“Haʻu foki Faʻē!”

ʻOku ou tui ʻoku ʻi ai e tokolahi ʻo kitautolu ʻoku tupu e ngaahi meʻa ʻoku tau manavahē taha ki aí mei heʻetau ngaahi fakaʻānauá. Ko e meʻa tonu eni ʻoku hoko kiate aú, ka naʻa ku toki fakatokangaʻi ia ʻi he taimi naʻa ku mavahe ai mei he YSA, ʻa ʻeku fie maʻu lahi ke maʻu ha husepāniti pea maʻu mo ha fānau, pea mo ʻeku manavasiʻi naʻa ʻikai hoko ʻa e fakaʻānauá ni.

Ne u saiʻia ʻi he taimi naʻa ku ʻi he YSA aí, ka naʻá ku hiki ki he taautaha lalahí mo ha ongoʻi taʻemalava mo siva e ʻamanakí. Lolotonga ʻeku ʻi he YSA, naʻa ku tukuange ʻeku manavaheé ke ne takiekina hoku halá ʻo fakakaukau ʻoku ou maluʻi au mei he lotomamahí. ʻI heʻeku sio ki muí, ʻoku ou fakatokangaʻi ai ne ʻikai maluʻi au ʻe heʻeku ilifiá, naʻá ne fakafeʻātungiaʻi hoku ngaahi faingamālie ke aʻu ki heʻeku taumuʻá. Naʻá ku veiveiua pe ʻe toe ʻi ai haʻaku fāmili pē ʻoʻoku. Ne hokohoko atu e tupulaki ʻeku loto mafasiá ʻo aʻu ki ha tuʻunga ne u fakatokangaʻi ʻoku kamata ke u toe fehangahangai mo e ʻikai maʻu e fāmili naʻá ku fiemaʻú.

Ne kamata ke hoko e kaka moʻunga ʻi he Motu Langitoto, ko ha tukufakaholo ʻo e Taʻu Foʻoú kiate au. Naʻe fakafofongaʻi ʻe he kaka moʻungá ʻa e ngaahi faingataʻa mo e ngaahi fakafeʻātungia naʻe pau ke haʻu mo e Taʻu Foʻoú pea ko ha faingamālie ia ke fakahoko ai ha meʻa faingataʻa mo fakamanatu kiate au ʻe malava ke ikunaʻi ha faʻahinga meʻa pē te u fakafaingataʻaʻiaʻi ai ʻi he taʻu ko iá.

ʻI he taʻu ko ení naʻe ʻikai keu fuʻu ongoʻi ke fai ha meʻa. Naʻá ku fakatuotuai ʻi he taimi lahi ʻo ʻeku fononga hake ki ʻolungá pea toutou tuʻu ʻo fakakaukau ke tuku. Ne ʻosi atu ha taʻu ʻe taha, mo e teʻeki pē ke fai ha fuʻu fakalakalaka ʻi heʻeku taumuʻá. Ne hangē ne mali e taha kotoa tuku kehe pē au. Ko ʻemau ofi ange ki he tumutumú, ko e fakautuutu ange ia ʻeku fakakaukau fakalotofoʻí.

Toe e miniti ʻe nima pea aʻu ki he feituʻu ne mau fakataumuʻa ki aí, naʻá ku tuʻu ʻaupito. Naʻe ʻikai ke u lava ʻo hoko atu ʻeku fonongá. Naʻá ku tangi ʻa loʻimata ʻi he feituʻu ko iá ʻi he moʻungá, ʻi heʻeku aʻu ki he ngataʻanga ʻo ʻeku kātakí. Naʻá ku pehē loto kuo feʻunga, peá u fakakaukau leva ke ʻoua ʻe toe hoko atu. ʻI he taimi pē ne hū mai ai e fakakaukaú ni ki hoku ʻatamaí, ne tohoakiʻi ʻeku tokangá ʻe ha meʻa. Naʻá ku tafoki ʻo sio ki ha kiʻi tamasiʻi ʻoku tuʻu ʻo kiʻi mamaʻo atu ʻi ha kiʻi hala kelekele. Naʻá ku ʻilo ko ha laumālie ia. Naʻe mafao mai hono nimá ʻo ne kamo mai ke u ʻalu ange kiate ia pea ne lea mai ʻi ha leʻo naʻá ku ʻiloʻí.

“Haʻu foki Faʻē!”

ʻI he mōmeniti ko iá ne lōmekina au ʻe he ngaahi ongo fakaelotó. Ko ʻeku tama tangatá ia; naʻá ku ʻilo ko ʻeku tama tangatá ia. Naʻá ku palani maʻu pē ke fakahingoa ʻeku ʻuluaki tama tangatá ko Nīfai pea neongo ne taimi siʻi pē ʻeku sio ki ai, naʻá ku ʻilo fakapapau ko ʻeku kiʻi ʻpēpē ia ko Nīfaí.’

Naʻá ne puli fakafokifā ʻi ha haʻu ha fāmili, ka naʻá ku ʻilo ʻa e meʻa naʻá ku sio ki aí. Naʻá ku ʻilo naʻe ʻomi ʻe he ʻOtuá kiate au e aʻusia makehé ni ke u ʻilo ʻokú Ne ʻafioʻi hoku mamahí pea ʻoku ʻikai te Ne fakangaloʻi au. Naʻe fakaivia foʻou au pea u fakavavevave hake ki he tumutumú pea fakapapau ke fakahoko ʻa e meʻa kotoa pē ke aʻu ki heʻeku taumuʻá.

ʻOku ʻikai kamata e tuʻunga fakaefaʻeé mei hono fanauʻi ha pēpē. ʻOku fie maʻu au ʻe heʻeku fānaú he taimí ni! ʻOku nau fie maʻu ke u hokohoko atu, ke tui faivelenga pea teuteuʻi ha ʻapi ke ohi hake ai kinautolu ʻi he taimi te nau ʻomi ai ki he māmaní. ʻOku afioʻi kitautolu ʻe he ʻOtuá. ʻOkú ne fanongo mai ki heʻetau ngaahi lotú. ʻOkú ne ʻafioʻi e ngaahi holi hotau lotó pea kapau te tau tuku ke Ne tataki kitautolu ʻi he ʻEne taimí mo ʻEne foungá, te tau aʻusia e ngaahi fakaʻamu māʻoniʻoni ʻoku tau maʻú.