Rongorongo ni Kakawari n Reirei
Te Mwaine Bon te Kanikina ae Rangin ni Kainnanoaki Ibukin Kinakim ao Te Kantaninga n te Maiu are Akea Tokina
Reirei taekan booki aika tabu ao te rongorongo are e na buoka kainnanoia aine akana kam kawaria. Kaota am kakoaua i aon taian reirei. Kaoia akana ko reireiniia bwa a na tibwaua aia koaua n aron te bwai are a tia n namakinna ao n reiakinna.
Te Moan Beretitentii ao Aia Kooram Abotoro ake Tengaun ma Uoman: “Ni kabane aomata—mwaane ao aine—a karaoaki ni katotongan te Atua. Ngaia n tatabemaniia nako bon naati aine ao mwaane aika tamnei irouia aia karo i karawa, ao ibukin aei, ngaia ni kabane iai anuaia mairoun te Atua ao tokin kawaia. Te mwaine bon te bwai ae rangi ni kakawaki ibukin kinakiia n te maiu imwaain te maiu aei, te maiu ae mamate, ao te maiu are akea tokina” (“Te Utu: Te Katanoata nakon te Aonaaba,” Riaona, Okitobwa 2004, 49).
Bukin tera Bwa E Rangi Ni Kakawaki te Mwaine?
Unimwaane David A. Bednar man aia Kooram Abotoro ake Tengaun Ma Uoman: “[Mwaine] e kabwarabwara bwa antai ngaira, bukin tera ngkai ti nakomai nakon te aonaaba aei, ao tera ae ti na karaoia ao n riki nako iai. Bwa oin te kaantaninga ibukiia mairoun te Atua, tamnei aika mwaane ao aine a bon kaokoro, a kaokoro taraakiia, ao aitara raoi n aroia… . Katiteuanakiia aika onoti n te maiu n tamnei, n te rabwata, n aia iango, ao n aia kona bwai n namakin mwaane ao aine a kainnanoaki ibukin kamwakuran te baire ni kakukurei” (“Marriage Is Essential to His Eternal Plan,” Riaona, Tuun 2006, 51).
Julie B. Beck, te beretitenti n Aia Bootaki Aine ni kabuta: N aroia naati aine aika tamnei iroun te Atua, aine a karekea aia moan n reirei n te aonaaba n tamnei ao a katauraoaki ibukin rokoia (tara D&C 138:56) nakon te aonaaba. A bon mena ibuakoia aika kakannato ao aika rietata (tara D&C 138:55) ake a “takaka ni kakatonga” (Iobi 38:7) n tain karikan te aonaaba ibukina bwa ana anganaki rabwataia ma reken aia tai ni kataaki n te maiun n rabwata (tara Abraham 3:25). A tangiria ni uaia ni mwakuri ma mwaane aika raoiroi ni kakoroa nanon te kouru ae akea tokina are aki kona ni karekea i bon irouia. Nakoaia aine e aki moanaki n te aonaaba aei, ao e aki toki naba ikai. Te aine ae kakawakina nakoana n tina n te aonaaba e na bon kakawakina naba nakoana n tina n te aonaaba ae na roko” (“A ‘Mother Heart,’” Riaona, Meei 2004, 76).
Tera Au Mwakuri Ae I Kona ni Karaoia Ibukin Nakoau n Ana Kainibaire Tamara are i Karawa?
Margaret D. Nadauld, former Young Women general president: “Aine ibukin te Atua aki kona n titebo ma ainen te aonaaba. A tau mwaitia aine aika matoatoa n te aonaaba; ti kainnanoia aine aika a nananoanga. A tau mwaitia aine aika iowawa; ti kainnanoia aine aika akoi… . A tau mwaitia aine aika rangi ni kinaki ao a kaubwai; ti kainnanoia aine riki aika a onimaki” (“Te Kimwareirei n te Nakoa n Aine,” Riaona, Tianuare. 2001, 18)
Unimwaane M. Russell Ballard man aia Kooram Abotoro ake Tengaun ma Uoman: “Te maiu imwaain te maiu aei ao anuaia n rabwata mwaane ao aine are e baireaki iroun te Atua n ti ngaia… . [Tabetai aine ] a titiraki: ‘E ti mwioko kakawakin te aine i aon nakoana n aine nuumwa ao n tina?’ Te kaeka e rangi n teretere ao ni beebete: Tiaki… . Ni kabane mwaane ao aine aika raoiroi iai aia mwakuri ae kakaawaki ibukin kawaakan abanuean te Atua… .
“… Mwaneu aika kam tangiraki, ti onimaki iroumi. Ti onimaki iroumi ao n teimatoa n raoiroimi ao ni korakorami, … Ao ti kakoaua bwa ana baire te Atua boni ibukimi bwa kam aonga n riki bwa uea n aine ao ni karekea te kabanea n rietaata ni kakabwaia ae a kona ni karekea aine ni kabane n te tai aei ke n te maiu are akea tokina” (“Women of Righteousness,” Riaona, Ritembwa 2002, 36–37).