INANON TE RONGORONGO

Inanon tein maanin te namwakaina, e a tia ni katanoatai baaire Beretitenti Thomas S. Monson ni katean teniua tembora aika a boou i Arizona, USA. Te kabanea ni katanoata ae e a tibwa tia n roko ni Meei 24, 2008, are e katanoata iai taian baaire te burabeti iaon katean te tembora i Phoenix.

N Eberi 28 e katanoatai baaire iaon katean tembora i Kiribati ao Gila Valley, Arizona.

“Kakabwaia man te tembora bon akea tokiia,” E taekinna Beretitenti Monson n te reta nakoia kaain te Ekaretia. “Naake a roko nakon te auti ae tabu aei a na namakina ana tangira te Atua ibukiia Natina ao n roko n aia atatai ae korakora riki ibukin oin rikiia n Atua ao riaia n riki bwa Natina mwaane ao aine.”

Tembora aika boou a na karekea mwaitin tembora aika nimaua i Arizona, ao ni karikirakea kainnanoan te tabo n te aro ae rangi ni korakora iaon waakinan karaoan te tembora ae ngkai n ana tabo te aba i Mesa ao Snowflake.

Ni kateakina n 1927, te Mesa Arizona Tembora e kawaraki irouia kaain te Ekaretia ae mwaiti riki nakon tembora i tinanikun Utah, are e buokiia kaain te Ekaretia man 74 taian titeiki, ni kaineti nakon ana Bootaki ni Mwakuri te Ekaretia n te Tembora.

Akea te tai ae baireaki are e a tia ni kaweneaki ibukin katean tembora aika teniua, are e uota te aonaaba nakon te ikota ni kakamwakuri ke bairean tembora nakon 140.

Ni wiikin katabuan te Tembora ae te Curitiba Brazil Temple, ngaa kaain te Ekaretia ake a ikoikotaki bwa a na ongora mairoun Beretitenti Thomas S. Monson n taabo aika kakaokoro i maiakin ao i nuukan Brazil.

N raonaki iroun Unimwaane Russell M. Nelson man te Kooram n Abotoro ake Tengaun ma Uoman ao Unimwaane Charles Didier man te Itingaun, e katabua te Curitiba tembora Beretitenti Monson inanon aua tetere n te Tabati, Tuun 1, 2008.

Te bong are ma imwaina, nga kaain te ekaretia ake a kaona te tabo n takakaro n te butibooro ibukin aia bukamaru ni mwaien abaia are e bon kaeaki iroun te burabeti.

E riki te Curitiba tembora bwa te kanimaua n tembora i Brazil, ike kaaina e a kaania teuana te mirion. E raka iaon 42,000 aomata ake a kawara te tembora n tain te neweaba. E baaireaki te kaonoua n tembora Brazil i Manaus.

N te Moanibong, Tuun 2, e kiba Beretitenti Monson nako Brasilia, Brazil, bwa e na kaitibo ma te kauoman ni beretitenti i Brazil, ae Jose Alancar. N airi ma Unimwaane Nelson ao Unimwaane Didier, Beretitenti Monson e anga te kaatibu ae uarereke nakon Mr. Alancar ae tei ibukin te utu ao te katooto ae mena n te kai n tamnei iaon “Te Utu: Te Katanoata nakon te Aonaaba” (Riaona, Okitobwa 2004, 49).

Rimwi, Unimwaane Nelson ao kaainabana, Wendy, a ira Beretitenti Monson ni kabwarabwara nakoia 8,000 kaain te aro ibukin te bootaki n utu ibukia kaain titeiki n irengarengan.

Inanon tabebong n te maeiei ae abakikaei are roota kawan Tiaina ae Sichuan ni Mei, e raka iaon 600 kaain te Ekaretia mai Hong Kong a mananga nakon te tabo ni karaobwai I Shenzhen, Tiana, ni booti 10,000 bwaai ni kamaiu ibukia maate.

E toa te bwai ni kamaiu ma bwerena aika manni, te miriki bauta, tin n iriko, te nuuto, te tobu, te buraati n irewi ao tobuna, taian kaoa, bwaini karau, te burangketi, ao te ran ni mooi.

Aia Bwai n Akoi Aika Itiaki ni Boong aika Kaitira, bain te Ekaretia n nanoanga, e baronga te mwakuri, are mwakoron riki te korakora ni kamaiu ae bobonga raoi ae iaon kawaina ibukin maate n te maeiei. E ikotaki iai bwaai ae kaania 5,000 umwa n rianna ao 4,000 baeki ni matu ma kieia.

N ikotaki nakon bwai ni kamaiu, te tieke man Aia Bwai n Akoi aika Itiaki ni Boong aika Kaitira a anganaki taian aobitia n te tautaeka ao te Red Cross I Shenzhen. Te mwane e roko man aia birimwane kaain te Ekaretia mai Hong Kong ao te aonaaba ae bwanin.

Bruce Lai, te tia bitiniti mai Hong Kong ao kaain te Ekaretia, e katauraoa ana tabo ni karaobwai i Shenzhen ibukin te bwai ae riki.

Te China Charity Federation e tibwatibwai taian kaako nakoia bootaki nako n te tabo are e mena te maeiei iai.

Beretitenti Dieter F. Uchtdorf, Kauoman Kauntira n te Moan Beretitentii, e kaitibo ma kaain te Ekaretia ao iruwa inanon te mwananga ni kawara Engiran, Tiaman, ao Buranti ni banen Mei ao ni moanakin Tuun 2008.

N kaineti nakon rongorongoia I-Tiaman ao I-Buranti, e tuangia kaain Paris ake a ira te bootaki I Versailles bwa “e ngae ngke a bati boobuaka i marenaiia aba aika uoua, ti a riki ngkai bwa rao ao koraki aika a raraoi. Ana euangkerio Iesu Kristo iai mwaakana ni kairikiira ni kabane bwa aomata aika raraoi ao n aki kakaokoroira bwa kaain ia ao aekakira kunnra.”

E reitia: “Ti a bane n ikotaki, ni kabane tarira ao mwaanera. Te euangkerio bon ngaia te kaeka nakon taian kakaewenako n te aonaaba, ni kabane nakon titiraki aika a kaitarai utu nako, bootaki nako, ao botanaomata.”

Beretitenti Uchtdorf e riki bwa kaain te Ekaretia I Tiaman ngke te teinimwane ngaia. E aranaki bwa te Kauntira n te Moan Beretitentii ni Beberuare n te ririki aei.