

1838, 1 no titema:

Tape‘ahia oia e tae noa‘tu i te tahi atu feia faatere no te Ekalesia i Liberty, Missouri.

1839, 20 no mati: (33 matahiti).

Ua papa‘i oia i te hoê episetole mai te fare tape‘araa no Liberty i te feia mo‘a, ua haamanahia i muri iho te tahi mau tuhaa o te episetole i roto i te Parau Haapiiraa e te mau Parau Fafau 121, 122, e 123

1839, afaraa no eperera:

A utahia’i oia no te hoê tauiraa no te vahi haavaraa mai Gallatin e tae atu i Columbia, Missouri, ua faati‘ahia oia na to’na mau taata tia‘i ia faaora atu ia’na.

1839, 22 no eperera:

Amui atu oia i to’na utuafare in Quincy, Illinois.

1839, 10 no me:

Ua haere atu oia e to’na utuafare e faaea i roto i te hoê fare raau na‘ina‘i i Commerce, Illinois. Tei topahia te i‘oa i muri iho te oire o Nauvoo.

1839, 29 no novema:

Farerei ia Martin Van Buren, te peresideni no te Hau Marite, i Washington, D.C., no te titau ia faaafarohia te mau hamaniino-raa i Missouri. I reira, ua ani ato‘a oia i te Apooraa Rahi a te Hau Marite i te tautururaa.

1840, 15 no atete: (34 matahiti).

Ua faaite i te mau taata ato‘a te parau haapiiraa no ni‘a i te bapetizoraa no tei pohe i te hoê oro‘a hunaraa i Nauvoo. Ua rave-matamua-hia te mau bapetizoraa no tei pohe i roto i te anavai no Mississipi e te mau tahora pape i reira

1840, Tetepa:

I roto i te hoê a‘oraa na te Peresideniraa Matamua i to te Ekalesia, ua faaite oia e ua tae mai te taime no te haamata i te paturaa i te hoê hiero i Nauvoo.

1841, 4 no fepuare: (35 matahiti)

Ua ma‘itihia ei tapa‘o maha faatere no te nuu faehau no Nauvoo tei faanahonahoapî-hia, te hoê nuu faehau no te tuhaa fenua no Illinois

1841, 6 no eperera:

Ua haamauhia te mau ofa‘i tihi no te hiero no Nauvoo.

1841, 21 no novema:

Ua ravehia te mau bapetizoraa matamua no te feia pohe i roto i te hiero no Nauvoo i roto i te hoê faarii pape raau tei patuhia e tei haamo‘ahia hou te toe‘a o te hiero i hope ai i te patuhia.

1842, Fepuare—Atopa: (36 matahiti).

Tavini ei papa‘i ve‘a faatere no te Times and Seasons, ve‘a a te Ekalesia i Nauvoo.

1842, 1 no mati:

Nene‘i i te rata a Wentworth i roto i te Times and Seasons, i te ava‘e mati e te ava‘e me, ua nene‘i ato‘a i te buka a Aberahama i roto i te Times and Seasons.

1842, 17 no mati:

Faanahonaho i te sotaiete tauturu a te mau vahine no Nauvoo, o Emma Semita te peresideni.

1842, 4 no me:

Faatere i te mau oro‘a matamua no te hiero i roto i te hoê piha teitei o to’na fare piriti uteute.

1842, 19 no me:

Ma‘itihia ei tavana oire no Nauvoo.

1843, 12 no tiurai: (37 matahiti).

Tapa‘o i te hoê heheuraa no ni‘a i te fafauraa apî e te mure ore, tae noa’tu i te natura mure ore o te fafauraa no te faaipoiporaa (a hi‘o i te PH&PF 132)

1844, 29 no tenuare: (matahiti 38).

Faaite i to’na hororaa no te peresideniraa no te Hau Marite

1844, Mati:

I roto i te hoê putuputuraa e te Pŭpŭ no te Tino Ahuru ma Piti Aposetolo e te tahi atu mau taata, ua faaue oia i te Ahuru ma Piti ia faatere i te Ekalesia ia pohe noa’tu oia, ma te faataa maitai atu ia ratou e ua horo‘a oia i ni‘a ia ratou te mau oro‘a, te mana e te mau taviri ato‘a e titauhia ia rave i te reira.

1844, 27 no tiunu:

Taparahi-pohe-hia oia e to’na taea‘e Hyrum i te fare tape‘araa i Carthage, Illinois.

1844, 29 no tiunu:

Tanuhia raua o Hyrum i Nauvoo, Illinois.