Te Maekatiin Ni Maati 2008: Te Ribooti

A koroboki kaain te Ekaretia aika mwaiti ngke a kaoaki bwa a na tibwaua aia namakin ao aia atatai ma te maekatiin ni Maati 2008, ni kaota aron bebeten aron rootakin oin maiuiia. Man te Philippines, Maria Felina Ferrer e koroboki: “Ai bon au moan tai inanon 29 te ririki ae I a tia ni maiu inanon taetaekinana ao korean Rongorongona. I namakina otan itiakin maiun te Tia Kamaiu. Bon tiaki te atuniango, tiaki ti te karaki. E bon koaua. … E karekea te bitaki ae korakora inanou. N taabo nako ike I nako iai ao n te bwai are I karaoia ngkai, ao I onimaki bwa te Uea Iesu Kristo, ni Mwaakana ni kabane, e noorai ao e tei irarikiu. Te koaua anne e karaoai bwa N na riki bwa te aomata ae tamaroa riki.”

Tom Kunz mai Magnolia, Texas, USA, e taku: “I rangi ni mweengaraoi imwiin ae I a tia ni wareka te maekatiin ao I tangiria ni kan tamaroa riki n aron rikin maiu ni kabane. … I namakina ana tangira te Tia Kamaiu ibukiu ao mimitongin ana Mwakuri ni Kamaiu n te kawai ae onoti.”

Linda Buysse-Vergauwen, ae angareirei n te reirei teuana I Belgium, e mwananga n ana kamatebwai teuana ma raona ao e anganna katooton te maekatiin n Maati ma te taeka ae onoti ao te kakao bwa e na roko n ongora ana taetae n te Taromauri n Tabatin te Itita. E nako te rao ao e karekea te namakin ae tamaroa. “Te maekatiin ae onoti n te Riaona e anga te tibwanga bwa e na katukaki te kora ae uareereke inanon temanna te rao,” e taku Sister Buysse-Vergauwen.

I California, USA, iai iroun Lori Larson ana Ensign ni Maati n ana titoa ni katikiraoi ao e kakorakoraaki mai iai. E reitinako ni iangoia bwa a na kanga taian karaki n rangi n tamaroa bwa a na tibwauaaki ma temanna n te aro teuana ao a na kanga ni kaitiaki aia iango aika a bareka iaon rongorongon te Ekaretia. Imwiina e titiraki ana tia katikiraoaki iaon te maekatiin are e warekia. Imwiin naba te tai are e tia te boontaeka ao te marooro, e tuatua te tia katikiraoi bwa a na kawaria mitinare.

Telma Chacón mai Guatemala City, Guatemala, e kabooi 12 katooton riki te Riaona ao e kabongana tain te motirawa n te Itita n tibwaua te maekatiin ao ana koaua nakoia tarina ma mwanena. Patricia Hegedus mai Cardston, Alberta, Canada, e kanakoa te katooto nakoia taanga i German are e riki bwa raoraoia ngaia ma buuna tabeua te ririki mai mwaaina. A butimwaia ma te kakaitau ae e kaairaki ma te berita bwa a na bon warekia. Te utu ae te Allan Harvey mai Krugersdorp, South Africa, e kabooa 12 riki katotoon tatara ni boki ao n tibwatibwaia nakoia utu inanon te kawai.

A karekei tibwangaia taian iunite n te Ekaretia n katooton te Ensign ke te Riaona aka a aki kabooaki bwa a na kabongana n taian bootaki ni iraorao, te kamarurung, ao te mwakuri ni mitinare. I England, te Chorley titeiki e bairea te kaotioti ae onoti ibukin te Itita ae a bon kaoaki iai raao, kaain rarikiia, kaain te Ekaretia aika a aki kakaonimaki, ao ai Iruwa aika a Kakannato. Iruwa n tatabemaniia nako a karekei katooton Ana Boki Moomon ao katotoon te Ensign ni Maati 2008.

I Nigeria, aine n te Bootaki n Aine n te mwakoro ae te Ile-Ife, ngkai bon mwakoron ana bukamaru ni mwaakena koro-n-ririki te Bootaki n Aine, a kawara te karabuti n abaia ao n tibwatibwa katotoon kanoan Maati. Te Newcastle-Under-Lyme titeiki i England e nooria bwa ni kabane utu n te titeiki a na bane ni iai aia katooto ao aia kakao bwa a na kaea te bootaki n toa ae onoti iaon Taabatin te Itita. Teuana mwiina bwa temanna te mwaane ae e a tia n aki kakaonimaki e aki maan imwiin bwabetitoana inanon ririki n te 1980 e rootaki ao ngkai e kimwareirei n taian kakabwaia man te euangkerio inanon maiuna.

A mwaiti aika a koroboki n taekinna bwa e kanga te maekatiin iaon te Tia Kamaiu ni buokiia ni kaitikii taian aki oota iaon rongorongon Ana Ekaretia Iesu Kristo Ibukiia aika Itiaki Ni Boong Aika Kaitira. Barbara Mayes mai Flagstaff, Arizona, USA, e ribootina te tabeka teuana mairoun te aine are e a rin n ana auti bwa e na kaitiakia: “I tia n atai bwaai aika a bati ake a kamataata nakon te iango bwa ko kakoaua Iesu. E kanga n riki anne? Ngkami akana uoman bon kaain te Moomon. Kiritian ngkami?” Titita Mayes e anga katooton te Ensign ni Maati ao a moana aia marooro. “Ngke e wareware, e reitinako n tabeki titiraki aika kakaawaki, ao e te nano ae e a tia ni in e a uki,” e taku Titita Mayes.

Te utu ae te Mike ao te Shaz Kramer mai Garwood, New Jersey, USA, a booa aia bootaki ni kukurei ni moan riki te ririki are a kaoaki iai aika mwaiti aika tiaki–utuia Aomata Aika Itiaki. Teuana te utu e waekoa n roko ai ngaia are e reke ana tai n titiraki iaon rongorongon te Ekaretia. Raoraona ae te mitinare e a tia ni kaotia nakoina ae ti aki kakoauaa Iesu Kristo. E taku Tari Kramer, “I a kaman roko ao n anaa te Ensign ni Maati, ma tamnein te Kristo iaon tinanikuna, ao e titiraki, ‘Aei kanga bon taraan te aro are e aki kakoaua Iesu Kristo?’” E uota nako te maekatiin te mwaane aei ao e kaitibo ma mitinare imwiina n te wiiki anne ao e tabeki riki ana titiraki aika bati.

Te maekatiin ni Maati 2008 n te Ensign ao te Riaona e bon teimatoa naba n tauraoi rinanon ana tabo n tibwatibwa te Ekaretia. Ana rongorongo ae rangi ni bati iaon rongorongon te Tia Kamaiu e karikia bwa e na bongana tiaki ti ibukin te Kiritimati ae e na roko ma te Itita, ma n te tai are a tangira iai te karaunano kaain te Ekaretia, bwa a na reiakina te reirei ae koaua, ao n tibwauaia nakoia tabeman te koaua ae e matoatoa iaon te Uea ae Iesu Kristo. E mena iai te kabwarabwara ibukin maiuia riki aika a mwaiti ake a na manga buokaki.