Te Mwananga ni Boobwai

I nako ni boobwai ma tinau ngke I a kunea naba te kamumun ae rooro ae I rangi n tangiria. I karina te kamumun ao n otinako ni kaotia nakon tinau. E bon iango moa imwaain ae e taetae, “Becky, I taku bwa e rangi ni kororo.” I kaeka bwa I taku bwa e aki ao I kaotaa bwa nikabane ataeinaine ake n te reirei a bwaini aekakina—tabeman a bwaini aika kororo riki. I kataia tabeua te miniti ni imanonoia bwa e na tangira te kamumun.

Ni kabaneana ao e bon kamatoa tinau n taekinna, “E rangi ni kororo. Ti na aki kabooa. Naako onoiko.”

I aki ota bwa e aera e bon rangi ni matoatoa nakoiu, ai moaraariki ngkai I a namakina ae I a bon ikawai ni babaire ibukiu bwa tera ae N na bwainna. E aki nakoraoi mwanangara ni bobwai, ao ti okira mweengara ma te aki ngoongo.

Ni kabaneana, e taetae tinau: “Becky, bukin ae I aki kariaia bwa ko na kabooa te kamumun bwa e aki tararaoi n ai arom. E bon rangi ni kororo te kamumun ao e aki kaotia bwa antai raoi ngkoe. Ngkoe bon natin te Atua.”

Ana kabwarabwara tinau e reireiai te moan tua bwa N ururinga n taai nako. Ngai bon natin te Atua, ao bwaai nikabane ake I karaoi ao ake I kaoti ni kunnikaiu a kaota te bwai ae I iangoia ibukiu ao e kanga aron au namakin ibukin Tamau are i Karawa ao au Tia Kamaiu.

Bwainakin kunnikai aika riai bon te kaiangatoa ae teimatoa, ma I kakaitau bwa I aki iranako nanou ma ni karika te kaiangatoa nakon anua aika tamaroa. I ataia bwa ngkana ti bon ota raoi n te koaua ae ngaira natin te Atua, ti na bon tokanikai iaon nanora bwa ti na kunnikainiira n aron te aonaaba.