A Na Nakoraoi Bwaai Ni Kabane

A onrake matau n rannimatau ngke I buti nakon te onaoraki ibukin tuoau riki. E a tia n reke irou te kaentia uoua te ririki n nako imwin bungiakin natiu te aine. I a tia n rinanon te korokoro ao ni bwai n aorakiaki, ao N nang nako n noora mwiin te bwai n aoraki anne bwa e uara. “Tamau are i Karawa, I a tia n reiakina ae bati man te bwai are e a tia n riki nakoiu aei. Taiaoka buokai man kataakiu aei. I tangiria ni kaikawa natiu te aine ao n teuana te bong N na karaoa au mwakuri ni mitinare ma buu te mwane. Taiaoka kamarurungai.”

A wawanako rannimatau. N te tai aei e karina ni bitaki au tataro nakon taekan te anene “A Child’s Prayer”¹ (A na Tataro te Ataei). Iai te bwai teuana ae e tuangai bwa N na kanenea bwanaau n taetae.

E roko irou namakinan korakoran te tangira. I namakinna ae Tamara are i Karawa e bon kinaai ao e tabeaianga nanona irou ao e kakauongo nakoiu. I namakinna bwa bwaai ni kabane a na bon NAKORAOI.

I karekea mwiin au tutuo n te bong are imwina. Te tutuo e kaota ae akea te kaentia. I namakina te rawawata ae korakora n nako mai irou. E ngae n anne, n te bong are imwina, e weteai au taokita ao e kabwarabwara bwa e ngae ngke mwiin tutuo ake a tia ni karaoaki e aki oti iai te aoraki ae te kaentia, ma e oti imwiin te tutuo bwa e korakora te aoraki ae te kaentia n raraau. “E kanga n reke anne?” I titiraki. Ngkana tao aio te bwai ae e na kona n riki, e aera ngkai I a tia n namakinna bwa Tamau are i Karawa e a tia ni kaeka au tataro?

I kataia ni katikui au iango n raraoma ngke I a manga oki riki ibukin tuoakiu. Mwiin taian tutuo aikai a aki ti kaota ae iai te kaentia irou ma a kaotia naba ae e a buta nako i rabwatau. I miimi ibukin te bwai are e riki nakoiu n te kaa. I aki kona ni kakewea te bwai are I a tia n namakinna, ma I a moanna n nanououa n otau iai.

I rootaki n te rongorongo ae boou ao e karika ae N na karaua ni iangoia raoi. I namakinna ae iai riki te bwai teuana ae N na reiakinna man te kataaki aei. Ngke I iangoia raoi, ao I ataia ae I a tia n rinanon karaoan bwaai ake a karaoi Aomata Aika Itiaki ni Boong aika Kaitira ake a kakaonimaki, ma n angiin te tai I aki toki ni karaoi bwaai ibukina bwa e a reke bwa kateiu ao e aki nako mai inanou. I tuai n roko n te anua n tamnei are N na bon riai ni mena iai. I kainnanoa te oki rikaaki ni moanna mai moana, ma ngaia are I a moanna ni katuua au iango i aon bwaai ake a na kaaniai nakon Iesu Kristo. I kainnanoa Korakorana are e na buokai ni kona n rinanon kataakiu.

Ngkana I kabotoa riki au kekeiaki nakon bwaai aika nako man te tamnei, au onimaki e na rikirake iroun Iesu Kristo ma Ana babaire ibukiu. I kakoaua bwa te bwai are e riki nakoiu inanon te tai are I kabuta te kaa nakon te onaoraki bon ngaia raoi kaekaan au tataro. Ngke I karaua raoi n taraia ao ni butimwaea te kaeka anne (are a na bon nakoraoi bwaai ni kabane), I ataia ae Tamara are i Karawa e aki kona n taai nako n taekini raoi bwaai ni kabane aika a na kaetaki. Tao N na bon aki kona ni marurung raoi, ma I a reiakinna bwa N na butimwaea Ana babaire. Maiu e mena raoi inanoni Baina.

E a tia n nako itiua te ririki imwiin te tai are e reke iai irou te aoraki ae te kaentia. A rang ni mwaiti au tai ni koreaki ao ni bwai n aorakiaki, ma I bon kaentia naba. E ngae n anne, te maiu e waaki nako, ao I kakaitau ibukin anne. Man kataakiu ao I karekei taian kakabwaia, ni ikotaki ma natiu te aine te kauoman. Ma ae e rang ni kakaawaki riki, e teimatoa ni karaua nanou te Uea ni kaekaai bwa “a na nakoraoi bwaai ni kabane.”