I Tangiria Riki Bwa N Na Kakabwaiaaki!

I Guyana, te aba ae mena i meangin mwakoron South America, kaain te Ekaretia aika te roro ae tebwi tabun te ririki a taetae iaon te kabwianibwai ao mwaane n aki mamatam.

“I tangiria riki bwa N na kakabwaiaaki!” e taku Simeon Lovell, 14, n tain te reirei n te tieminari n te auti ni bootaki i Prashad Nagar i Georgetown. Kaain te kiraati a tibwa wareka Maraki 3:8–12, are e kauring bwa naake a kimoa te Atua man aki kabwakaan te kabwianibwai a na bon kamaraiaki ma e berita bwa naake a kabwaka aia kabwianibwai a na karekei kakabwaia aika a korakora aika a aki kona ni warekaki.

“Tarai ni kabane bwaai aika e berita iai,” e taku raona n reirei ae Xiann Kippins, ae 16. “Ko na bon kamanoaki. Ko na rikirake ni kaubwai. E na uki wintoon karawa nakoim.”

Clint Callender, 17, man te Kauoua ni Mwaanga n te Garden Park (i Georgetown naba), e taku, “Bwaai ni kabane ake iaon te aba a bon roko mairoun Tamara are i Karawa. E tuatua ibukin ti teutana mai iai bwa e na kaokaki, ni buokiira ni kaota ara kakaitau. Ai ngaia are I rangi ni kukurei ni kabwaka au kabwianibwai. I kukurei n aki mamatam teuana te tai n te namwakaina ao n anga te mwane ni buokia ake a kainnano. Ao ngke I a noori bwaai aika e karaoi te Ekaretia ngke e roko te tunami, te angibuaka, ao kabuanibwai aika riiriki ake tabeua— ni kabane kunnikai ao taian amwarake aika a karokoaki man te Ekaretia —e kakukureiai iangoan ae bon ngai naba mwakorona man tituaraoiu ma au mwane n aki mamatam.”

N te tabo riki teuana n te Mition ae West Indies, Curfew Ali ae 17 ana ririki man te Mwaanga ae te Arima n te Uaabu i Spain, Trinidad, e kabwarabwara nakon Mark Mangray, ae 17 naba ana ririki, bwa e ngae ngke e kakarekea ana mwane ae uarereke, e kabwaka 10 te betienti man ana raka bwa ana kabwianibwai ao e anga naba nakon te mwane n aki mamatam. “N te kawai anne, I ataia bwa e mwaawa te Uea ibukin kakabwaiaau,” e taku. E taetae nakon Mark iaon irakin te waaki ibukin rinanoan mwiin kabwakaan te kabwianibwai ao ai tamaroara aron namakinan ae e katanoataaki bwa e a tia ni kabwaka ana kabwianibwai ae bwanin .

E tara te beeba ni kabwaka mwane ae e tuai kanoaki Mark, e warekia, ao ma n taku, “Ko koaua, Curfew. N na uota au kabwianibwai nakon te taromauri ningabong.”