IANGO IBUKIIA TAAN REIREI N TE MWEENGA

A kona ni kabonganaaki iango ibukin te anga reirei n te umwanreirei ao n te mweenga. Ko kona ni kabonganai iango aikai nakoia kaain am utu ke kaain te kiraati.

“Ukoukoran Au Onimaki,” iteraniba 8: Maroroakinna bwa tera te kakoaua. Karakina ana karaki Iotua. Wareka Ita 12:6, ao titiraki bwa tera nanon te kibu aei irouna. E kanga ara onimaki ni kataaki n te aro bwa e na rikirake ara kakoaua? E kanga Iotua ni karikirakea ana onimaki imwiin are e bwabetitoaki? Kaoia kaain te utu bwa a na tibwauai aia kakoaua.

“18 Kawai nakon te Teimatoa Ni Matoatoa,” iteraniba 25: E kona ni kabonganaaki te maekatiin aei ibukin bootakin te utu n te tairiki. Koroi 18 kainibaire iaon mwakorokoron taian beeba. Rinea teuana mai buakon mwakoron beeba aikai, ao wareka mwakoron te kaongora anne. Maroroakinna bwa e na kanga te kainibaire anne ni kabonganaaki n am utu. Ao manga rinea riki teuana, ao reitia nako ni karokoa e toki tangirana. Katuruturua bwa tera aron bonganan kainibaire aikai nakon maiura. Katea am kouru n iri kainibaire ake a taekinaki inanoia n tatabeua. Motikia man warekan te kibu “Waaki Nako ma te Onimaki.”

“Taratara Raoi n te Aoti te Kai,” iteraniba 38: E a tia Tatan ni biti aekakin aoti kaai ni boong aikai. Wareka karakinan te aoti ae te Trojan man te maekatiin, ao iangoa rinanoan booki, katangitang, ao tamnei inanon mweengam. Karaoia bwa te takakaro ae atunaki “E Kona Ni Kamaiuaki Te Bwai Aei?” Kawakin ti tamnei aika itiaki aroia, a raraoi, ke aika a tikiraoi ribooti iaoia ke aika a na karikirakeko (tara Articles of Faith 1:13). Motikia man warekan Motiaea 5:15 ao Doctrine and Covenants 45:32.

“Ibuobuoki Ao Ko Na Kukurei,” iteraniba R10: Karekea te tai aio ni kabwarabwara ke ni kateimatoa te beku ibukin kabwaninan rikiia kaain am utu. Koroi tabeua mwakuri aikanne (ni kaineti ma aia ririki ataei), ao titirakiniia ataei n tatabemaniia bwa ana rinea teuana ae a na karaoia. Wareka te karaki, ao maroroakinna bwa bukintera e kakawaki irouia aomata n tatabemaniia bwa a na ibuobuoki. Katea te kouru ni beku ibukiia tabeman inanon te wiiki ae imwaira aei.

“Te Katauraoi nakon te Mition,” iteraniba R14: Tuangiia kaain am utu bwa ana kakauongo nakon kawai ake e a tia ni karaoi Unimwaane Ulisses Soares ibukin ana mition. Wareka te reirei are e anganaki iroun ana bitiobi. Maroroakinna bwa a na kanga kaain utu nako ni katauraoia nakon te nakoa ni mitinare.