ʻOkú Ne Falala mai Kiate Kitautolu ʻi he Ngaahi Meʻa Faingataʻa, Ko ia Falala Kiate Ia pea Ngāue

Naʻe ʻikai pē te u fakakaukau te u fokotuʻu ha pisinisi. Naʻá ku pehē ko ha tokotaha poupou talēnitiʻia au kiate kinautolu ʻoku ʻi ai ʻenau ngaahi fakakaukaú, kae ʻikai ko e tokotaha ʻoku ne taki e halá. ʻOku ʻikai ko e fuofua taimi eni naʻa ku tui ai ʻoku ou taʻe-malava ha meʻa ne ueʻi au ʻe he ʻEikí ke u fakahoko. Ne fie maʻu ia ke talamai tuʻo tolu ke u foki ʻo ako ʻi he ʻunivēsití pea u toki fanongo. Ne tō haʻaku ʻū kalasi ʻe niʻihi ʻi he kuohilí, pea naʻá ku ongoʻi naʻe ʻikai totonu keu ako.

Ne ohi hake au ʻi he uooti Tonga ʻo ʻOkalani Nuʻu Sila, Siteiki Uotaviú. Ne u hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he kotoa ʻo ʻeku moʻuí pea naʻe akoʻi au ʻi heʻeku kei siʻí ke falala maʻu pē pea fakahoko e fakahinohino ʻa e ʻEikí. Ko ha sīpinga ʻeni ʻi heʻeku moʻuí. Naʻe ʻikai keu fakakaukau ke ʻalu ʻo ngāue faifekau, ka ʻi he taimi ne ʻomi ai ʻa e fakahaá, naʻá ku ʻalu leva. Naʻe ʻikai te u fie maʻu ke toe foki ki he ʻunivēsití ka ʻi he fakalotoa angavaivai ʻa e ʻEikí naʻá ku talangofua. Naʻe ʻikai ke u fie hū ki he ʻunivēsití, naʻe ʻikai pē te u tui au te u lava ʻo kamataʻi haʻaku pisinisi pē ʻaʻaku, ka ʻi he tūtuuʻi e ngaahi tenga fakalaumālié pea tanumaki ʻi he kelekele ʻo e ʻotu lea ki he ʻotu lea ʻo e fakahaá, naʻá ku toe fakatokangaʻi ʻa ʻeku fai e meʻa naʻe ʻikai te u fakakaukau te u fakahoko.

ʻOku ʻomi e fakahaá kiate kitautolu fakataautaha ʻi ha ngaahi founga makehe: ki ha faʻahinga ko ha ongo māfana ʻo e melinó, ki ha niʻihi ko ha foʻi fakakaukau ʻoku ʻikai mavahe ia, pea ki ha niʻihi ko ha leʻo mahino ʻoku ongo ki honau ʻatamaí. Ne haʻu taha taha pē kiate au ʻa e fakahaá ʻi he ʻalu ʻa e taimí. Ne hā mahino lelei ange e taumuʻa ʻo ʻeku pisinisí ʻi he mōmeniti kotoa pē ne ueʻi fakalaumālie ai au: ke fakafehokotaki e ngaahi kautahá ki he komiunitií ʻo fakafou ʻi he ngaahi polokalama mo e ngaahi fokotuʻutuʻu foʻou ʻoku fakataumuʻa ki he fakatupu ʻo ha liliu moʻoni.

Naʻá ku ako ʻi he kotoa ʻo ʻeku moʻuí, ko e falala ko ia ki he fakahinohino ʻa e ʻEikí ʻoku lahi ange ia ʻi he pehē pē “ʻIo, te u talangofua.” Kuo pau ke tau ngāue, pea ʻi he taimi ʻe niʻihi, ko e meʻa ko ia kuo pau tau faí ʻoku fuʻu faingataʻa. Naʻe fie maʻu ia ke ʻuluaki ngaohi ʻe Nīfai ʻene ʻū meʻa ngāué kimuʻa peá ne toki muimui ki he fekau ʻa e ʻEikí ke foʻu ha vaká. Ne ʻave au ʻe he ʻEiki ke ngāue fakafaifekau pea toe fakafoki ki he ʻunivēsití ke u lava ʻo fakatupulaki e ʻū meʻa ngāue te u fiemaʻu ke kamataʻaki e pisinisi ko ʻení.

Naʻá ku ako ʻi hoku misioná ke ʻofa ki he fānau kotoa pē ʻa e ʻOtuá. Naʻá ku vakaiʻi pea fakakaukau ki he ngaahi fiemaʻu lahi ʻa ʻEne fanga sipí pea mo e founga ʻe lava ʻo feau ai e ngaahi fiemaʻu ko iá. ʻI he ʻunivēsití naʻa ku ako fekauʻaki mo e fokotuʻu pisinisí. Naʻá ku ako ke toe fakatokangaʻi ange, mohu founga, vēkeveke pea fakahoko ha ngāue ki ha meʻa ʻe hoko. ʻI he malumalu ʻo ʻEne fai fakahinohinó, naʻa ku fakahoko ha fekumi lahi mo kamataʻi e ngāué pea tataki [au] ki ha kakai naʻe fie maʻu keu fetaulaki pea ako meiate kinautolu. Naʻá ku kau ki he kalasi ʻKo Hono Kamataʻi mo Fakatupulaki ʻEku Pisinisí’ ke hoko ko ha tokoni makehe. Naʻa ku lotua lahi ʻa e foʻi laka kotoa pē ka naʻe ʻikai faingofua e fonongá, pea ne ʻikai mahino maʻu pē e halá.

ʻI he taʻu kuo ʻosí, naʻá ku aʻu ai ki ha tuʻunga maʻulalo ʻaupito ʻo ʻeku fonongá. Naʻá ku ngāue malohi ka naʻá ku ongoʻi ʻo hangē ʻoku taumuʻa valea ʻeku fonongá. Kimuʻa pea kamata fakaʻofisiale e pisinisí, naʻá ku lotu ki he ʻOtuá pea vahevahe e ongo totonu naʻá ku maʻú. ʻI he taimi naʻá ku lotu aí, ne ʻomi ʻe he Laumālie Māʻoniʻoní kiate au ha pōpoaki. ʻOku ʻafioʻi ʻe he ʻOtuá te ke fakahoko maʻu pēʻ a ia ʻoku Ne kole meiate koé, ʻoku Ne falala atu kiate koe. ʻI he taimi kotoa pē ʻoku ou foua ai ha ngaahi taimi faingataʻa, ʻoku fakamanatu mai kiate au ʻa e mōmeniti ko ení pea ʻiloʻi kuo pau keu vilitaki atu ki muʻa neongo ʻene faingataʻá. Ne ʻomi ʻe he pōpoaki taimi tonu ko ení ʻa e meʻa ne u fie maʻu ke u hokohoko atu ʻakí. Ne faifai peá u lava ʻo sio ki mui ki he ngaahi taimi faingataʻá pea mamata ki he ʻilo haohaoa ʻo ʻEne founga ngāué mo ʻEne taimí. ʻOku ne ʻafioʻi ʻa ʻetau fiemaʻú mo e taimi ʻoku tau mateuteu ai ki aí.

ʻOku kei lōloa e halafonongá ka ʻoku ou ʻilo ko ʻeku falala ki he ʻEikí mo ʻEne falala kiate aú te ne fakaaʻu au ʻi he fonongaʻangá ni. Naʻe ʻikai te u tui ko e ʻUnivēsití maʻaku, ka ko eni ʻoku ʻi ai hoku mataʻitohi ʻi he Ngaahi ʻAatí mo e Pisinisí. Naʻe ʻikai te u palani ke ngāue fakafaifekau ka naʻe hoko ia ko e taha ʻo e ngaahi aʻusia mahuʻinga taha ʻo ʻeku moʻuí. ʻI he taimi ʻoku kole atu ai e ʻEikí ke ke fakahoko ha meʻa faingataʻá, fai ia! Te ke ʻohovale ʻi he meʻa te ke lavaʻí ʻi he malumalu ʻo ʻEne tataki mo e ʻaloʻofa haohaoá.