Iai Au Onimaki ma Akea Au Mwane

N tokin 1988 I kukurei ma nakoau ae te kauoman ni kauntira n te bitiobiriki i Ciudad Ojeda, i Venezuela, ma iai tabetaben nanou ae moan te korakora. I a tia n riki bwa kaain te Ekaretia n riaon teuana te ririki, ma I tuai ni karekea au kakabwaia man te tembora.

N te bongina ao e roko ni kawarai raoraou temanna man te kawa ae uakaan ae Maracaibo. N te tai ae aki maan ao ti a moana ara marooro ibukin baika a reke man namakinan te tamnei.

E karina ni kairaki raoraou n te namakin ao e taku, “Te Tari Troconiz, I kakoaua bwa Tamara are i Karawa E tangiriko bwa ko na nako n te tembora ao ni karekei kakabwaia ake akea tokiia ake E a tia ni berita iai nakoia Natina.”

I kaeka, “I aki kona n nako.” “Akea ikai te tembora i Venezuela, ao te mwananga nako tinanikun te aba moan te bobuaka. Bon akea au mwane.”

E iangoa aei inanon tabeua te tai ao e taku, “Ngkana ko bon tangiria raoi ni kan nakon te tembora, ao Tamam are i Karawa E na bon katauraoa te kawai ibukin nakom.”

I kaeka, “Ngkana E na karaoa te aeka ni ibuobuoki anne Tamara are i Karawa, N na riai n nako!”

Man te tai anne ao e korakora au kantaninga ma au onimaki bwa N na bon kona n nako nakon te tembora. N te bong are imwina I kawaria taan kairiiri n te titeiki ao a tuangai bwa te mwananga ae e a tia ni baireaki bwa te nako nakon te Lima Peru Tembora, te tembora ae te kabanea ni kaan n te tai anne, n Tianuare. Boon te mwananga bon 16,500 te mwane n Venezuela ao te mwaiti ni mwane anne e rin ibuakona boon te tiketi ni kiba, amwarake, ao boon te tabo ni maeka.

A waaki nako boong, ao te tai are e na toki iai nikirakin te mwane e a kan roroko. I kataia ni karekea te mwane, ma e tuai n reke te mwaiti are I kainnanoia. E ngae n anne, au onimaki e aki kona ni bua. I bon rangi ni kakoaua raoi bwa Tamara are i Karawa E na bon katauraoa te kawai.

Ngke e a kaan roko te kabanea ni bong, I a karekea au tareboon mairoun au tia kamwakuri ngkoa. Te aomata are e tareboon e wetea arau ao e taku, “Ko a tia ni mwakuri n te kambwana ni karao bwaa nimaua te ririki n nako. Ngke ko kitana ikai, ao e aki eti karaoan te mwane ni kaboomwi nakoim. Taiaoka n nakomai n anaa am tieke n te aobiti ae mwakoro iai aram.”

I nako n anaa te tieke n te bong are imwina. Ngke I tara te mwaiti, I bon aki kona ni kakoaua te bwai are I nooria. Mwaitin kanoan te tieke anne bon 16,500 mwanen raoi Venezuela.

N Tianuare 17, 1989, I a rin n te Lima Peru Tembora ao I karekea au entaumente n te tembora. E bon eti are e taku raoraou. E a bon tia Tamara are i Karawa ni katauraoa te kawai ibukin nakou nakon te tembora. N aron ae E katanoata Nibwaai, “E kona ni karaoi bwaai ni kabane te Uea … ibukiia natia aomata, ngkana a kammwakura onimakinana irouia” (1 Nibwaai 7:12).