Taratara Raoi n Te Aoti te Kai
Ko a tia n ataia bwa e kanga aron ara otabwanin ni iai mwaakana ni kairiira ara mwakuri ao n rooti aron anuara? I ururing, ngke ataein te reirei ngai, ngke I kaaina te marooro ma te tia reirei are e kaota te irekereke n te kakae n ana mwakuri te otabwanin ma rikiraken te karaobwai n te tabo ni mwakuri. E taekinna bwa bwaai aika kanoan ara tabo ni mwakuri tabeua, a kaungaia taani mwakuri bwa ana mwakuri korakora ma te nanomwaaka, ao bwain tabo tabeua a karika te aro ni kaunga ae rangi ni kaitara anne. Te iango bwa bwaai aika a tara ni beebete aikai a kona ni iai rekerekeia n aron ae e bon rangi n ana nanou.
E taekina naba te mwakuri ni kakatai are kaainaki irouia aomata ake a tekateka n te taibora n tauraoi bwa a nang kana kanaia are e a tia n tauraoi i mataia. E ngae ngke e a bora te baki irouia taan amwarake ao ni kaota nanoia ni kan kana te amwarake, e a rootaki naba rinin kanaia n te aro ae korakora man bitakin te taura inanon te ruu. N rimwiin te bitaki n te taura, a mwaiti aika a aki amwarake, tabeman a kana ae rangi ni uarereke, ao, ae moan te kamimii, bon akea mai rouia taan amwarake ae e kukurei n te amwarake.
Te iango bwa te amwarake ae kangkang e na kona ni kabua kangkangina ibukin tauran te ruu ae e bitaki e boni kaota mwiin te mwakuri ae riai ao te mwaaka ni kairiiri man bwaai aika a mena irarikira nakon kateira.
N ririki aika bati imwiina, n tain au karikirake, I kaoaki iroun temanna te tia kan buokaki bwa N na karekea te katantan ibukin kabomwi n te uruaki ibukin te karikirake a e boou are e tibwa moanna. Ngke I a roko n te tabo anne, I kunea bwa ngaia te tabo ni karikirake n te taenti.
Ngke ti a toua nanon te tabo ni butimwaai, n rinnako inanon te katangaina, I bon kukurei n tein bwain nanona. Bwain nanona ao katamaroa, taian keeten ao nangoan aon te timanti a bane ni toaraoi ma karaia, ao a karekea te tabo ae moan te kabanea ni kakukurei. Tiaki aei ae I kantaningaia bwa N na kunea imwiin ae I a tia n tuangaki oin te kantaninga bwa te tabo ra ae e na kabonganaaki. Ngke I tekateka ma te tia bwaibwai, ni karekei taian rongorongo aika a bongana, e a roko te tia kamwakuri ao n tuatua ngkana e kona n tuoi tangin katangitang ao tein taian taura.
E anga ana kariaia te tia bwaibwai. N te tai ae karina e a ti korakora naba bitakin te tabo ngke e karooaki tauran te ruu man oneaki mwiina n taian taura aika a matamata man ruberube, ma te katangitang ae rangi ni karongoa. E waetata n uruaki te tabo ae rau.
E bon rangi ni kangaanga te marooro n te aekaki n aro aei, ai ngaia are ti a rianna n oki nakon te tabo ni butimwaai. N rimwian tabeua ara marooro ao ibukin ae iai te bwai ae I a tia n ataia, I aki namakina te mweengaraoi n reitianako, ai ngaia are I a karekea te reitaki i marenan te tia kan buokaki irou ma te tia rabakau iaon te aekaki ni mwakuri ni kamanomano aei. Nakon te bong aei I teimatoa ni uringa te bitaki ae korakora are e riki man otan taian taura ao rurun te katangitang ae rebwetaua inanon te ruu ae roo.
I reiakina te reirei ae teimatoa n ururingaki man taian namakin aikai. A kona ara otabwanin ni karika mwiin te mwakuri ae kakaawaki iaon aron ara namakin ao anuara.
Aio teuana bukin ae ara taan kairiiri a reireiaki bwa ni kabane waaki ni kakukurei ake a boutokaaki n te Ekaretia a riai ni karaoaki n te tabo ae e kona ni mena iai Tamnein te Atua. Iangoa raoi te reirei aei. Ngkai iangoa aron ana waaki ni kakukurei n te Ekaretia. Tera ae ti kona ni karaoia bwa ti na kakororaoa ana kaantaninga te Uea ni kaineti nakon taian waaki ni kakukurei n te Ekaretia aika a tamaroa ma ni kakukurei?
Te Aoti ae Trojan
N au tai ni kairake ao I rangi ni mamatenako ni karakin Greece ae te Trojan Horse. Tao ko na uringnga ae ana taanga ni buaka Greece e a tia ni kan taua te kaawa ae Troy inanon 10 te ririki ma aki kona n ninia oona.
N tokina ao tenaan Greek a bakaea te keerikaki, ma a katuka imwiia te aoti te kai ae te toa kaei ma te taanga ae korakora aika a tauraoi n un ake a karabaaki inanona. A kakoaua taian Trojans bwa te aoti boni kanikinaean ae raoiroi ao, e ngae ngke tabeman a totoko nako iai, a uotia ni karinna inanon oon te kaawa. N te tairki ao taan buaka ake tenaan Greek a otinako man aia tabo ni karaba ao a kauka mataroan te kaawa, ni kariniia ana taanga ni buaka Greek ao n taua taekan Troy.
Ti riai naba n taratara raoi man taian mwakuri nako ake a babaireaki bwa a na urua katanara ma te iango ni kan urua katanan ara onimaki! A kona ni karekea katanara mweengara ao ara tabo n taromauri are riki man te angibuaka ni bwaikorakin te aonaaba aika aki riai, ni kakorakoraira bwa ti na “nanomatoa ao n aki kamwaieaki, n tei n taai nako ni mwakuri aika raraoi” (Motiaea 5:15) ao n teimatoa “n tei n taabo aika a tabu” (D&C 45:32).
Te kabwaka n aron te tararua e kona ni karikiia tabeman bwa a na kabuai maiuiia n tamnei aika teimatoa ngkai ni butimwaai katangitang aika a aki tamaroa ao waaki ni kakukurei aika aki riai. Butimwaean bwaai e kona ni kaikoakiira mai inanona, n ai aron te aoti te kai are e uotaki nako nanon te bwai are e a tia n rangi n riki bwa te mataroa ae kangaanga kamwaeieana.
Ara kaantaninga ni bairean ao katauraoan waaki ni kakukurei a aki riai n riki bwa a na katootonga ke ni ira te aonaaba ma e riai ni karekea nakon te otabwanin Tamnein te Uea bwa e na kona ni maeka iai. E karaoaki aei n taabo nako ke n taai ake e mwanenaki iai te waaki ni kakukurei iroun te Ekaretia ao e riai ni kairaki iroura ngkana ti na rineia bwa te tamnei ra ae ti na mataku iai, ana burokuraem te kaombiuta ra ae ti na mataku iai, ke aekakin bootaki ni kakukurei ra aika ti na iri iai. Ti riai n anga ara iango aika kaineti nakon waaki ake a irekereke ma kabonganaan ana kateitei te Ekaretia, ngkai a kakabwaiaki ma n katauaki tibwangaia ibukin waaki ni kakukurei aika a “raoiroi, a kakateke, ke a tamaroa rongorongoia, ke a kamoamoaaki” (Taekan te Onimaki 1:13).
Ngkana e na kaea te waaki ni kakukurei te Tia Kamaiu n ana auti n taromauri te Ekaretia, e na kabotauaki Ana kaeka nakon are ngke E kanakoia taan rairi mwane ni kaotinakoia man te tembora i Ierutarem (tara Mataio 21:12–13)? Ke E na, kaota ana namakin n ai aron Betero ngke e mena n te Maunga n Onikaki: “E tamaroa menara ikai” (Mataio 17:4)?
Beretitenti Gordon B. Hinckley’s (1910–2008) e reirei ni kaineti nakon bwaai aika a tangiraki ibukin te mwakuri ni mitinare ae bwanin taina e irekereke ma te atu ni iango aei: “I nanomatoa bwa kakorakoraan te kabaeaki ibukin bwaai aika a tangiraki e na karikiia ara kairake, e kaineti riki nakoia ara kairake n ataeinimwaane, bwa a na kataneiai ni barongaan aroia, ni maiuakina te anua ae e rangi n tamaroa nakon are e maiuakinna te aonaaba, n totokoi riaoakin tuua ao ni kaeti kawai riki ni waaki ni kakukurei nako.”1
Ma taeka aikai n ara iango, ti na uaia ni kakorakoraira ni baaire ao ni uaia ni irii waaki ni kakukurei aika a tamaroa man maiuakinan bwaai aika tangiraki ao ni kararoaira ma ana waki te aonaaba.
E na kona te waaki aei n tiatiana ao ni kamaunai aekaki nako ni kakukurei man ara bobotaki nako? Tiaki ngaia! N te koaua, e na bon koaua are kaaitarana. Ni karietataan te waaki ae ti bwainna, ti na kaitarai taneiai aika a na kamaeua ara ururing aika a teimaan, aika a kaineti ma te berita ibukin te baaire ni kakukurei ae korakora.