N Na Riai Ni Mena Iaa?

E a tia n reke am Tabati ae ai aron aei ae ko aki iai namakina ae ko kan kaea te taromauri? E koaua I a tia, ai moara riki n te tai ae tibwa tia n nako. I a tibwa mwaing nakon au uoote ae boou i Cape Town, South Africa. Bon tiaki ae kaain te uoote aika aki tamaroa ke aki iraorao. Ma bon tiaki ngaiia raoraou man mweengau.

Imwiin au moan wiiki n te uoote I a tia ni motikia n au iango—bwa man te tai aei N na ti kaea te bootaki n toa. N te wiiki are imwiina I rimwi. Ngke I a rinanon mataroan te umwantabu, I kamauraki irouia aomata tabeman ao I karekea nneu n tekateka. Ngke I a tekateka ikekei, I a namakina tangiran mweengau. Te bwai ae e a roko tangirana irou bon au uoote are imwaaina, noorakin mataia ake a kinai.

Ngkanne e a teirake te moan tia taetae ao e moana ana marooro. Bon titebo ma e taetae raoi nakoiu. E taetae ibukin namakinan te maroa n te kaawa ae boou, ao I a moanna n ataia bwa tiaki ti ngai ae e riki anne nakoiu. Imwiina te Kauoman tia taetae e tibwaua te rongorongo teuana ae kakaawaki nakoiu. Bon imwaain raoi ae e bwara te bootaki, e teirake te bitiobi ao e tuangiira bwa e tangirira n tatabemaniira nako. E taekinna bwa e ataia ae iai aomata aika a kani katang irouna bwa e na tararuaiia ma n tabeakiniia.

Ngke I a anenea te anene ni kainiin, I ataia ae aio te tabo ae I riai ni mena iai. I tuai man namakina te rau ae ai aron aei inanon te tai ae maan, ao I ataia bwa e roko mairoun Tamara are i Karawa. E ataiira n tatabemaniira nako ma kainnanora. E anganai te bwai ae I kainnanoia n te bong arei, ao I ataia bwa ngkana I teimatoa n maiuakin Ana tua, E na bon buokai n taainako.