Ibukin Kakorakorakiia Kairake

Rinea te kororaoi ao te kakukurei, e ngae ngke tera te bwai ae e na riki nakoim. Katokaa i aom te mwiokoaki nakon am rinerine are ko karaoia. Karikirakea am konabwai ao am taarena, ao kamanenai n ae e tamaroa. Katoka te taningaroti ao tauraoi ni mwakuri korakora n tai nako.

Karekea te tamnei ni kakaitau ni bwaai ni kabane ake ko karaoi ao n taekin. Karabwa te Atua ibukin am kakabwaia, ao kaota am kamoamoa nakoia te koraki ake a buokiko.

Katauraoiko bwa ko na karekea te tamaroa n tainako n te aonaaba. Karekea te reirei, ao te nano ni ingainga ni kan reiakinii bwaai. Irira te tieminari.

Karaoa tibwangam ni katea te mweenga ae e kakukurei. Karineia am karo, kakorakora am reitaki ma tarim ao mwanem.

Rineia raoraom ake kam uaia n tibwauai kainibaire aika a ririeta. Karaoa te akoi nakoia ni kabane ao te karinerine. Kaoia raoraom ake kaain aro tabeua nakon ana waaki ni kakukurei te Ekaretia. Kaota te iraorao nakoia ake a tibwa rairaki ao te koraki ake aki bati ni kakaonimaki.

Kunnikainiko n ae e tararaoi ni kaota am karinerine nakon te Atua ao ngkoe. Tai kabwaka aron tein kunikaim nakon bootaki tabeua. Tai urua tein rabwatam n taitaia ao n ewaewaran bwain rabwatam.

Rinei kakukurei aika a na tabekikorake. Katoki bwaai aika a riaon ae e riai, te aki itiaki, kakiriwe, ke tamnei aika a tangako n anga nako. Anga nanom bwa kona kawakina ana kainibaire te Atua.

Ongora nakon anene are a na buokiko ni kaaniiko ma Tamara are i Karawa. Tai ongora nakon anene ake a kaunga te aki itiaki, e kaunga te un, ke ni kamanenai taetae aika a kamatauninga. Ngkana te mwaie, kararoa kaitibon te rabwata ke mwaie aika aki riai.

Kamanena te taetae ae e tabekikorake, e kaungako, ao e kamoamoaia tabeman. Kamanena aran te Atua ao Iesu Kristo n ae e tabu ao ni karinerine. Tai kamanenai taetae ni kamatauninga, taeka aika a bubuaka, ke taeka aika aki riai ke teim.

Tai kareke tangira ni karokoa ae a koro 16 am ririki ni maiu. Kareke tangira ma te koraki aika a rietaata anuaia. Ngkana ko waakina am kareke tangira, mwananga n te kurubu ke n ae uoman. Bairea am waaki ni kakukurei are e na buokiko bwa kona teimatoa ma Tamnein te Uea.

Kawakiniko ni karaoa te ikotaki n taanga ae e itiaki. Tai karaoa te ikotaki n taanga imwain te mare. Tai rekereke ma marooro ke waaki ni kakukurei ake a kawaerakei iango aika a bubuaka. Tai iri waaki ni wene bure ma raom ni mwaaine. Kakaea buokam ngkana ko a riki bwa te tia tauaki, te kabwaroua, ke bwainikirinaki riki tabeua n te wenenibure.

Rinanon ana Mwakuri ni Kamaiu te Tia Kamaiu, ao ko kona ni karekea te kabwara bure ao te kaitiakaki man am bure ngkana ko raira nanom. Kaoti am bure nakon te Uea ao te koraki ake ko kairua nakoia. Ngkana ti bure aika a nang kakamaaku, ko riai ni kaotia ni kabane nakon te bitiobi.

Bwaina te kokoaua iroum, nakoia tabemwaang, ao te Uea. Tai manga bita nanon ae aongkoa te aki kokoaua e bon eti.

Kamanena te Tabati n taromauria te Atua, kaei taromauri, kaaniiko riki nakoia am utu, ao buokiia tabemwaang. Tai kakaea te kakukurei ke ni kabanea am mwane n te Taabati. Ngkana e riai, katoka te mwakuri n te Tabati.

Kabwaka am kabwianibwai ae e kororaoi. Ira te marooro ni kaetan mwin te kabwianibwai. Ongeaba nakon tuan te aki mamatam.

Kawakina Tuan te Mauri. Kana te amwarake ae e kamarurung, kakaraoa te kamarurung n taai nako, ao, karekea te matu ae e tau. Tai kamanenai bwaai ni kamangingin aika a taburoroko, te arekoro, te kobee, te ii, ke bwaai ake a karaoaki man te baake. Tai bwainikirini babaire ibukin tuan bwainaoraki ke bwainaoraki ake ko angabaiaki.

Bon katabeam buokaia tabeman n am Ekaretia ao ni mweengam, te reirei, ao te botanaomata. Kakaea ana kairiiri te Tamnei ae Raoiroi ni katoa bong bwa kona ataia bwa antai ae ko na beku ibukina ao ko na kanga ni buokiia ni katoki kainnanoia.

Baina te kokoaua nakon te Uea ao Ana Ekaretia. Tataro n taai nako n ti ngkoe ao wareki booki aika a tabu. Kawakina am berita aika a tabu ao kakauongo nakon ana wirikiriki te Tamnei. E na buokiko te Uea bwa kona tokanikai iaon am kangaanga ao kataakim.