Ukoukoran Au Onimaki

N namwakaina tabeua ake imwiina, I aki toki n titirakinai, “Tera ae I kakoaua? Ae kakaawaki riki, tera ae I kakoaua? Bon iai te Atua, ao, ngkana ngaia anne, e kanga aron Taraakina? I kona ni kinaa? E kona ni kaekai au tataro? E kona n reke au onimaki n aroia Aika Itiaki ni Boong Aika Kaitira?”

Tiaki nanona bwa I tuai ni karekei iangoan aekan titiraki aikai mai imwaina; inanon ririki aika mwaiti ao tabeman raoraou bon Aomata Aika Itiaki ni Boong Aika Kaitira. Te iraorao aei are e a karika riniu n te BYU. Ma n taainako ao I a tia n totokoa aia iango ibukin tibwauaan te euangkerio. Tabeua te tai are I a tia ni kaitibo iai ma mitinare, I aki kakauongo raoi nakoia.

I rangi ni maaka te bitaki are e kainnanoaki, bitaki ake a na kona ni karaureai n reitakiu ao au namakin ma au utu. I aki tangiria bwa N na kakoaua ae I a tia ni bure ke au katei a bure. I aki kakoaua ae I kona ni karekei kaotioti mairoun te Atua ke a kona naba ni karekea tabeman aomata. E tara n aki riai, n aki baireaki raoi, ao ni kamiimi ae na kaoti te Atua nakon te ataeinimwaane ae Iotebwa Timiti, ae na karekei booki aika tabu aika boou, ao bwa ti teuana te aro ae a tia ni karekea te kairi mairoun te Atua ibukin kateana bwa te Ekaretia ae koaua.

E boni kamiimi, bwa I raraoma ni koauan aro ni kabane, n ikotaki ma au aro. Ngke e onrake nanou ma te tangira ibukiia au utu ma raoraou, te nano are e tangira te kaeka, ngke e a roko ana wirikiriki te Tamnei, e matoatoa nanou n aki kan ongora.

Imwiin banen au moan ririki I oki nakon mweengau i Kentucky n reita nako au reirei. Raoraou Aika Itiaki ni Boong Aika Kaitira a oki ni karaoa aia mwakuri ni mitinare, ao I namakina te maroa ngke a nako. I tangiria ni karekea te namakin are a tia ni karekea n anga maiuia inanon uoua te ririki. N te tai aei, I teimatoa n tabeaianga, ngkai e tuai man reke te kaeka nakon ana titiraki Matt. I tangiria ni kan atai taian koaua i bon irou. N tokina, imwiin karekean au reta ni kaunga nano mairouia raoraou aika mwaiti bwa n na reitaki ma mitinare, I tokanikai i aon te maaku ao I a kariaia.

E ngae n anne, e reke irou te nanououa ni kaineti ma te iango are moan tuua n te euangkerio a bane ni irekereke nakon te kaantaninga ae ti teuana. A kakoaua mitinare bwa ngkai aia rongorongo, n aroia ni kabane, a kona ni bane ni koaua ke ni kewe, ngkana I karekea au koaua ibukin teuana te moan tua, ao I kona ni butimwaai aia reirei ni kabane.

I aki kakoauaia. I taku bwa e kariaiakaki bwa I kona n anaa ke n rinea ae I tangiria ni kakoaua mai buakon rinerine aika karinanaki ibukin te maiu n tamnei ao reirei.¹ N te tai naba anne, aron reken au iango e boboto iaon te bwai ae e a tia ni kakoauaki bwa e koaua, ma tiaki te rairaki man te onimaki.

Te kangaanga, bwa au iango e bon katukai naba n aki kukurei ao n aki rau nanou. Iango ni kabane ni kauntaeka n au iango a bon kauntaba n akea raoi koauaia. I a manga tangiri riki bwaai tabeua, ake a na kona n reitaki ma nanou n aron aia kabwarabwara raoraou ma mitinare ibukin te reitaki ma te Tamnei ae Raoiroi. I raonia n aia reirei mitinare n te kantaninga are N na kona n ataia bwa te bwai are a taekinna a bane ni koaua ke, ni kauarerekeana, ni karekea te raunnano n ataia bwa a kewe.

A teimatoa mitinare n aki maaku n taetae. Inanon tabeua namwakaina, a reireinai marooro aika mwaiti man mwaiti naba aia tai ae a tuangai bwa N na bwabetitoaki, ma I teimatoa n taekina ae I aki. I tataningai kanikina aika kamiimi ake a na kona n anganai te bwai ni kakoaua imwaain are I butimwaea aia kakao. I aki karekea te bwai ni kakoaua anne, ngaia are I teimatoa n aki butimwaea aia kakao.

N te taina ao Unimwaane a wareka te kibu teuana man Ana Boki Moomon: “Tai kauntaeka bukina bwa kam aki nooria, bwa kam bon aki kona ni kareke te bwai ni kakoaua ni karokoa ae e kataaki moa am onimaki” (Ita 12:6). Imwiina ao a taku, “Josh, n taainako ngkana ti kaoko bwa ko na bwabetitoaki, ko taekina I aki. Te bwai ae ko riai n taekinna bon eng, ao mai ikanne are e na kamatoa nakoim te Tamnei ae Raoiroi.”

N taekana riki teuana, I tuai karekea te bwai ni kakoaua bukina bwa I tuai ni kataa au onimaki. I a tia n aki iangoia moa ma I titiraki, ma ni kakoaua bwa n na karekea n aki kataia (tara D&C 9:7). I a tia n tuuka te Tamnei man karekean te bwai ni kakoaua nakoiu bukina bwa I aki tangiria ni toua te mwaneka are imwiina. Te bwai ae I riai ni karaoia bon karaoan te rinerine ae boboto i aon te onimaki imwaain karekean te bwai ni kakoaua. E na roko te bwai ni kakoaua imwiin ae I kataa au onimaki, tiaki imwaina.²

Te moan ni iango are e reke irou bwa a tia mitinare ni kakaea te anga are n na bwabetitoaki iai. Ao e bon riki nakoiu bwa n te tai anne ngke I aki butimwaea te kakao nakon te bwabetito, iai te bwai ae uarereke e kitana nanou. Bon te namakin ae rau ae teimatoa, man maraara, man aki kaantaningaaki are e kaumakai bwa N na iriri aia reirei mitinare, ma I tuai kina aron rokona ni karokoa e a manga nako, ni katukai n nanououa, n aki kukurei, ao n nanokawaki.

I iangoia ngkana te namakin ae maraara aei bon te Tamnei ae Raoiroi ae kitanai ao ngkana reken au nanououa e reke man nanou ae aki kakoaua are e totokoia nako. N akean riki te kawai, I a iangoia bwa N na kata aia kakaewenako mitinare. N na taekina ae kangai eng nakon te kakao ae na bon roko, ao ngkana I namakina te Tamnei ae Raoiroi n aron are a berita iai nakoiu, ao N na bon bwabetitoaki. Ma e ngae n anne, ngkana I aki namakina te Tamnei ae Raoiroi, I bon rangi n tauraoi n tuangiia mitinare bwa I bon manikangare.

Tairikin ara tai n reirei are imwiina ti mataku n ana tamnei te Ekaretia ae boou, The Prodigal Son. Iai te namakin ae onoti inanon te ru, a rootaki mitinare, a onrake mataia n te ran ni mata.

Imwiin banen te tamnei, ti wareware man booki aika tabu. Imwiina e tanrikaaki nakoiu Unimwaane Critchfield man titirakinai, “Josh, ko tauraoi ni bwabetitoaki n te Kaonobong, Nobembwa 19 n te aua 4:00 n te bwakantaai?”

I kaeka ma te nanououa, “Ngaia.”

E rootai te Tamnei ae korakora are e a uere iai kunin baiu, ao e kaan ae n na tang. Akea te nanououa bwa e a tia n roko te bwai ni kakoaua are e a onea mwiin au aki kakoaua. I a tia ni kata au onimaki, ao I ataia ma te aki nanokokoraki ae N na riai ni bwabetitoaki.

I a tia ni karekea te kakoaua n aron tamaroan koraan te onimaki, ma n na nooria moa n rikirake ni kariki uaa (tara Aramwa 32:35–36), ao I tuai n noori kakoauaan moan tuua n te euangkerio ake tabeua. Kataakin au onimaki e tuai n toki.

E aki maan imwiin bwabetitoakiu ao kamatoakiu, a manga roko nanououa n au iango. I namakina te bobuaka n iango n au atatai are I karekea ngke iangoia bwa N na bwabetitoaki ao au iango ngkoa are e aki butimwaea te onimaki are boboto iaon te atatai.

N te tai ae aki maan ao e a manga oki te namakin n nanououa ao te nanokaawaki, ao I aki ata raoi te bwai ae n na kakoauaa. E ngae n anne, I a tia ni karaoa te boraraoi, ao I atia ni motikia bwa N na teimatoa ni kakaonimaki inanon te Ekaretia ao ni maiuakin tuua ake I a tia n reireinaki ni karokoa ae bitaki au nanououa ni kataakin au onimaki n te anga teuana ma teuana.

E aki katukai n ti ngai te Uea bwa N na rinanon kataakiu n ti ngai. I anganaki nakoau bwa N na ibuobuoki ma mitinare, ao ngkana ti mwananga ni kakaeia aika kan reirei ni katoa wiiki, aki toki mitinare ni kairirai. A rang ni kakaonimaki au taan reirei n te mweenga. Raou ni kakawari e teimatoa n rooroko i aon te tai. A mwaiti kaain te uoote aika e rikirake aia iraorao ma ngai ni kairai ibuakoia, a kaoai nakon mweengaia nakon aia katairiki ao aia bootaki n utu n te tairiki. A tataro ma ngai ao a tataro naba ibuku. Te bitiobi ma ana utu a rangi n tabe ibuku ao a kaungaai. I kona n namakina te nano ni koaua ae nako mai nanoia, ao anne e kakorakora nanou.

N te bong teuana, tabeua te namwakaina imwiina, I kakoaua bwa n taainako ngkana I wareka Ana Boki Moomon, I namakina te beebete, namakinan te rau, kanga ti tebo ma are I namakinna n tain te marooro ao te kakao nakon te bwabetito. Iai namakinan te oota: aio bon te Tamnei. Ngke I tabe ni iangoi taeka—“Ngkana aio te Tamnei, ngkanne e na koaua te boki aei”—te namakin anne e rikirake inanou, ao au onimaki e bitaki nakon atatai n te maiu n tamnei n te moan tua anne.

Ngkana e teimatoa nanou n riki ni “uruaki” ao tamneiu e rikirake n “raraoma” (tara Ita 4:15), ao a na raonaki n atatai riki ake tabeua. N te tai aei ao raraomau a oneaki nakon te onimaki ae korakora. I ataia ae te Atua e maiu, ae Iesu bon te Kristo, Iotebwa Timiti bwa a na burabeti te Atua, tiaki n oin wanawanau ke man aia kairoro tabeman, ma man ana wirikiriki te Tamnei ae aki kona ni kakeweaki ae taetae nakon tamneiu. E kaukaki au iango n te reirei teuana imwiin teuana (tara 2 Nibwaai 28:30). Ngkai a tabe n rikirake imarenaia kamatoakin atatai, e tabe n rikirake au atatai i aon te euangkerio, ao e waekoa n roko riki ataakin te tamnei. Atatai n tatabeua nako a tangira te karaurau ni mwakuri, te nano ni kan kakauongo ao ni iriiria, ao te nano ni kan karinerine nakon ana wirikiriki te Tamnei (tara Motiaea 3:19).

I kona n atongnga ngkai bwa e koaua te euangkerio, bwa I a tia n reiakina aei i bon irou. Ngkoa e tara ni kamiimi ao ni mangaongao te euangkerio; ngkai I a oota iai ao ni kukurei iai. Moan tuua n te euangkerio a bane n iai rekerekeia nakon te bwai ae ti teuana. E ngae ngke e aki tau au atatai n taian tua, ngkai ngai te mitinare I kona ni kakoaua ibukin koaua aikai. Ngkai e rikirake au atatai n taian tua, ao e na rikirake naba au koaua.

Te kakoaua are I a tia ni karekea ibukin moan tuua (n te euangkerio) aika kakaokoro e mwakuri n ai aron te kamanomano ae baireaki raoi man teimatoa ao e karikirakeaki bwa e aonga ni kona ni kaitarai kangaanga. E kamatoaai rinanon kakaewenako ake I a tia n rinanoi, riki ana mwakuri korakora te riaboro ni karikai bwa N na nanououa ni bwaai ake I a tia ni karekei kaekaaia (tara D&C 6:22–23). Ngkana I namakina te mamaara, ngkana a roko nanououa, ngkana a teimatoa n roko maraki, I kabonganai katooto man koaua ake a tia n reke man te tai are I moan karekea iai au kakoaua. I katoai ni iangoi bwaai ake I rinanoi ake a karikirakea au koaua are I a tia ni karekea, I kakorakoraai ni maiuakin moan tuua ake I a tia n reireinaki, ao I kakauongo raoi ngkai e kamatoa au onimaki te Tamnei.

E koaua te euangkerio, bwaai ni kabane iai, ao a butimwaeaki ni kabane ake a na kata aia onimaki ni karaoa aia rinerine ae boboto i aon te onimaki. Otan te Tia Kamaiu e mena ikekei, are raba man akean nanora ni ukoukoria. E na rawata kangaanga inanon maiura ke taai ake a na kataaki iai ara kakoaua. I kunea bwa ootan te Tia Kamaiu e tataningaira ngkana iai nanora ni Ukoukoria, ao te oota anne, ngkana ti teimatoa ni ukoukoria, ao e na kairiira nakon te rairaki.