Miiu ae Moan te Kamiimi
N te kabuanibwai ae riki n te kawai n ririki aika mwaiti n nako, ao I rootaki ni ikoakiu aika mwaiti, ao te kabanea ni kakaiaki are I a bon aki namakinaba inanon te maan ae teniua te namwakaina. Kakabwaia man te Nakoanibonga, n raonaki ma aia boutoka au utu, e karekea nakoiu te bwai teuana are e aranna au taokita bwa “te marurung ae kamiimi.”
Ma ikoakin atu e kamamaraa au iango ni kai mwaninga, ao I a bon aki kona ni uringi miiu. I aki toki n uti ao ni iango, “Oo, I mii,” ma n te tai naba anne, e a bua nako naba miiu man au iango.
Te bwi ma itiua te ririki imwin te kabuanibwai anne, ao I weteaki bwa N na bitiobi n au uoote. Imwin te bowi ni kauntira n te uoote, te beretitenti n te Moanrinan e uotarake weteakin te taanga teuana bwa a na anga reirei n te RTE kiraati. Au kauntira ao Ngai ti uaia ni i tara mata ma te miimi.
E iriira te taromauri te buu te aine, ma tiaki n taainako, ma buuna te mwane e tuai man iriiri inanon ririki aika bati. Ma e ngae n anne, ti bane ni kakoaua bwa a na anganaki aia tai ni iangoa te wewete anne.
N te tairiki are imwaain are N na taetae iai ma te taanga anne, iai miiu ae moan te mataata. I uringa raoi miiu anne ngke I uti n te bong are imwina. Bon ibukin taeka ni kabane ake N na taekin n tain te marooro n te aro bwa a na kona ni butimwaea te wewete nakon te beku. I miimi ngkai I uringa moan miiu inanon 17 te ririki, ma ae e moamoa riki nakon anne, kanoan miiu e rangi ni kakukurei ao e kaungaai.
N te tairiki anne ao e roko au kauntira n anaai n ana kaa. Ngke ti buti ni kaea te tai are e a tia ni baireaki, e taku, “Bitiobi, N na riai n anganiko bwa ko na karaoa te taetae.” I uringnga bwa I mata ngare ma te onimaki ibukina bwa I namakina ae te Uea E a tia ni katauraoa raoi au taetae.
Inanon tain te marooro ao I taekina raoi kanoan te mii, ao te taanga anne a butimwaea te wewete. Ao ngke ti a buti nakon mweengara n te tairiki anne, e taku au kauntira, “I namakina ae I a tibwa tia n reireinaki iroun te tia reirei ae mwaatai. I a manga mata ngare riki i bukina bwa I ataia ae e koaua—bwa ngaira ni uoman ti a tia n reireinaki iroun te Mataniwi.
Te buu mwane ao te buu aine a kakororaoa nanon raoi aia beku n te Moanrinan, ao a uaia ni kakaonimaki n te uoote. A kabaeaki n te tembora tabeua te ririki imwina.
Ni karokoa te bong aei, te mii anne bon ti ngaia ae I uringnga inanon 28 te ririki n nako. I namakinna raoi bwa Tamara are i Karawa e ataa te tai ae nakoraoi ibukiia te taanga aei. Ma ngaia are, E kaira nanon te beretitenti n te Moanrinan ao, ibukin teuana te tairiki, e kakabwaia au ururing ae e a tia ni bua bwa e na manga okira arona ni mwakuri raoi. Teuana riki te tai, I ataia bwa te Uea e tei bwa atuun te Ekaretia aio ao bwa “ana waaki te Uea aika akea tokiia a na bon waaki nako, ni karokoa ae a na bane ni kakoroaki bukin ana berita.” (Moomon 8:22).