“Ko Hono Kumi ha Ngaahi Tali ki Hoʻo Ngaahi Fehuʻí: Talateú,” Ngaahi Tefitó mo e Ngaahi Fehuʻi (2023)
Ko Hono Kumi ha Ngaahi Tali ki Hoʻo Ngaahi Fehuʻí
Talateu
Kimuʻa ʻaupito pea tūʻulutui ʻa Siosefa Sāmita ke lotu ʻi he Vaoʻakau Tapú, naʻá ne fakatoka ʻa e fakavaʻe ki heʻene tupulaki fakalaumālié. Naʻá ne maʻulotu ʻi ha ngaahi māhina lahi, lau e Tohi Tapú, mo kau ʻi he ngaahi lotu fakafāmilí. Naʻá ne talanoa ki he kau mēmipa hono fāmilí, kau ai ha niʻihi naʻa nau taʻetui ki ha tui fakalotu kuo fokotuʻu. Naʻe pau ke ngāue ʻa Siosefa ke maʻu e ngaahi tali ki heʻene ngaahi fehuʻí. Ko hono aofangatukú, naʻe tali ʻe he ʻOtuá ʻa e lotu ʻa Siosefá. Ka naʻe ʻikai ke tali ʻe he ʻUluaki Mata Meʻa-Hā-Maí ʻa e kotoa ʻo e ngaahi fehuʻi ʻa Siosefá. Kia Siosefá, ko e fekumi ki ha talí ko ha meʻa ia ke fai he kotoa ʻo ʻene moʻuí.
ʻI he ʻaho ní, ʻoku faingofua ange hono maʻu ʻo e fakamatala fekauʻaki mo e hisitōlia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha toe taimi ange kimuʻa. ʻE lava ke hoko ʻeni ko ha tāpuaki maʻongoʻonga, ka ʻoku ʻikai faingofua maʻu pē ke ʻiloʻi pe ko e maʻuʻanga tokoni fē ʻoku falalaʻangá. Pea mahalo ʻe ʻohake ʻe ha niʻihi ʻo e ngaahi meʻa ʻoku tau akó ha ngaahi fehuʻi faingataʻa. Naʻe akoʻi ʻe ʻEletā Tieta F. ʻUkitofa: “ʻoku ongoʻi mā pe taʻefeʻunga ha kakai ʻe niʻihi koeʻuhí ko ʻenau ngaahi fehuʻi fakaʻāuliliki ʻoku fai ʻo kau ki he ongoongoleleí, ka ʻoku ʻikai totonu ke nau ongoʻi pehē.” Naʻá ne akoʻi, “Ko e fehuʻí ʻoku ʻikai ko ha fakaʻilonga ia ʻo e vaivai; ka ko ha fakamelomelo ia ki he tupulakí.”6 ʻOku ʻoatu ʻe he ngaahi fakamatala ʻi he maʻuʻanga tokoni ko ʻení ha ngaahi fokotuʻu ʻe lava ʻo tokoni atu ke ke maʻu ha nonga ʻi hoʻo fekumi ki ha tali ki hoʻo ngaahi fehuʻí.