Ko ha Siasi ʻoku Fakatefito ʻi ʻApi

ʻOku ʻomi ʻe he 2019 ha ngaahi liliu ʻi he Siasí. Ko e foʻi houa pē ʻe taha ʻoku ʻave mei he falelotú ki he ʻapí ke poupouʻi ha polokalama ako ʻo e ongoongoleleí ʻoku fakatefito ʻi ʻapi mo poupouʻi ʻe he ngaahi polokalama ʻoku poupouʻi ʻe he Siasí, ki hono akoʻi ʻo e ongoongoleleí ki hono ngaahi ola ʻo e foʻi liliu siʻisiʻi mo faingofua ko iá, kuo ʻosi ongoʻi ia ʻe he kau mēmipa ʻo e Uooti Nukuʻalofa 10 ʻo e Siteiki Nukuʻalofá ʻi Tonga.

Naʻe fakamatala ʻe Misa Kaufusi, ko e Palesiteni e Kōlomu ʻo e Kaumātuʻá, “ʻOku ou ongoʻi ʻoku hanga ʻe he polokalama foʻou ʻoku fakatefito ʻi ʻapí mo poupouʻi ʻe he Siasí ʻo fakamanatu mai kiate au, ko hoku fatongiá ke akoʻi ki heʻeku fānaú ʻa e ongoongoleleí.” Kuo toe fakafoki e tokangá ki he ʻiuniti ʻo e fāmilí ʻa ia ʻoku ʻi ai e tefitoʻi fatongia ki hono tanumaki fakalaumālie mo e tupulaki ʻa e mēmipa kotoa ʻo e fāmilí. Naʻe pehē pē ia, ka ʻoku hoko e ngaahi liliú ko ha fakamanatu lelei mai kiate kitautolu kotoa.”

Naʻe pehē ʻe Sisitā Pua Tuitavake mei he Uooti Nukuʻalofa 10, “Ne mau ʻiloʻi maʻu pē ko homau ngafa mo e fatongia fakaemātuʻa ke ʻakoʻi ʻemau fānaú ʻi ʻapi pea ʻoku mau fāifeinga ke fakahoko ia ʻi homau kiʻi fāmilí.

“Ko e taha e ngaahi tukufakaholo homau fāmilí ʻi he Sāpaté, ko e vahevahe ʻe heʻema fānaú e ngaahi meʻa ne nau ako mei heʻenau ngaahi kalasi he Sāpaté. Kapau ʻoku ʻi ai ha tefitoʻi moʻoni ʻoku ma ongoʻi ʻoku fie maʻu ke nau ʻilo lahi ki ai, naʻá ma aleaʻi leva ia mo kinautolu ke tānaki ki he meʻa kuo nau ʻosi ʻiló.

“Naʻe tokoni ʻaupito ki homau fāmilí, ʻi ha ngaahi founga lahi hono fakafeʻiloaki ʻo e naunau fakalēsoni foʻoú ʻi he kamataʻanga ʻo e taʻú ni. ʻOku mau ongoʻi ʻoku fakalakalaka ʻemau lau folofolá pea ʻaonga ange. ʻOku tokoniʻi ʻe he ngaahi fealeaʻaki ʻi ʻapí ʻema fānaú ʻo ʻikai ngata pē ʻi heʻenau vahevahe ʻenau ʻiló ka e kau atu ki ai mo ʻenau ngaahi ongó ʻi heʻemau fakamoleki ha houa ʻe taha makehe ke akoʻi, ako pea fefakalotoaʻaki ʻi heʻemau ngaohi homau ʻapí ke hoko ko ha senitā ʻo e ako fakalaumālié.

“ʻI heʻetau hoko ko e mātuʻá ʻoku hoko ko ha fakanonga, ʻa e taimi ʻoku vēkeveke ange ai hoʻo fānaú ke maʻulotu pea kau ki heʻenau ngaahi kalasi ʻi he Sāpaté koeʻuhí ko e ngaahi meʻa ne nau ako mei ʻapí. ʻI heʻetau hoko ko e fāmilí ʻoku tau ongoʻi vāofi ange mo e taha kotoa, toe lelei ange hotau vā fetuʻutaki ko ha husepāniti mo ha uaifi pea mo ʻetau fānaú foki. Kuo fakamālohia foki ʻetau ngaahi fakamoʻoní ka e mahuʻinga tahá ʻa e tupulaki ʻetau feʻofaʻakí, [ʻofa] ki he niʻihi kehé pea mo hotau Fakamoʻuí. Kuo fakakamoʻoniʻi mai ʻe he laumālié kiate au, ko hotau palōfitá, Palesiteni Lāsolo M. Nalesoni ko e tangata ia ʻa e ʻOtuá pea ʻoku fie maʻu ke tau tokanga ki heʻene ngaahi akonakí pea fakahoko e naunau fakalēsoni “Haʻu, ʻo Muimui ʻIate Au” ʻi hotau ʻapí.”

ʻOku tokolahi ha kau mēmipa ʻo e Siasí ʻoku nau nofo tokotaha pē. ʻOku tokangaʻi lelei ʻaupito ʻe he pīsope ʻo e Uootí, Pīsope Peni Lakai, e kau mēmipa ʻoku nau nofo tokotahá. Naʻá ne pehē pehē, “ʻOku ou ʻaʻahi ki he kau uitou ʻo e Uootí ʻi he lahi taha te u ala lavá ke tokoniʻi kinautolu ke fakahoko e naunau fakalēsoni foʻou Muimui ʻIate Aú. ʻI he māhina kuoʻosí naʻá ku ʻave ai ha toko ono ʻo homau kau uitoú ki he Paʻake Fakafonuá ke mau kai hoʻatā pea maʻu mo ha kiʻi taimi ako ki he ongoongoleleí.”

Ne ʻilo ʻe Misa Kaufusi ʻoku tokoni lahi ʻa e liliú ki he ngaahi fakatahaʻanga ʻa e Siasí ka e pehē foki ki he ʻapí. Naʻa ne pehē, “ʻI heʻeku hoko ko e palesiteni e kōlomu ʻo e kaumātuʻá, naʻa ku fakatokangaʻi mo hoko ongo tokoní ʻoku tau toe fakamahuʻingaʻi ange e ngaahi kalasí ʻi he siʻi ange ʻa e taimí. ʻOku to e mateuteu ange e ngaahi lēsoní pea tokolahi mo e kau mai ʻa kinautolu ʻoku ʻi aí koeʻuhí ko e kalasi pē eni te nau kau ki ai ʻi he ʻaho ko iá.

“ʻI heʻemau hoko ko e kau palesitenisií, ʻoku mau feinga mālohi ange ke fakapapauʻi ʻoku feau ʻe heʻemau ngaahi lēsoní ʻa e ngaahi fie maʻu ʻa e kaumātuʻá koeʻuhí ko e ngaahi lēsoni pe ʻe ua ʻi he māhina kotoa pē, ko ia ai ʻoku nau mahuʻinga.”

Naʻá ne hoko atu ʻo pehē, “ʻOku hangē ʻoku toe tukutaha e tokangá ki he houalotu Sākalamēnití. ʻE lava ʻe he lahi e ngaahi fanongonogó ʻo toʻo e taumuʻa totonu ʻo e houalotu sākalamēnití, ʻa ia ko e ouau sākalamēnití. ʻOku ou saiʻia ʻi heʻetau kamata pē ʻo fakahoko leva iá.”

Kuo ongoʻi e ngaahi tāpuaki ʻo e ngaahi liliu fakalaumālié ni ʻi he ʻapí mo e Siasí. ʻOku to e vāofi ange e ngaahi fāmilí; ngāue fakapotopotoʻaki ange ʻe he ngaahi kōlomú mo e houalotú ʻa e taimí, pea to e mahuʻinga malie ange e ouau toputapu ʻo e sākalamēnití ʻi ha toe taimi kimuʻa.”