Te Mwaane ma Taian Kaeka

Tera ae ko karaoia ngkana ko noori tamnei aika a tangako? Te bong teuana Christian Monzón mai Asuncion, Paraguay, e tangoa ana tareboon raoraona n te reirei bwa e na takakaro n takakaro ake inanona. E kunea bwa a kawakinaki tamnei aika a tangako n te tareboon.

Akea te nanokokoraki n ana kantaninga Christian bwa tera ae e na kakaraoia raoraona n te bwai aei, ngaia are Christian e buoka raona aei bwa e noora riaina bwa e na kanakoaki tamnei aika a kamatauninga aikai. E karaua ni kabwarabwara Christian bwa aekakira aron ana urubwai bwaai n aron aikai. E taku, “Ngke arona bwa te tama ngkoe, ao ko na bon aki tangira natim te mwaane bwa e na noora anne.”

Mwakoro n taeka ake e taekin Christian nakon raoraona a bon nako man te boki ae Ibukin Kakorakoraia Kairake. E taku Christian bwa te boki ae e uarereke aei e a tia ni buokia inanon maiuna. “I aki kona n riki n arou aei ngkana akea,” e taekinna. E a tia n anga naba katootona nakoia tabeman raoraona n te reirei. A tuangnga bwa e anganiia kairaia are a kainnanoia n aia kangaanga aika a kakaokoro.

Ko na kakaea ia buokam ngkana ko kaitarai kariiri ni maium? E ataia Christian bwa man te boki ae Ibukin Kakorakoraia Kairake e anga ibuobuoki nakon kariiri aika a kabuta imarenaia raoraona—n aron katooto, bwain ni kamanging aika a taburoroko, ao te moi manging. Tabeman ma ibuakoia raoraona iai aia intanete ni mweengaia, ma a rangi ni bebete rokoia iai—ao tamnei aika tangako —n taabo ni intanete.

Aki toki n okira Christian ao tarina are te ikawai, Jimmy raoraona n te reirei, ibukin buokaia n taian kangaanga ibukina bwa a ataia ataeinimwaane aika uoman aikai bwa ngaia Aomata Aika Itiaki ni Boong aika Kaitira ao e na iai kaekana irouia. A uaia ni karineaki ibukin aia onimaki irouia raoia n reirei. Raoraon Christian n reirei a karinea riki n ae riai ike a rineia bwa ngaia aia tia tei ataein te reirei. Ibuakon bwaai aika a mwaiti, e nanonaki bwa ngaia te tia tei ibukiia ngkana a reke n te kangaanga n te reirei.

Ko na kanga ni babaire ibukin tai aika ana roko? E taekinna Christian bwa ataan te mwakuri ni mitinare n ae e bwanin taina e bon buokia ni katei baika e na riai ni karaoi. Imwiin banen ana kauarinan n reirei, e tangiria ni manga reirei n aron kamanenaan te kaombiuta. Ma ngkana ko ataia bwa ko a katauraoiko ni karekea te Nakoanibonga ae te Merekitereka, te nakon te tembora, ao man nako ni mitinare ao ni mare, e na bon buokiko bwa kona kanga ni katauraoiko.

Ao iroun Christian, e karaoi naba kamatebwaian ana reirei te Ekaretia ma rongorongona. Ma koauana raoi, karaki aika mamaten nanona a bane n nako man rongorongon te Ekaretia. N aron te katooto, e kunea te korakora man ana bootaki ni kamaiu Tion n te 1834 ngke a roko taan iowaawa ni kakamakuia ao ni buakana aia tabo ni maeka ao te Burabeti Iotebwa Timiti e taetae ni burabetia bwa te Uea e na bon aki kona ni kariaia. N te tairiki anne, e roko te buaka ae e korakora n taoniia nako taan iowawa.¹ Aei are e tuanga Christian bwa e na kona ni katauraoia ibukin tai aika ana roko n akea te maaku bwa te Uea e na kamanoia naake a beku Ibukina.

Ko na kanga ni kakorakora am koaua? Teuana te kawai ae e kunea Christian bwa bon kamatebwaian maiun te Burabeti Iotebwa Timiti. E oki rikaaki nakon te Doctrine ao Covenant 135:3, are e taekinna bwa Iotebwa Timiti “e a tia ni karaoa ae e mwaiti riki, ma bon ti Iesu, are e kamaiuia aomata n te aonaaba aei, nakoia aomata ake a tia ni maeka iai”. E reitia Christian, “Kinaan Iotebwa Timiti e a tia ni bita maiu.”

E taekinna bwa ni kamatebwaian rongorongon te Ekaretia “e na kaotako bwa ko na kanga n ata tibwangam ae e kakawaki ni maium ni bong aikai” Teuana ma ibuakon karaki aika e tatangiri e taekiniia ataeinimwaane ake a buoka te mwakuri ni kamaiu nakon te kambwana n aenika ae e kairaki iroun Martin n te 1856. Kairake n ataeinimwaane aikai a uotiia taian bwaeoniia aika a rootaki n te kua, ma te baki rinanon te mwaitorotoro n te karanga ae te Sweetwater.² E taku Christian bwa e kantaningaia bwa e na kaota te aeka ni korakora aei ngkana e kaitara ma te kataaki.

Bukin tera e kakawaki te euangkerio inanon maium? Iai naba ana kaeka Christian nakon te titiraki anne. Ngkai te ibonga ngaia n te Nakoanibonga ae te Aaron, e kakaea te tieminari ni katoa moaningabong ma raona n roronrikirake man te Cocuere Branch, Capiatá Paraguay Titeiki. E mena te reirei n te tieminari ni mweengaia ao bon tinana te tia reirei.

Bwaai ake e reiakin ibukin ana babaire ni kamaiu te Atua e a tia ni buokia ngke e karina ni mate tibuna te unimwaane ae e tatangiria. E karekea te karaunano ao te kabebeteaki ibukin “te kantaninga ae e karekea man te euangkerio.”

E taku bwa te euangkerio e a tia ni buokia inanon maiuna. “I ataia bwa booki aika a tabu bon kaotioti mairoun Tamara are i Karawa,” e kamatoa n taekinna. “I ataia bwa te Ekaretia e koaua ao Iesu Kristo e maiu.”