Te Rao nakon Te Rao
Te katauraoi nakon te Mition
“Katauraoa nanom nakon te Uea” (1Tamuera 7:3)
Inanon tabeua te ririki imwiin are a bwabetitoaki au utu, a katawanou mitinare ni mweengara ni katoa bong. I moanna n tatangiria mitinare, ao I tangiria ni kan riki n aroia.
Ngke ai 11 au ririki ni maiu raoi, e weteai au bitiobi bwa N na nakoina ni marooro mangaia n ana aobiti. E taku, “Ulisses, aio am tai ni waakina am katauraoi n nakon te mition.” I bon miimi ibukina bwa ai tiba 11 au ririki ni maiu! Ao e taku, “Ti riai ni waakina aron karaoana ngkai.”
E taku au bitobi, “N na marooro ma ngkoe te taina n noria bwa e uara rikirakem. Imwina e anganai tabeua kaetieti. E reireinai taekan tuua, te nakoanibonga, te itiaki, ao te etieti. I rang n rootaki ibukina bwa e tarai matau ao e taku, “Ko na mwakuri ni mitinare ngkana ko iri taian kaetieti aika I anganiko.”
I aki toki n uringa ana taeka, ai moara riki ngkana I kaitara te kataaki. N aron te katooto, n te taina e anganai tinau te mwane bwa N na nakon te titoa ni kabooi uanikai. N aki rangin tabe iai te tia oro mwane e anganai te mwane ae mwaiti riki nakon are I anganna ibukin boon te uanikai. I tabe n okira mweengau, ao ngke I kauka baiu, I nooria bwa I karekea te mwane ae e raka riki nakon are I moan waaki mangaia.
Tatan e kataia n ana nanou bwa I kona ni kawakina te mwane ibukiu. I iango, “E a reke te mwane irou ao I kona ni karaoa te bwai are I tangiria, ao imwiina I a manga kaoka te nikira ae e eti nakon tinau. I a manga iangoia, “Tiaki, e aki tuangai aio te bitiobi. Bwa ngkana N na mitinare N na riai ni kokoaua. “ I namakina te Tamnei n te tai anne ao n oki rikaaki nakon te titoa ni kaoka te mwane anne. I namakina te kukurei inanou. I iangoia bwa “I a tia ni koaua, I ongotaeka nakon tuua, ao I tabe ni katauraoai nakon au mition. N na riki bwa te mitinare, ao I tangiriia ni kokoaua n tainako.”
Ngke I a nakon te kauarinan n reirei, I mwakuri ni kaikoa au mwane ibukin au mition. A bon maiu ni kainnano au utu ao aki kona ni kabooi bwai ni kabane. E aki rangin tau au karekea mwane, ma imwiin kakabwakaan au kabwianibwai, I iangoia bwa N na kaboa teuana te kunnikai ni katoa namwakaina ibukin au mition. N te namwakaina teuana I kaboa au kunnikai, n te namwakaina are imwiina te neketai, ao te namwakaina are imwiina te kunnikai. Inanon ririki akana teniua, I a tia ni kawakina ae e tau ibukin kaboan bwaai ni kabane ake I kainnanoi. I kawakina ae e tau ni kabwaka ibukin au mition. I reiakina te reirei ibukin te kakawakin. I reiakina te reirei ibukin te ongotaeka nakon tuan te kabwianibwai ao ana iraua te kakabwaia ae ti na karekea man kakabwakaan ara kabuanibwai.
Au mition e rang n tamaroa ibukina bwa e buokai ni kaotai taian reirei ibukin te maiu ao ti na kanga ni maiuakina te euangkerio inanon au waaki ni katoa bong.
Mwaane ao aine, katauraoiko ibukin am mition ao maium ae e tamaroa. Te Uea e taningaira bwa e na anganiira taian kakabwaia ake ti kainnanoi.