RAAO
Tao E Na Bon Ngai
Rineia raao ake a tibwauai anua aika tamaroa. Beku ibukia aomata ma ta akoi ao te karinerine. Kaoiia raoraom man aro ake tabeua nakon ana waaki ni kakukurei te Ekaretia. Roko irouia aika tibwa rairaki ao naake a aki bati ni kakaonimaki.
Ngke itiua au ririki, e roko temanna te Ataeinaine nakoia kaain rarikiu, ao ti riki bwa raao. Ti uaia n tangiri bwaai aika titebo, ao ti bon riki bwa taan kairiiri aika raoiroi nakoira ibon iroura. Ti karaoi rinerine aika raoiroi ibukina bwa a tia ara karo n reireiniira bwa ti na rinerine ma te wanawana.
Ma ngke ti a roko n te kaonoua ni koraki, ti karaoi ara rinerine aika a kaairua n te aro bwa ti na butimwaeaki irouia raoraora aika a uarereke maiuakinan te anua ae tamaroa irouia. N te ririki are i mwiina, I iangoia bwa I kainnanoa bitakiia raoraou bwa I aonga ni manga karaoi au rinerine riki aika a eti man maiuakinan te anua ae tamaroa. Tii te kangaanga bwa ngai ma raoraou ti bon teimatoa ni iraorao, ao I tangiria n aki katoka retakiu ma ngaiia.
Karaoan te bwai are I kainnanoia e bon kangaanga. I a tia n tuangaki inanon au tai ni maiu bwa N na rineiia raoraou aika raoiroi ao ni kaawakina anuan maiu ae tamaroa. Ma e tuai n reke au koaua bwa bukin tera e kakaawaki aei, ma I onimaki bwa e bon eti. N tokin te kabuebue ao inanon au kawaniua ni koraki, ti katoka airiirira ao a maenako kawaira.
I noori kakabwaia n te babaire aei imwiina riki inanon te ririki anne. A iangoia raoraou ngkoa bwa a na uota te manging nakon te reirei. A kairoroia ataeinaine tabeman bwa a na nimma, ao a bane n reke n te kangaanga. I a ataia ae temanna mai irouia ataeinaine aikai tao e na bon ngai. Ngke arona bwa I mena irarikiia, I aki ataia ngkana e na iai korakorau n tei ibukin au koaua.
Ngkana I iangoa mwiin te bwai are riki aikai N na bon tia ni kaitara ma ngaai, I namakinna bwa e bon rootaki nanou. N na kona ni kaiangatoa ma tatangirana, N na tia n reke n te kangaanga ma te tua, N na ti kabua aia onimaki au karo, ma ae moamoa riki, N na kona ni kabuakaka te onimakinaki are e anganai Tamara are i Karawa.
I ataia bwa te bwai ae e taekinna te burabeti iaon maiuakinan anua aika tamaroa bon ibukin kamanoara. E ngae ngke ti taraia bwa e aki rangi ni kakaawaki, ma e buokiira n te maiu n tamnei, n te maiu n rabwata, n ara iango, ao n aanga aika mwaiti aika ti aki kinai.