Tauʻatāina ke Filí

Naʻe fakamatalaʻi ʻe ʻEletā Tēvita A. Petinā: “ʻI he vahevahe lalahi ʻo e kotoa ʻo e ngaahi fakatupu ʻa e ʻOtuá, ʻoku ʻi ai ha ngaahi meʻa ke ngāue pe ngāueʻi (vakai, 2 Nīfai 2:13–14). … ʻI hono fakakoloaʻi kitautolu ʻaki ʻa e tauʻatāina ke filí, ʻokú ta hoko leva ko e ongo fakafofonga, pea kuo pau ke ta ngāue kae ʻikai ke toki fakakounaʻi ke ngāue.”² ʻOku fakamahinoʻi fēfē ʻe he fakamatala ko ʻení ʻa e faikehekehe ʻi he fānau ʻa e ʻOtuá mo ʻEne ngaahi fakatupu kehé? ʻOkú ke pehē ko e hā ʻoku hoko ai e tefitoʻi moʻoni ʻo e tauʻatāina ke fili ki he totonú ko ha konga mahuʻinga ʻo e palani ʻa e ʻOtuá ki hono fakamoʻui ʻo ʻEne fānaú?

Fakakaukau ke lau ʻa e meʻa naʻe akoʻi ʻe Līhai ki hono foha ko Sēkopé ʻo kau ki hono mahuʻinga ʻo e tauʻatāina ke filí ʻi he 2 Nīfai 2:26–29. Te ke fakamatalaʻi fēfē ʻa e ngaahi aʻusia ʻo e tauʻatāiná mo e nofo pōpulá ʻoku fakamatalaʻi ʻi he potufolofola ko ʻení? Ko e hā ʻoku akoʻi atu ʻe he potufolofola ko ʻení fekauʻaki mo e founga ke “fili [ai] ʻa e moʻui taʻengatá”?

Mamataʻi ʻa e foʻi vitiō “The Ten Virgins” (1:40) pe lau fakataha ʻa e talanoa fakatātā ʻo e kau tāupoʻou ʻe toko hongofulú ʻi he Mātiu 25:1–13. Aleaʻi ʻa e meʻa ʻoku akoʻi mai ʻe he talanoa fakatātā ko ʻení fekauʻaki mo e tauʻatāina ke filí. Talanoa fekauʻaki mo ha ngaahi founga te ke lava ai ʻo fili ke teuteu ke feʻiloaki mo e Fakamoʻuí.

2 Nīfai 2:26; ʻAlamā 41:3–7; Hilamani 14:30–31; Tokāteline mo e Ngaahi Fuakava 29:39; 58:27–28; 93:31–32; Mōsese 4:1–4

Russell M. Nelson, “Ngaahi Fili ki he Taʻengatá” (fakataha lotu fakaemāmani lahi maʻá e kau taautaha kei talavoú, 15 Mē 2022), Gospel Library

Russell M. Nelson, “Tuku ke Lāngilangiʻia ʻa e ʻOtuá,” Liahona, Nōvema 2020, 92

Dallin H. Oaks, “Fehangahangai ʻi he Meʻa Kotoa Peé,” Liahona, Mē 2016

D. Todd Christofferson, “Moral Agency,” Ensign, June 2009, 46–52

“War in Heaven” (vitiō), Gospel Library

Naʻe fehangahangai ʻa Sīsū Kalaisi mo e ngaahi ʻahiʻahí ʻi he lolotonga ʻEne moʻui fakamatelié, ʻo hangē pē ko kitautolú (vakai, Hepelū 4:15; Mōsaia 3:7; ʻAlamā 7:11). Lau ʻa e Mātiu 4:1–11. Ko e hā te ke lava ʻo ako mei he tali ʻa Sīsuú ʻi he taimi naʻe feinga ai ʻa Sētane ke Ne fili taʻemāʻoniʻoní?

ʻI he malanga ko e “Ikuʻi ʻa Māmani mo Maʻu ha Fiemālie,” naʻe pehē ai ʻe Palesiteni Lāsolo M. Nalesoni: “ʻOku ʻuhinga nai ki he hā ʻa e ikuʻi ʻa māmaní? ʻOku ʻuhinga ia ke ikunaʻi ʻa e fakatauele ke tokanga lahi ange ki he ngaahi meʻa ʻo māmaní ʻi he ngaahi meʻa ʻa e ʻOtuá. ʻOku ʻuhinga ia ke falala lahi ange ki he tokāteline ʻa Kalaisí ʻi he ngaahi fakakaukau fakapoto ʻa e tangatá. ʻOku ʻuhinga ia ke fiefia ʻi he moʻoní, taʻofi ʻa e kākaá, pea hoko ko ha ‘kau muimui anga-fakatōkilalo ʻo Kalaisi’ [2 Nīfai 28:14]. ʻOku ʻuhinga ia ke fili ke fakaʻehiʻehi mei ha meʻa pē ʻokú ne tuli ʻa e Laumālié. ʻOku ʻuhinga ia ke loto-fiemālie ke ‘liʻaki’ ʻo aʻu ki ngaahi angahala ʻoku tau saiʻia aí [ʻAlamā 22:18].”³ ʻE tataki fēfē ʻe he muimui ki he sīpinga ʻa Sīsū Kalaisí hoʻo feinga ke ikuʻi ʻa e māmaní?

Ko e hā ha ngaahi meʻa te ne lava ʻo taʻofi koe mei hoʻo tukulolo ki he finangalo ʻo e Tamaí? Ko e hā te ke lava ʻo fai ke ke tukulolo kakato ange ai kiate Iá?

Ko e taimi lahi, ʻoku ʻikai ko ʻetau ngaahi filí ʻi he vahaʻa ʻo e totonú mo e halá pe leleí mo e koví. Lau fakataha ʻa e lea ko ʻeni ʻa Palesiteni Tāleni H. ʻOakesí: “ʻI heʻetau fakakaukauʻi ʻa e ngaahi fili kehekehé, ʻoku totonu ke tau manatuʻi ʻoku ʻikai feʻunga ke lelei pē ha meʻá. ʻOku ʻi ai ha ngaahi fili ʻoku lelei ange pea lelei taha ange ha niʻihi ia. Neongo ʻoku totongi mamafa ange ha meʻa ʻokú te fili, ka ko hono totongi mamafa angé te ne ala ʻai ia ko e fili lelei taha ʻi he fakakātoá.”⁴ Talanoa ki ha ngaahi tefitoʻi moʻoni ʻe niʻihi te ne ala tokoniʻi koe ʻi hoʻo fili e ngaahi meʻa ʻoku lelei, lelei ange, pe lelei tahá. Ko e hā te ke lava ʻo ako mei he sīpinga ʻa Sīsū Kalaisí ʻi hoʻo fai e ngaahi fili ko iá?

Sōsiua 24:15; Sione 5:19; 6:38; 8:29; Mōsaia 15:7

Dallin H. Oaks, “Good, Better, Best,” Liahona, Nov. 2007, 104–8

Dale G. Renlund, “Mou Fili he ʻAhó Ni,” Liahona, Nōvema 2018, 104–6

“Know This, That Every Soul Is Free,” Hymns, no. 240; “Te u Muimui he Palani ʻa e ʻOtuá,” Tohi Hiva ʻa e Fānaú, 86–87

Naʻe pehē ʻe Palesiteni Lāsolo M. Nalesoni: “Nofo maʻu ʻi he hala ʻo e fuakavá. ʻE hanga ʻe hoʻo tukupā ke muimui ki he Fakamoʻuí, ʻaki hono fakahoko ha ngaahi fuakava mo Ia pea tauhi e ngaahi fuakava ko iá, ʻo fakaava e matapā ki he tāpuaki fakalaumālie mo e faingamālie kotoa pē ʻe lava ke maʻu ʻe he kakai tangata, fafine mo e fānau he feituʻu kotoa pē.”⁶ Ko e hā ha ngaahi fili kuó ne tokoniʻi koe ke ke fakalakalaka ʻi he hala ʻo e fuakava ʻa e ʻEikí? Ko e hā ha ngaahi fili te ke fai te ne tokoniʻi koe ke ke nofo maʻu ʻi he halá?

Fakaafeʻi e niʻihi kehé ke nau talanoa fekauʻaki mo e ngaahi aʻusia ʻi ha taimi naʻe ʻikai hoko ai e moʻuí ʻo hangē ko ʻenau ʻamanakí. Talanoa fekauʻaki mo e ngaahi fakakaukau mo e ngaahi ongo ʻe lava ke ʻomi ʻe he ngaahi aʻusia peheé. Fakakaukau ke lau fakataha ʻa e ʻĪsaia 55:8–9 pea aleaʻi ʻa e ʻuhinga ʻoku ʻomi ai ʻe he tefitoʻi moʻoni hono tuku ke lāngilangiʻia e ʻOtuá, ʻa e nongá mo e loto-falalá.

Lea Fakatātā 3:5–6; 1 Nīfai 17:40; Mōsaia 3:19

Russell M. Nelson, “Tuku Ke Lāngilangiʻia ʻa e ʻOtuá,” Liahona, Nōvema 2020, 92–95

Gerrit W. Gong, “Fili ke Tuku ke Lāngilangiʻia ʻa e ʻOtuá,” Ki Hono Fakamālohia ʻo e Toʻu Tupú, ʻAokosi 2022, 2–5

Randall K. Bennett, “Fili ʻa e Moʻui Taʻengatá,” Liahona, Nōvema 2011, 98–100