Palani ʻo e Fakamoʻuí

Naʻa tau nofo mo ʻetau ongomātuʻa fakalangí ko ʻEna fānau fakalaumālie kimuʻa pea fāʻeleʻi kitautolu ki he māmaní (vakai, Tokāteline mo e Ngaahi Fuakava 138:55–56). Naʻe ʻoatu ʻe he Tamai Hēvaní ha palani ʻoku ʻiloa ko e “palani ʻo e fakamoʻuí” pe “ko e palani lahi ʻo e fiefiá” ( ʻAlamā 42:5, 8) ʻi ha fakataha alēlea mo e kotoa ʻo ʻEne fānaú. ʻOku kau ʻi he palaní ʻa e ngaahi fono mo e ngaahi ouau kotoa ʻo e ongoongoleleí ʻoku fie maʻu ke maʻu e moʻui taʻengatá, “ko e lahi taha ia ʻi he ngaahi meʻaʻofa kotoa pē ʻa e ʻOtuá” (Tokāteline mo e Ngaahi Fuakava 6:13).

Ko e meʻa fakamamahí he naʻe ʻikai tali ʻe he vahe tolu ʻe taha ʻo e fānau fakalaumālie ʻa e Tamai Hēvaní e palaní. Naʻa nau fili ke muimui kia Lusifā, ʻa ia naʻá ne hoko ko e tēvoló, pea kapusi ki tuʻa mei he ʻao ʻo e ʻOtuá (vakai, Fakahā 12:7–9).

‘Oku tau ʻi he māmaní he naʻa tau fili ke muimui ki he palani ʻa e Tamai Hēvaní. Ko e taha ʻo e taumuʻa mahuʻinga ʻo e moʻui fakamatelié ko hono maʻu ʻo ha sino fakatuʻasinó. ʻE lava ke tau maʻu e fiefiá mo e melinó ʻi he māmaní, ka te tau fehangahangai foki mo e ʻahiʻahí, fakafepakí, mo e faingataʻá pea aʻusia ha ngaahi ʻahiʻahi. ʻOku hoko e ngaahi faingataʻa fakamāmaní ko ha konga ʻo e moʻui fakamatelié pea ʻe lava ke ne tokoniʻi kitautolu ke tau tupulaki ʻo tatau mo ʻetau Tamai Hēvaní.

ʻOku mahuʻinga ki he palaní ʻa e Fakalelei ʻa Sīsū Kalaisí. Naʻe ikunaʻi ʻe Sīsū e mate fakalaumālié mo fakatuʻasinó pea toʻo kiate Ia hotau ngaahi faingataʻá, mamahí, mo e angahalá (vakai, ʻAlamā 7:11–13). ʻOku lau e mamahi, pekia, mo e Toetuʻu ko ʻení ko e Fakaleleí. Naʻe fie maʻu e Fakaleleí koeʻuhí he “ʻoku ʻikai ha meʻa ʻoku taʻemaʻa ʻe nofo mo e ʻOtuá” (1 Nīfai 10:21). ʻOku fakafou ʻi he feilaulau ʻa Kalaisí ʻa ʻetau lava ʻo fakatomala mo toe nofo fakataha mo e ʻOtuá.

ʻOku toe mahuʻinga foki ki he palani ʻa e ʻOtuá ʻa e tauʻatāina ke filí, pe ko e malava ko ia ke filí. ʻI heʻetau fili ke fakatomala mei heʻetau ngaahi angahalá, ʻoku tau fili ke tali e meʻaʻofa ʻo e Fakalelei ʻa Sīsū Kalaisí. Kapau te tau fakaʻaongaʻi ʻetau tauʻatāina ke filí ke tauhi e ngaahi fekaú, ʻoku tau maʻu e tāpuaki ke kau atu ki he ngaahi ouau toputapú, ʻa ia ko ha ngaahi ouau ʻoku kau ai hono fakahoko e ngaahi fuakava pe ngaahi palōmesi mo e ʻOtuá. ʻOku kau ʻi he ngaahi ouau ko ʻení ʻa e papitaisó, hilifakinimá, fakanofo ʻo e lakanga fakataulaʻeikí ki he houʻeiki tangatá, pea mo e ngaahi ouau ʻo e temipalé.

Ko e konga ia ʻo e palani ʻa ʻetau Tamai Hēvaní ke tau mate kotoa ʻi ha ʻaho. Ko e maté ko e māvahevahe ia ʻo e laumālié mo e sino fakatuʻasinó. ʻE hokohoko atu e moʻui hotau laumālié, ʻa ia naʻe moʻui ʻi he maama fakalaumālié, hili ʻetau maté. Kapau naʻa tau moʻui angatonu—ʻo fakatomala ʻi hono fie maʻú—ki he ngataʻanga ʻo ʻetau moʻui fakamatelié, te tau hū atu ki he palataisi fakalaumālié. Naʻe fakamatalaʻi ʻeni ʻe he palōfita ʻo e Tohi ʻa Molomoná ko ʻAlamaá “ko ha potu ʻo e mālōlō, ko ha potu ʻo e melino” ( ʻAlamā 40:12).

Koeʻuhi ko e Fakalelei ʻa Kalaisí, ʻe toetuʻu e fānau kotoa ʻa e ʻOtuá pea ʻe toe fakataha hotau ngaahi sinó mo e laumālié (vakai, 1 Kolinitō 15:20–22; Tokāteline mo e Ngaahi Fuakava 88:14–17). Hili e Toetuʻú ʻe hoko atu ki he Fakamaau Fakaʻosí, ʻa ia ʻe fakamaauʻi ai kitautolu ʻe he ʻOtuá ʻo fakatatau ki heʻetau ngaahi holí mo ʻetau talangofua ki he ngaahi fekaú (vakai, 2 Nīfai 9:15–17; Tokāteline mo e Ngaahi Fuakava 137:9). Kapau ʻoku tau feʻunga ʻo fakafou ʻi he fakatomalá, te tau lava ʻo nofo taʻengata mo ʻetau ongomātuʻa fakalangi ʻofá (vakai, ʻAlamā 40; 41; Tokāteline mo e Ngaahi Fuakava 76).

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé

“ʻE Mole ʻa e Loto ʻo e Tangatá”

“Ko hono Fakaafeʻi ʻo e taha kotoa ke haʻu kia Kalaisí: Vahevahe ʻo e Ongoongoleleí”

“Ko e Palani ʻo e Fakamoʻuí”

ʻĪmisi

fakaʻilonga ʻo e Kuaea Tāpanekalé

Ngaahi Vitiō ʻa e Kuaea Tāpanekalé

“Naʻe ʻOfa Pehē ʻa e ʻOtuá”

“Sīsū ē Ne ʻAloʻi”