අභියෝගාත්මක අවස්ථා වලදී පුද්ගලික සාමය
පුද්ගලික සාමය සෙවීම මේ තරම් කිසිවිටෙකත් වැදගත් වී නෑ.
මෑතකදී ඓතිහාසික නාවූ වල කොටසක් කැපකිරීමට මට පැවරුණා. එම පැවරුමේ කොටසක් ලෙස මිසුරි හි ලිබර්ටි බන්ධනාගාරය බලන්නට යාමට මට හැකිවුණා. එම සිරගෙදර දෙස බලන විට, සභා ඉතිහාසයේ එය ඉතා වැදගත් අංගයක් බවට පත්කළ සිදුවීම් ගැන මම කල්පනා කළා. මිසුරි ආණ්ඩුකාරවරයා විසින් කරන ලද සමුච්ජේදන නියෝගයක ප්‍රතිඵලයක් වශයෙන් ශුද්ධවන්තයින්ගේ ජීවිත තර්ජනයට ලක්වුණා. ඊට අමතරව, ජෝසෆ් අනාගතවක්තෘවරයා සහ තෝරාගත් හවුල්කරුවන් කිහිපදෙනෙකුව අසාධාරණ ලෙස ලිබර්ටි බන්ධනාගාරයේ සිරගත කර තිබුණා. අපේ සාමාජිකයින්ට මෙලෙස ප්‍රචණ්ඩ ලෙස විරුද්ධ වීමට හේතු වලින් එකක් වූයේ ඔවුන් වහල්භාවයට එරෙහි වීමයි. 1 ජෝසෆ් ස්මිත්ට සහ ඔහුගේ අනුගාමිකයින්ට සිදුවූ මෙම දැඩි හිංසනය ධර්මිෂ්ඨ මිනිසුන්ට බලපෑම් කළ හැකි අයුතු ලෙස තෝරාගැනීමේ නිදහස භාවිතා කිරීම පිළිබඳ පරම උදාහරණයක්. ජෝසෆ් ලිබර්ටි සිරගෙදර ගතකළ කාලය තුළින් පෙන්නුම් කරන්නේ විපත යනු ස්වාමින්වහන්සේගේ අප්‍රසාදය හෝ උන්වහන්සේගේ ආශිර්වාදය ඉවත්කර ගැනීමක් නොවන බවයි.
අනාගතවක්තෘ ජෝසෆ් ස්මිත්ව ලිබර්ටි බන්ධනාගාරයේ රඳවා සිටියදී ප්‍රකාශ කළ දේ කියවන විට මට එය දැඩිලෙස දැනුණා: “අහෝ දෙවියනි, ඔබ කොහේද? ඔබේ සැඟවුණු ස්ථානය ආවරණය කරන මණ්ඩපය කොහේද?” 2 ස්වාමින්වහන්සේගේ සෙනඟ කොපමණ කාලයක් “මේ වැරදි සහ නීති විරෝධී පීඩා වලට මුහුණදෙනු ඇත්දැයි” ජෝසෆ් විමසුවා. 3
මම ලිබර්ටි සිරගෙදර තුළ සිටගෙන සිටින විට, ස්වාමින්වහන්සේගේ පිළිතුර කියවන විට මට එය දැඩි ලෙස සිතට දැනුණා: “මගේ පුත්රය, නුඹගේ ප්‍රාණයට සැනසීම ලැබේවා; නුඹගේ දුක සහ නුඹගේ කරදර කුඩා කාලයකට පමණය; ඉන්පසු, ඔබ එය හොඳින් විඳදරා ගත්විට, දෙවියන්වහන්සේ නුඹව ඉහළින් උත්කර්ෂවත් කරන සේක.” 4 සෙලෙස්ටියල් ඉරණමක් සඳහා විරුද්ධවාදිකම් වලට අපව ශෝධනය කළ හැකි බව පැහැදිලියි. 5
ගැලවුම්කරුවාණන්ගේ වටිනා වදන් “මාගේ පුත්රය, නුඹගේ ප්‍රාණයට සාමය වේවා” 6 යන වචනය පුද්ගලිකව මා තුළ දෝංකාර දෙන අතර, අපේ දවස සඳහා එය ඉතා වැදගත් වෙනවා. උන්වහන්සේගේ ලෞකික දේවසේවය තුළදී උන්වහන්සේ තම ගෝලයන්ට ලබාදුන් ඉගැන්වීම් ඒවා මට සිහිපත් කරනවා.
ගෙත්සෙමනි උයනේදී සහ කුරුසියේදී ක්‍රිස්තුස්වහන්සේගේ දුක් විඳීමට පෙර, “මා නුඹලාට ප්‍රේම කළාක් මෙන්; එකිනෙකාට ප්‍රේම කරන්න” 7 යනුවෙන් තම ප්‍රේරිතයන්ට ආඥා කළා, පසුව ඔවුන්ව සනසවමින්: “නුඹලා වෙත මම සමාදානය තබායමි, මාගේ සමාදානය නුඹලාට දෙමි: මා දෙන්නේ ලෝකයා දෙන්නාක් මෙන් නොවේ. නුඹලාගේ සිත් කැලඹෙන්ටවත් භයවෙන්ටවත් නොදෙල්ලා.” 8
අපගේ ස්වාමින්වහන්සේ සහ ගැලවුම්කරුවාණන් වන යේසුස් ක්‍රිස්තුස්වහන්සේගේ ඉතාමත් ගෞරවනීය නාමයක් වන්නේ “සාමයේ කුමාරයා” යන නමයි. 9 අවසානයේදී සාමය සහ ප්‍රේමය ඇතුළුව උන්වහන්සේගේ රාජ්‍යය පිහිටුවනු ලැබෙයි. 10 මෙසියස්වහන්සේගේ සහස්‍ර පාලන කාලය තෙක් අපි බලා සිටිනවා.
සහස්‍ර පාලන කාලය පිළිබඳ මෙම දැක්ම කෙසේවෙතත්, ලෝක සාමය හා සමගිය අපේ කාලයේ ප්‍රචලිත නොවන බව අපි දන්නවා. 11 මගේ ජීවිත කාලය තුළ, ශිෂ්ඨාචාරයේ විශාල අඩුවක් මම මේ ලෙස කවදාවත් දැකලා නෑ. සාමය සහ නිශ්චලත්වය නැති කරන කෝපාවිෂ්ඨ, විවාදාත්මක භාෂාව සහිත, සහ ප්‍රකෝපකාරී, විනාශකාරී ක්‍රියාවන්ගෙන් අපි පහර කනවා.
යේසුස් ක්‍රිස්තුස්වහන්සේගේ දෙවන පැමිණීම සිදුවන තුරු, ලෝකයේ සාමය පොරොන්දු වී හෝ තහවුරු කර නෑ. උන්වහන්සේගේ ලෞකික මෙහෙවර විශ්ව සාමය සාක්ෂාත් නොකරන බව ගැලවුම්කරුවාණන් විසින් තම ප්‍රේරිතවරුන්ට උපදෙස් දුන්නා. උන්වහන්සේ මෙසේ ඉගැන්වුවා, “පොළොවෙහි සමාදානය දෙන්ට මම ආවෙමියි නොසිතල්ලා.” 12 විශ්ව සාමය ගැලවුම්කරුවාණන්ගේ ලෞකික දේවසේවයේ ප්‍රධාන කොටසක් නොවේ. විශ්ව සාමය අද පවතින්නේ නෑ.
කෙසේවෙතත්, අද අපේ ලෝකය දූෂිත කරන කෝපය, ආරවුල්, සහ බෙදීම නොතකා, පුද්ගලික සාමය සාක්ෂාත් කරගන්නට පුළුවන්. පුද්ගලික සාමය සෙවීම මේ තරම් කිසිවිටෙකත් වැදගත් වී නෑ. “ක්‍රිස්තුස්වහන්සේ තුළ සාමය” යන මාතෘකාව යටතේ වර්තමාන යෞවනයන් උදෙසා නික් ඩේ සහෝදරයා විසින් ලියා ඇති ලස්සන සහ ආදරණීය ගීතිකාව මෙහෙම කියනවා, “පොළොවේ කිසිඳු සාමයක් නැති විට, ක්‍රිස්තුස්වහන්සේ තුළ සාමය ඇත.” 13 ලොව පුරා COVID-19 වසංගතයට ටික කාලයකට පෙර මෙම ගීතිකාව ලැබීම අපට ආශිර්වාදයක් වුණා.
මෙම ගීතිකාව තුළින් සාමය සඳහා වූ අභිලාෂය මනරම් ආකාරයෙන් පිළිබිඹු වන අතර යේසුස් ක්‍රිස්තුස්වහන්සේගේ ජීවිතය හා මෙහෙවර තුළ සාමය නැංගුරම් ලා ඇති බව සුදුසු ලෙස අවධාරණය කෙරෙනවා. සභාපති ජෝසෆ් එෆ්. ස්මිත් මෙසේ ප්‍රකාශ කළා, “දෙවියන්වහන්සේගේ සත්‍යය සහ දෙවියන්වහන්සේගේ පණිවිඩය මනුෂ්‍ය වර්ගයාට ලැබෙන තුරුත් …, උන්වහන්සේගේ බලය හා අධිකාරිය පිළිගන්නා තුරුත්, සාමයේ සහ ප්‍රේමයේ ආත්මයට ලෝකයට කිසිදිනෙක පැමිණිය නොහැක.” 14
විශ්ව සාමය සාක්ෂාත් කරගැනීමේ ප්‍රයත්නයන්ගෙන් අප කිසිවිටෙකත් පසුබසින්නේ නැති නමුත්, ක්‍රිස්තුස්වහන්සේ උගන්වන පරිදි අපට පුද්ගලික සාමයක් ලබාගත හැකි බවට අපට සහතික වී තිබෙනවා. මෙම මූලධර්මය දහම සහ ගිවිසුම් හි මෙසේ දැක්වෙනවා: “නමුත් ඉගෙනගන්න එනම් ධර්මිෂ්ඨකමින් ක්‍රියාකරන ඔහු ඔහුගේ විපාකය ලෙස, මෙම ලෝකයේ සමාදානයද, එමෙන්ම මතු ලෝකයේ සදාකාල ජීවනයද පවා ලබන්නේය.” 15
ආරවුල් සමඟ කටයුතු කිරීමට සහ මතභේද අවම කරගැනීමට සහ මේ ලෝකය තුළ සාමය සෙවීමට අපට උපකාර වන “ධර්මිෂ්ඨකමේ ක්‍රියාවන්” මොනවාද? ක්‍රිස්තුස්වහන්සේගේ සියලු ඉගැන්වීම් මෙම දිශාවට යොමුවෙනවා. විශේෂයෙන් වැදගත් යැයි මා විශ්වාස කරන කිහිපයක් මම සඳහන් කරන්නම්.
පළමුවැන්න: දෙවියන්වහන්සේට ප්‍රේම කරන්න, උන්වහන්සේගේ ආඥා පිළිපදින්න, එමෙන්ම සෑම කෙනෙකුටම සමාවදෙන්න
සභාපති ජෝර්ජ් ඇල්බට් ස්මිත් 1945 දී සභාවේ සභාපති බවට පත්වුණා. ඔහු ප්‍රේරිතයෙකු ලෙස කටයුතු කළ කාලය තුළ ඔහුව සාමකාමී නායකයෙකු ලෙස හඳුන්වනු ලැබුවා. ඔහු සභාපති වීමට පෙර වසර 15 කට පෙර, දෙවන ලෝක යුද්ධයේ මරණ හා විනාශයත් සමඟ, ලොව පුරා පැවති මහා අවපාතයක අභියෝග හා පරීක්‍ෂණ, සාමකාමී බවෙන් ගොඩක් ඈතක වුණා.
දෙවන ලෝක යුද්ධය අවසානයේදී, 1945 ඔක්තෝම්බර් මාසයේදී සභාපතිවරයා ලෙස ඔහුගේ පළමු ප්‍රධාන සම්මන්ත්‍රණයේදී, සභාපති ස්මිත්, තම අසල්වැසියන්ට ප්‍රේම කිරීමට සහ සතුරාට සමාව දීමට ගැලවුම්කරුවාණන්ගේ ආරාධනය ගැන මතක්කර දුන් අතර, පසුව මෙසේ ඉගැන්වුවා, “සියලු පසුදවස් වල ශුද්ධවන්තයින් කවදා හෝ උන්වහන්සේ ඉදිරියේ සිටගෙන උන්වහන්සේගේ හස්තයන්ගෙන් මහිමාන්විත පිළිගැනීමක් බලාපොරොත්තු වෙනවා නම්, ඔවුන් අත්පත් කරගැනීමට බලාපොරොත්තු විය යුතු ආත්මය එයයි.” 16
දෙවනුව: ආත්මයාණන්ගේ ඵල සොයන්න
ප්‍රේරිත පාවුල් ගලාතිවරුන්ට ලියූ ලිපියෙහි දෙවියන්වහන්සේගේ රාජ්‍යය උරුම කරගැනීමට අපට සුදුසුකම් ලබාදෙන ධර්මිෂ්ඨ ක්‍රියා සහ පසුතැවිල්ලකින් තොරව අපව නුසුදුස්සන් කළ හැකි ක්‍රියාවන් අතර දෙවැදෑරුම්කම පෙන්වා දී තිබෙනවා. ඒවා අතරින් අපට සුදුසුකම් ලබාදෙන ඒවා වන්නේ: “ප්‍රේමය, ප්‍රීතිය, සමාදානය, ඉවසිලිවන්තකම, කරුණාවන්තකම, යහපත්කම, ඇදහිල්ල, මෘදුකම, පමණ දැන ක්‍රියාකිරීම” යන ආත්මයාණන්ගේ ඵලයි. 17 එකිනෙකාගේ බර දැරීම සහ යහපත් ක්‍රියා කිරීමෙන් වෙහෙසට පත්නොවීම ගැනද පාවුල් එයට ඇතුළත් කළා. 18 ධර්මිෂ්ඨ නොවන කාර්යයන් අතරට ඔහුට වෛරය, කෝපය සහ ආරවුල් ඇතුළත් කළා. 19
පරණ ගිවිසුමේ කාලය තුළ ඉගෙනගත් එක් ලොකු පාඩමක් වන්නේ ආබ්‍රහම් පියා සම්බන්ධවයි. ආබ්‍රහම් සහ ඔහුගේ බෑණා වූ ලොත්, ධනවත් වූ නමුත්, ඔවුන්ට එකට ජීවත් වීමට නොහැකි බව සොයාගත්තා. ආරවුල් දුරුකිරීමට, ආබ්‍රහම් ලොත්ට කැමති දේශයක් තෝරාගැනීමට ඉඩදුන්නා. ලොත් හොඳින් ජලය තිබූ හා අලංකාර වූ, යොර්දාන් තැනිතලාව තෝරාගත්තා. ආබ්‍රහම් විසින් මම්රේ යන සාරවත් බැවින් අඩු තැනිතලාව ලබාගත්තා. ඉන්පසු ආබ්‍රහම් තම කූඩාරම ගසා “ස්වාමින්වහන්සේට පූජාසනයක්” ඉදිකළ බව ශුද්ධලියවිලි වල කියවෙනවා. 20 අනෙක් අතට ලොත්, “තමාගේ කූඩාරම සොදොම දක්වා ගෙනගියා.” 21 සාමකාමී සබඳතා ඇති කරගැනීම සඳහා, ධර්මිෂ්ඨකම ඇතුළත් නොවන කාරණා සම්බන්ධයෙන් සම්මුතියක් ඇතිකරගැනීමට සහ ආරවුල් දුරුකිරීමට අප සූදානම් වියයුතු බවට වූ පාඩමක් මෙයින් පැහැදිලි වෙනවා. බෙන්යමින් රජු මෙසේ ඉගැන්වුවා, “නුඹලාට එකිනෙකාට හානිකිරීමට මනසක් නැතිවනු ඇත, එහෙත් සමාදානයෙන් ජීවත් වනු ඇත.” 22 නමුත් ධර්මිෂ්ඨකම හා මූලධර්ම අත්‍යවශ්‍යතාවයන් සම්බන්ධ හැසිරීම් වලදී අපි ස්ථිරව හා ස්ථාවරව සිටිය යුතුයි.
ධර්මිෂ්ඨකමේ ක්‍රියාවන්ගේ විපාකය වන සාමය ලබාගැනීමට අපට අවශ්‍ය නම්, අපි අපේ කූඩාරම්, ලෝකය වෙත යොමුකරන්නේ නෑ. අපි අපේ කූඩාරම් තබන්නේ දේවමාළිගාව දෙසටයි.
තෙවනුව: ධර්මිෂ්ඨකම තෝරාගැනීම සඳහා තෝරාගැනීමේ නිදහස ක්‍රියාත්මක කරන්න
සාමය සහ තෝරාගැනීමේ නිදහස යනු ගැලවීමේ සැලැස්මේ අත්‍යවශ්‍ය අංගයන් ලෙස බැඳී තිබෙනවා. “තෝරාගැනීමේ නිදහස සහ වගවීම” යන ශුභාරංචි මාතෘකා ලිපියෙහි විස්තර කර ඇති පරිදි, “තෝරාගැනීමේ නිදහස යනු දෙවියන්වහන්සේ විසින් අපට තෝරාගැනීමට හා ක්‍රියාකිරීමට ලබාදී ඇති හැකියාව සහ වරප්‍රසාදයයි.” 23 මේ අනුව, තෝරාගැනීමේ නිදහස යනු, අපි ගැලවුම්කරුවාණන්ව අනුගමනය කරන විට අපට ආශිර්වාද කරන පුද්ගලික වර්ධනයේ සහ අත්දැකීමේ කේන්ද්‍රස්ථානයයි. 24
ස්වර්ගයේ පැවති මන්ත්‍රණ සභාව තුළ ක්‍රිස්තුස්වහන්සේව අනුගමනය කිරීමට තෝරාගත් අය සහ සාතන්ගේ අනුගාමිකයින් අතර ගැටුමේදී තෝරාගැනීමේ නිදහස ප්‍රධාන කරුණක් බවට පත්වෙනවා. 25 උඩඟුකම සහ පාලනයට ඉවත් වීමට ඉඩදී ගැලවුම්කරුවාණන්ව තෝරාගැනීමෙන්, අපට උන්වහන්සේගේ ආලෝකය සහ උන්වහන්සේගේ සාමය ලබාගන්නට පුළුවන්. නමුත් මිනිසුන් තම තෝරාගැනීමේ නිදහස හානිකර හා වේදනා සහිත ආකාරයෙන් ක්‍රියාත්මක කරන විට පුද්ගලික සාමය අභියෝගයට ලක්වෙනවා.
ලෝකයේ ගැලවුම්කරුවාණන් අප වෙනුවෙන් කුමක් කරාවිද යන්න පිළිබඳව අප සතු දැනුම තුළින් අපගේ හදවත් වලට දැනුන සාමකාමී ආරක්ෂාව ශක්තිමත් වූ බව මට විශ්වාසයි. මාගේ ශුභාරංචිය දේශනා කරන්න හි මෙය ඉතා පැහැදිලිව දක්වා තිබෙනවා: “අපි යේසුස් ක්‍රිස්තුස්වහන්සේගේ වන්දිගෙවීම මත විශ්වාසය තබන විට, අපගේ පීඩා, අසනීප, සහ වේදනාවන් විඳදරාගැනීමට උන්වහන්සේට අපට උපකාර කරන්නට පුළුවන්. අපට ප්‍රීතිය, සාමය, සහ සැනසීමෙන් පූර්ණ වෙන්නට පුළුවන්. ජීවිතය පිළිබඳ අසාධාරණ සියල්ල යේසුස් ක්‍රිස්තුස්වහන්සේගේ වන්දිගෙවීම තුළින් නිවැරදි කරන්නට පුළුවන්.” 26
හතරවනුව: අපේ හදවත් හා නිවෙස් තුළ සයොනය ගොඩනගන්න
අපි දෙවියන්වහන්සේගේ දරුවන් වන අතර උන්වහන්සේගේ පවුලේ කොටසක්. අපි, අපි ඉපදුනු පවුලේද කොටසක්. සතුට හා සාමය යන දෙකටම පදනම වන්නේ පවුල් සංස්ථාවයි. සභාපති රසල් එම්. නෙල්සන් අපට මෙසේ උගන්වා තිබෙනවා, ඒවගේම මෙය අපි මෙම වසංගතය අතරතුරදීත් ඉගෙනගෙන තිබෙනවා, එනම් නිවස කේන්ද්‍රකරගත් සභා සහය ඇති ආගමික පිළිපැදීමට, “පවුල් වල බලය මුදාහැර … [අපේ] නිවෙස් ඇදහිල්ලේ අභය භූමියක් බවට පරිවර්තනය කරන්නට පුළුවන්.” 27 මෙම ආගමික වතාවත් අපගේ නිවෙස් වල තිබේ නම්, අපට ගැලවුම්කරුවාණන්ගේ සාමයද ලැබෙනවා. 28 ඔබගෙන් බොහෝ දෙනෙකුට ධර්මිෂ්ඨ නිවසක ආශිර්වාදය නොමැති බවත් අධර්මිෂ්ඨකම් තෝරාගන්නා අය සමඟ නිතරම රණ්ඩු වන බවත් අපි දන්නවා. ජීවිතයේ කුණාටු වලින් ආරක්ෂාව සහ රැකවරණය සඳහා ඔබට මගපෙන්වීමට ගැලවුම්කරුවාණන්ට ආරක්ෂාව සහ සාමය ලබාදෙන්නට පුළුවන්.
ප්‍රේමනීය ධර්මිෂ්ඨ පවුල් වල අත්දකින ප්‍රීතිය, ප්‍රේමය සහ ඉටුවීම මගින්, සාමය හා සතුට යන දෙකම ලබාදෙන බවට මම ඔබට සහතික වෙනවා. අපගේ හදවතේ සහ නිවෙස් වල සයොනය තිබීමේ කේන්ද්‍රය වන්නේ ආදරය සහ කරුණාවයි. 29
පස්වනුව: අපේ අනාගතවක්තෘවරයාගේ වර්තමාන අවවාද අනුගමනය කරන්න
ස්වාමින්වහන්සේගේ අනාගතවක්තෘවරයා වන සභාපති රසල් එම්. නෙල්සන්ව අනුගමනය කරන විට, අපේ සාමය බෙහෙවින් වර්ධනය වෙනවා. අපට තව ටික වෙලාවකින් ඔහුට සවන්දෙන්න අවස්ථාව ලැබෙනවා. මෙම කැඳවීම සඳහා ලෝකයේ අත්තිවාරමේ සිටම ඔහුව සූදානම් කරලා තිබෙනවා. ඔහුගේ පුද්ගලික සූදානම වඩාත් කැපීපේනවා. 30
අපගේ ගැලවුම්කරුවාණන් වන යේසුස් ක්‍රිස්තුස්වහන්සේ මෙන් වීමට අපි වෙරදරන විට “නොසන්සුන්කාරී කාලයන් තුළ පවා අපට සාමය සහ ප්‍රීතිය විඳිය හැකි” බව ඔහු අපට ඉගැන්වුවා. 31 ස්වාමින්වහන්සේගේ පවිත්‍ර කිරීම, සුව කිරීම, සහ ශක්තිමත් කිරීමේ බලය ලබාගැනීම සඳහා “දිනපතා පසුතැවිලි වන ලෙස” ඔහු අපට අවවාද කර තිබෙනවා. 32 අපේ ආදරණීය අනාගතවක්තෘවරයා තුළින් ස්වර්ගයෙන් එළිදරව් ලබාගෙන ඇති බවටත් එය අඛණ්ඩව ලබන බවටත් මම පුද්ගලික සාක්ෂිකරුවෙක්.
අපගේ අනාගතවක්තෘවරයා ලෙස අපි ඔහුට ගෞරව කර ස්ථිර කරන විට, අපි නමස්කාර කරන්නේ අපගේ ස්වර්ගික පියාණන්වහන්සේට සහ අපගේ ගැලවුම්කරුවාණන් වන යේසුස් ක්‍රිස්තුස්වහන්සේටයි. අපට දේවසේවය කරනු ලබන්නේ ශුද්ධාත්මයාණන්වහන්සේ විසිනුයි.
ලෝකයේ ගැලවුම්කරුවාණන් සහ මිදුම්කරුවාණන් වූ යේසුස් ක්‍රිස්තුස්වහන්සේ විසින් නැවත පිහිටුවනු ලැබූ සභාවට නායකත්වය දෙන බවටත්, මගපෙන්වන බවටත් මම මගේ පුද්ගලික ප්‍රේරිතවර සාක්ෂිය ඉදිරිපත් කරමින් සාක්ෂි දරනවා. උන්වහන්සේගේ ජීවිතය සහ වන්දිගෙවීමේ මෙහෙවර යනු සාමයේ සැබෑ ප්‍රභවයයි. උන්වහන්සේ තමයි සාමයේ කුමරු. උන්වහන්සේ ජීවමාන බවට මාගේ ස්ථිර හා දැඩි සාක්ෂිය මම බෙදාගන්නවා. යේසුස් ක්‍රිස්තුස්වහන්සේගේ නාමයෙන්, ආමෙන්.