“Ngai ma raoraou iai ara kangaanga ma te winnanti. Tera ae I kona ni karaoia ni katokia ao ni buokia ni katokia?”

Te winnanti e riki imarenara ni katoa bong, ao bon te bwai ae e rangi ni kammaraki. E tara n nakoraoi arona ni kabuta nako “te rongorongo ae ai tibwa ngkai” nakoia raoraom, ma iangoa te aomata are ko tataekinna. Ko na kona n taekina te bwai ae kona taekinna ngkana iai teuae ke neiei ? E anganiko te kariaia bwa ko na tataekinna nakoia aomata? Iangoia bwa tera am namakin ngkana temanna e winantiko. “Mangaia are, bwaai ni kabane ake ko tangiria aomata bwa a na karaoia nakoimi, ao karaoia naba nakoia (3 Nibwaai 14:12). Ngkana a winnanti raoraom, kataia bita te bwai are e taekinaki.

Iai teniua mwaitia koraki ake a irekereke ma te winnanti: bon ngaira, te koraki ake a kakauongo, ao aomata ake ti tataekiniia. Karaoa te motinnano ni katoka te winnanti, ao ngkanne karaoia. Aikai tabeua bwain aoraki ni katoka te aoraki ae te winnanti. (1) Bita atun te marooro ngkana raoraom e waakina te winnanti. (2) Tai karongoa n te aro bwa a na akea te aomata ae a na taetae nakoina. (3) Tuangiia n aki makiniia “bwa a na aki taetae n ae buakaka ibukin temanna” (Iakobo 4:11)

Te winnanti e korakora ana urubwai ao e kona ni kamamaraa aia namakin aomata. Ngkana ti winnanti, ao ti kauka te mataroa nakon te riaboro ni kabuakaka taekan temanna. N tokanikai man te anua ni maiu ae e buakaka, taeka ni kabane aika a buakaka ibukin maiun temanna e riai ni katokaki. Ngkana ti ongo aekakin bwaai aikai, e ngae ngkana e eti ke bure, ti riai ni kataia ni katoki. E ngae ngkana e reitinako, ti riai ni mwaawa nako. (tara Mataio 12:36).

Ti kona ni buokiia raora n reireiniia bwa a na aki irekereke n taian kakarabakau ao n tuangiia, bwa ngkai ngaiia kain te Ekaretia ao taan irira Kristo aika a kakaonimaki, ti riai n tai nako n tei ibukin te koaua ao te kororaoi, ti riai n tai nako n riki bwa banna ni katooto ao ni kamoamoaia raora (tara Taekan te Onimaki 1:13).

Ni katoka te winnanti, ti kona ni kamatenanoa te koroboki ae e tabu n aron Nakoaia Ibonga 19:18 are e reireiniira bwa ti na tangiriia raora n ai aron tangirara i bon i roura ao ti riai ni kaokiokia n ara iango ni katoa te tai are ti na waakina iai te winnanti. Ti kona naba ni kamatenanoa te anene n aron “I Kataia n Riki bwa Iesu” (Aia Boki n Anene Ataei, 78–79) man aneneia n ara iango. Te iango naba teuana bon taekinan uoua bwaai aika a raoiroi ibukin te aomata. N te kawai anne ko kona ni mwaninga kabwakan teuaei ke neiei ao imwina kona uringa raoiroin te aomata anne.

E kona ni kangaanga katokan te winnanti. Ma I iangoia bwa ngkana ko kauringa tangiraia kain rarikim, ko riai ni iangoia riki imwain ae ko na taekin taeka aika ko na uringaaba iai. Ti aki ngaira taan motiki taekaia tabemwaang. Au iango bwa noran bwaai aika a raraoi irouia aomata e rangi ni ibuobuoki, nakon taraan riki te kabwaka.

A taku tabeman bwa “man wiira, ti katea te o imarenara ao naake ti tatangiria.” I kakoaua bwa ni katokan aei, ti kainnanoa te ninikoria ae e korakora ni kaetiira i bon iroura ao n te maiu n tamnei. Ngkana ti ota raoi n te euangkerio, ngaira aika kaain te Ekaretia ti riai n aki winnanti ibukina bwa te Atua e a tia n reireiniira bwa ti na kauki wiira n tataekina te euangkerio ni kabuta te aonaaba, ma tiaki ni kabuakaka ke ni winnantia tabemwaang.

Uringnga are te winnanti e kona n tiku mwiina, ni maan irouia tabemwaang. Kataia ao iangoia bwa tera aia namakin, ao iangoia bwa tera am namakin ngkana tabemwaang a taekini bwai aika aki riai ibukim. Bon te kantaninga ae e kororaoi bwa ko na bita te anua aei. E na kakabwaiako te Uea ma te korakora ao te bitaki n nano ngkai ko ukoukora Ana kairiiri rinanon te tataro.