Te Onimaki are Katoka te Ieka
E a moanna ni kabuebue te bong i Helsinki, i Finland. E raneanea ootan tai, ao e a waekoa n ran te tino. I a tia ni mwakuri inanon aua aika a mwaiti ma natiu mwaane, Juha, waniua ana ririki, ao Hannu, onoua ana ririki, ni katoka iekan nanon ara ruu ni bwai are i aantano man te tino are e tabe n ran nako. Nnen te ran n ranga nako are e na riai ni butimwaea te ran are ikoikotaki e bon bono n te buraoki.
Ngke e nako buu te mwaane ni mwakuri n te ingabong anne, e tuangira bwa ti na kataia n aki karokoa te ran nako nanon ara auti ni bwai are i aantano. Ti mwakuri korakora ni karokoa te bwakantaai, ngke e a boo te tai n nako nakon te Moanrinan. (N te tai anne e kakaraoaki te Moanrinan ni bongin te wiiki.) E ngae n anne, I tuangia natiu mwaane, bwa a riai moa n aki kaea te Moanrinan n te aro bwa a na buoka katokan te ran n rin inanon te ruu ni bwai are i aantano. Irarikin anne, ao buu te mwaane bon tiaki kaain te Ekaretia, ao e na bon aki kona n ataa kakaawakin te Moanrinan nakoia natira mwaane.
A uaia, Juha ao Hannu ni kakoaua nakoiu bwa ngkana ti nako nakon te Moanrinan, Tamara are i Karawa e na bon kakoaua raoi bwa e na aki roko te ran n te ruu ni bwai are i aantano. I tara te neinei n ran ao imwiina i tarai mataia natiu mwaane aika onrake n te onimaki. E taku au iango are teuana, “Ko aki kona n nako ibukina bwa akea te mwaaka ae e kona ni katoka te ran are e na ieka te ruu ni bwai are i aantano.” I bubutia Tamau are i Karawa ma au tataro i nanou. I a karaoa ngkanne te babaire ae kangaanga.
“Ti na riai n nako nakon te Moanrinan ngkai!” I taekinna ngke I katikui bwaketi i aontano. N na aki tabeakina te bwai ae e na riki, ma I aki tangiria ni uruana aron aia onimaki natiu.
A rangi ni kukurei natiu mwaane aikai n aia tai n te Moanrinan. Ma ngke ti a buti nakon mweengara imwina, ngke ti a kaan roko n ara auti, e a moanna ni korakora maaku. Ngke ti a roko ibukin ara auti, a kawaekoaia ni biri natiu mwaane nakon mataroan te ruu ni bwai are i aantano. Ngke a tara nano, ao a takarua, “Tinara, tera are ti a tia n tuangko?” I kawaekoai n nakoia. I aki kona ni mwaninga te bwai are I nooria ni matau. Moan te mauu takataka te tabo arei, kanga ti tebo ma ae e a tia ni kamwauaki. Bon akea te ran ae e kona n nooraki. Ni karokoa ngkai, 40 te ririki imwina, e rangi ni matoatoa irou kakoauan are I a tia n nooria.
Raneanean mataia natiu mwaane e kaota te kimwareirei ao onimakinan Tamara are i Karawa. Te kimwareirei—ao te kakaitau—e kaona naba nanou!
Bon akea te mwaaka n te aonaaba ae e kona n tokanikai i aon aia onimaki ataei. A taekinaki ni booki aika tabu bwa ngkana ti kakoaua ao n aki nanououa, ao ti kona ni kamwaea te maunga (tara Mataio 17:20). Ma n te bong anne mwaakan aia onimaki natiu e katoka te ieka.