WAAKI RAKE MA TE ONIMAKI
E Taraiko Te Aonaaba Ibukin Te Katooto
Bwaina te kokoaua nakon te Uea ao Ana Ekaretia. Bwaina te taataro n tii ngkoe ao wareware ni booki aika tabu. Kawakina am berita ae tabu ao kakauongo nakon ana wirikiriki te Tamnei. E na bon buokiko te Uea ni kaitarai kataakim ao kakaewenako nakoim.
Ngkai bon te tai ni waaki rake ma te onimaki. Bon te tai ni kuneaki ni kaawakinan ana tua te Atua. Bon te tai ni kamwakura am onimaki man te riki n tatataro mwaaka ao te ongeaba. Ngkana kam kamwakuri ami onimaki man iriirakin anua aika tamaroa ma te koaua raoi, kam na kunea bwa kam na kukurei ao a na reke riki ami tai n tibwaua te euangkerio ao ami koaua ma tabeman. Maiuakinan anua aika a tamaroa aikai e na bon anganiko te inaomata, ao tiaki kabaeakim.
Ngkai kam waaki rake ma te onimaki, kam na karekei taian kakabwaia aika e berita te Uea nakoimi ao e na nurakina Tamneina te Uea nako aomi. Ma Tamneina are e na kairi ngkami, kam na ata te bwai ae kam na karaoia n anga aika a bati, ao kam na kateimatoa ami berita ni bwabetito bwa kam na Ururingnga n taainako.
Taan kairiiri aika a nano ni kairake inanon rooro aika bati, a tuangaki bwa a na kamwakuri aia onimaki ao n ongeaba ma te koaua raoi. Nibwaai, Iotebwa Timiti, Ruta, ao a mwaiti riki a tia ni mwakuri ma te onimaki ngkai a bon tia n ongeaba nakon te Uea ma Ana burabeti.
Bon ngkoe te kairake ae iai karinean bungiakim, te roro ae rine, ao te roro ae iai mwiokoana ibukin taai aika a na roko. Am onimaki e na karekea te kaokoro nakon te aonaaba are e ukoukora te raoiroi ao te ota. E taraiko te aonaaba ibukin te katooto ao te kairiiri. Ma ngaia are, “kaota am ota i mataia aomata, bwa a na noori am mwakuri aika raraoi, ao a na neboa iai Tamami are i karawa” (Mataio 5:16).