Faaoraraa i te feia ma‘i

Te ti‘aturi nei te feia mo‘a i te mau mahana hopea nei i te faaohipa i te ite e te mau rave‘a aivanaa maitai e vai nei. E faaohipa tatou i te maa, te faaetaetaraa tino, e te tahi ê atu mau rave‘a no te faaherehere i te ea e e imi tatou i te tautururaa a te feia rapaau ma‘i, mai te mau taote e te mau taote tapu, no te faaho‘i faahou mai i te oraraa maitai.

Aita te faaohiparaa i te ite o te taote e pato‘i nei i ta tatou mau pure faaroo e to tatou ti‘aturiraa i ni‘a i te mau haamaitairaa autahu‘araa. I to te hoê taata aniraa i te hoê haamaitairaa autahu‘araa, ua ani o Brigham Young e, « ua faaohipa anei oe i te tahi mau rave‘a rapaauraa ? » No te feia i parau aita, no te mea « ua hinaaro matou i te mau peresibutero ia tuu i to ratou rima i ni‘a iho ia matou, e e faaroo to matou e e faaorahia matou », ua pahono atu te peresideni Young e : « Aita te reira e tu‘ati ra i to‘u nei faaroo. Mai te mea ua ma‘ihia tatou, e e ani tatou i te Fatu ia faaora ia tatou, e ia rave i te mau mea atoa e ti‘a ia ravehia no tatou, mai te mea ra ia e, ia au i to‘u ite i te Evanelia no te ora, e nehenehe atoa ia ia‘u ia ani i te Fatu ia faatupu i ta‘u titona e ta‘u to papaa, ma te ore vau e faarapu i te repo e e tanu i te huero. E mea tano ia‘u ia faaohipa i te mau rave‘a atoa e itehia e au e i muri iho e ani atu ai i to‘u Metua i te Ao ra… ia haamo‘a mai i taua faaohiparaa ra no te faaoraraa i to‘u nei tino ».¹

Oia mau eita tatou e tia‘i e tae noa’tu ua pau te tahi ê atu mau rave‘a hou a pure ai tatou ma te faaroo aore râ a horo‘a’i tatou i te mau haamaitairaa autahu‘araa no te faaoraraa. I te mau taime rû, na mua ïa te mau pure e te mau haamaitairaa. E mea pinepine tatou i te rave i te mau mea atoa i te hoê â taime. Te pee nei ïa te reira i te mau haapiiraa a te mau papa‘iraa mo‘a e « pure noa tatou i te mau taime atoa » (PH&PF 90:24) e ia ravehia te mau mea atoa ma te paari e te nahonaho.²

Ua ite tatou e e nehenehe te pure faaroo, o te faahitihia e tatou ana‘e aore râ i roto i to tatou mau fare aore râ te mau vahi haamoriraa, e manuïa no te faaoraraa i te feia ma‘i. E rave rahi mau papa‘iraa mo‘a e faahiti nei i te puai o te faaroo i roto i te faaoraraa no te hoê taata. Ua haapii te aposetolo Iakobo e mea ti‘a ia tatou « ia pure ho‘i te tahi i te tahi, ia faaorahia outou » e ua parau faahou â oia e, « te pure faau‘ana a te taata parau-ti‘a ra » (Iakobo 5:16). A faaorahia ai te vahine tei tapea’tu Ia’na, ua parau a‘e ra Iesu ia’na e « ua ora oe i to oe faaroo » (Mataio 9:22).³ Hoê â te Buka a Moromona ua haapii e « te rave ra ho‘i te Fatu i te ohipa ma te mana e mai te au i te faaroo no te tamarii a te taata nei » (Moroni 10:7)

Ua faaite mai te hoê titorotororaa mana‘o huiraatira i te mau mahana i mairi a‘enei e fatata e 8 i ni‘a i te 10 taata Marite « e ti‘aturi nei e e tupu noa â te mau semeio i teie mahana mai te anotau tahito ra ». Hoê i ni‘a te toru te mau feia i uiuihia tei parau e e ua riro ratou « ei mau feia e aore râ e mau ite no te hoê faaoraraa hanahana ».⁴ E rave rahi feia mo‘a i te mau mahana hopea nei tei ite i te puai no te faaroo i roto i te faaoraraa i te feia ma‘i. Ua faaroo atoa tatou i te mau hi‘oraa no roto mai te mau taata faaroo i roto i te tahi ê atu mau ekalesia. Ua faati‘a mai te hoê taata papa‘i ve‘a no Texas i taua huru semeio ra. A fifi ai te hoê tamahine e pae matahiti i te huti i te aho e a roohia’i oia i te fiva, ua faahoro to’na na metua ia’na i te fare ma‘i. I te taime a tae ai oia i te fare ma‘i, ua faaea to’na na mape e to’na mau mahaha i te tere, e ua rae‘ahia to’na fiva i te faito 41.7 Ceseri, e ua uteute anaana to’na tino e ua î haere i te mau pepe vareau. Ua parau te mau taote e te pohe ra oia i te ma‘i ta‘ero rû, aita ho‘i i itehia te tumu no te reira ma‘i. Ua faaarahia te utuafare e te mau hoa, ua haamata te mau taata faaroo i te Atua i te pure no’na, e ua faaterehia te tahi pureraa taa ê i roto i ta ratou amuiraa porotetani i Waco, Texas. Na roto i te semeio, ua ora oioi mai oia mai te pohe mai e ua faaru‘e atu oia i te fare ma‘i i te tahi hebedoma hau i muri iho. Ua papa‘i to’na papa ruau, « ua riro oia ei tapa‘o faaite e e pahano mau te Atua i te mau pure e e faatupu oia i te mau semeio ».⁵

Oia mau, mai ta te Buka a Moromona e haapii nei, « e faaite mai te Atua ia’na iho na roto i te mana o te Varua Maitai ia ratou atoa tei faaroo ia’na ; oia ïa, i to te mau fenua atoa, e to te mau opû atoa, e to te mau reo atoa, e to te mau nunaa atoa, i te raveraa i te mau semeio rarahi… i rotopu i te tamarii a te taata nei, mai tei au i to ratou faaroo » (2 Nephi 26:13).

No teie feia e faaroo mai nei – te mau taata paari tei mau i te Autahu‘araa a Melehizedeka e te feia apî tamaroa o te faatata i te farii i teie nei mana – e paraparau taa ê atu vau no ni‘a i te mau haamaitairaa no te faaoraraa e faaohipahia nei e te mana no te autahu‘araa. Te mau nei tatou i teie mana autahu‘araa, e e mea ti‘a ia tatou paatoa ia vai ineine no te faaohipa maitairaa i te reira. Te faaite mai nei te rahiraa ati natura e te mau fifi i te pae moni e e hinaaro rahi atu â tatou i teie nei mana i te mau mahana i mua nei hau atu i te mau mahana i mairi a‘e nei.

E rave rahi mau papa‘iraa mo‘a e haapii nei e te mau tavini a te Fatu e « tuu i to ratou rima i ni‘a iho e ora ho‘i te ma‘i ia ratou » (Mareko 16:18).⁶ E tupu te mau semeio ia faaohipa-ana‘e-hia te mana no te autahu‘araa no te haamaitai i te feia ma‘i. Ua ora na vau i teie nei mau semeio. Ei tamaiti iti e ei taata paari ua ite au i te mau faaoraraa semeio mau mai tei papa‘ihia i roto i te mau papa‘iraa mo‘a, mai ia outou atoa e rave rahi.

Te vai nei e pae tuhaa no te faaohiparaa i te mana autahu‘araa no te haamaitai i te feia ma‘i : (1) te faatahinuraa, (2) te haamauraa i te faatahinuraa, (3) te faaroo, (4) te mau parau no te haamaitairaa, e (5) te hinaaro o te Fatu.

Te faahiti pinepine nei te Faufaa Tahito i te parau no te faatahinuraa e te hinu ei tuhaa no te hoê haamaitairaa o te horo‘ahia na roto i te mana o te autahu‘araa.⁷ Ua parauhia te faatahinuraa no te haamo‘araa ⁸ e e nehenehe paha te reira e hi‘ohia mai te tapa‘o no te mau haamaitairaa tei niniihia mai te Ra‘i mai ei hotu no teie ohipa mo‘a.

I roto i te Faufaa Apî te tai‘o nei tatou « e ua faaora’tura te mau aposetolo a Iesu i tei ma‘i e rave rahi, ma te faatavai ia ratou i te mono‘i » (Mareko 6:13). Te haapii mai nei te buka a Iakobo i te tuhaa ohipa a te faatahinuraa e te tahi atu mau ohipa i roto i te hoê haamaitairaa faaoraraa na roto i te mana autahu‘araa :

« Te pohe ra anei te hoê o outou i te ma‘i ? E tii oia i te mau peresibutero o te ekalesia ra, e na ratou e pure ia’na, ma te faatahinu ia’na i te mono‘i i te i‘oa o te Fatu ra :

« E e ora taua ma‘i ra i te pure faaroo, e na te Fatu oia e faati‘a i ni‘a » (Iakobo 5:14-15).

Ia faatahinu-ana‘e-hia te hoê taata e te mana no te Autahu‘araa a Melehizedeka, e haamauhia te faatahinuraa e taua iho mana ra. Te haamauraa i te tahi mea o te haapapûraa ïa i te reira, te haamanaraa te reira no te opuaraa mana‘ohia. Ia faatahinu ana‘e te mau peresibutero i te hoê taata ma‘i e ia haamau ana‘e ratou i te faatahinuraa te iriti râ ia ratou i te maramarama no te ra‘i i te Fatu ia ninii mai Oia i te haamaitairaa Ta’na i mana‘o no te taata ma‘i.

Ua haapii te peresideni Brigham Young e : « Ia tuu ana‘e au i to‘u rima i ni‘a i te taata ma‘i, te ti‘aturi nei au i te mana faaora e te maitai o te Atua ia haere na roto atu ia‘u e tae atu i ni‘a i te taata ma‘i e ia haere ê atu te ma‘i… Ia ineine ana‘e tatou, ia riro ana‘e tatou ei mau au‘a mo‘a i mua i te Fatu, e nehenehe te mana no ô mai i te Atua Mana Hope e tere na roto atu i te tino o te taata e haamaitai ra e haere atu i roto i te tino o te taata ma‘i, e e faaorahia te ma‘i ».⁹

Noa’tu e ua ite tatou e rave rahi mau taata tei faaorahia na roto i te mana o te autahu‘araa, e mea varavara tatou i te faahiti i teie nei mau faaoraraa i roto i te mau amuiraa taata no te mea te faaara mai nei te heheuraa apî e « eiaha [tatou] ia faaahaaha ia [tatou] iho i teie mau mea nei, eiaha atoa e parau atu i taua mau mea ra i mua i to te ao nei ; no te mea ua horo‘ahia mai teie mau mea nei ei maitai no outou e no te ora ho‘i » (PH&PF 84:73)

E mea faufaa rahi roa te faaroo no te faaoraraa na roto i te mana no te ra‘i. Te haapii atoa nei te Buka a Moromona e « aore ho‘i te faaroo i roto i te tamarii a te taata nei, aore atoa e ti‘a i te Atua te raveraa i te semeio i rotopu ia ratou » (Etera 12:12 ).¹⁰ I roto i te hoê a‘oraa faahiahia no ni‘a i te faatahinuraa i te feia ma‘i, ua parau te peresideni Spencer W. Kimballe : « E mea pinepine te titauraa i te faaroo i te haafaufaa-ore-hia. E au ra te ti‘aturi nei te taata ma‘i e te utuafare i ni‘a noa i te mana no te autahu‘araa e te horo‘a no te faaoraraa ta ratou e ti‘aturi e tei mauhia paha e te mau taea‘e haamaitai, tei te taata iho ho‘i e haamaitaihia ra te hopoi‘a rahi a‘e… Te ohipa faufaa rahi roa o te faaroo ïa o te taata ia ite ana‘e oia i te haapa‘oraa. ‘Ua ora oe i to oe faaroo’ [Mataio 9:22] o tei faahiti-pinepine-hia e te Fatu e ua fatata te reira i te riro ei pehe tamau ».¹¹

Ua parau atoa ho‘i te peresideni Kimball e « ia rahi-pinepine-ana‘e te mau faatahinuraa e riro ïa te reira ei tapa‘o no te faaroo ore aore râ te tamata ra te taata ma‘i ia huri te hopoi‘a no te tupuraa o te faaroo i ni‘a i te mau peresibutero eiaha râ i ni‘a iho ia’na. Ua parau oia te parau no te hoê tuahine faaroo tei farii i te hoê haamaitairaa autahu‘araa. I to’na ani-raa-hia i te mahana i muri iho mai te mea ua hinaaro oia i te faatahinu-faahou-hia, ua pahono oia : « Aita, ua faatahinuhia e ua haamaitaihia vau. Ua faaterehia te oro‘a. Tei ia‘u i teie nei te titauraa i ta‘u haamaitairaa na roto i to‘u faaroo ».¹²

Te tahi atu tuhaa no te haamaitairaa autahu‘araa o te mau parau ïa no te haamaitairaa o te faahitihia e te peresibutero i muri a‘e i to’na haamauraa i te faatahinuraa. E nehenehe teie mau parau e riro ei mea faufaa rahi e aita râ te reira e titauhia ia tapa‘ohia i roto i te mau buka a te Ekalesia. I roto i te tahi mau haamaitairaa autahu‘araa – mai te hoê haamaitairaa patereareha – o te mau parau ïa o te faahitihia te tuhaa faufaa no te haamaitairaa. Area râ i roto i te hoê haamaitairaa faaoraraa o te tahi atu ïa mau tuhaa no te haamaitairaa – te faatahinuraa, te haamauraa, te faaroo, e te hinaaro o te Fatu – o tera ia te mau tuhaa faufaa roa.

Te tanoraa mau, e tu‘ati maitai ïa te peresibutero e faatere ra i te oro‘a i te Varua o te Fatu ia ite oia e ia faaite oia i te hinaaro o te Fatu na roto i te mau parau no te haamaitairaa. Ua haapii o Brigham Young i te mau taea‘e tei mau i te autahu‘araa e, « e haamaitairaa e e hopoi‘a na outou ia ora maitai ia ite outou ia parau-ana‘e-hia te parau a te Fatu ia outou e ia heheu-ana‘e-hia te hinaaro o te Fatu ia outou ».¹³ Ia tupu ana‘e te reira, e tupu-mau-ihoa ïa na roto i te semeio te haamaitairaa tei faahitihia. I te tahi mau taime taa ê ua ite au i taua papûraa ra no te faaururaa i roto i te hoê haamaitairaa faaoraraa e ua ite au e, te mau mea o ta‘u i parau, o te hinaaro ïa o te Fatu. Area râ, mai te rahiraa taata atoa o te rave ra i te mau haamaitairaa no te faaoraraa, e mea pinepine au i te aro i te papû ore no te mau parau e ti‘a ia‘u ia parau. E ite te mau peresibutero tata‘itahi i te toparaa e te maraaraa i to’na huru faito i te fariiraa i te mau faaiteraa a te Varua. Te mau peresibutero tata‘itahi o te horo‘a nei i te hoê haamaitairaa, tei raro a‘e ïa ratou i te mana no te mea ta’na e hinaaro ra no te taata ma‘i. E nehenehe ta teie mau paruparu e te tahi atu â mau paruparu e faahuru ê i te mau parau ta tatou e faahiti.

Aua‘e râ, e ere te mau parau faahitihia i roto i te hoê haamaitairaa no te faaoraraa i te mea faufaa rahi mau no te faaoraraa. Mai te mea ua nava‘i te faaroo e mai te mea o tera ihoa te hinaaro o te Fatu, e faaorahia te taata ma‘i e aore râ e haamaitaihia ïa te taata ma‘i mai te mea e faahiti te taata haamaitai i teie mau parau aore râ aita. Mai te mea râ e haapa‘o te taata haamaitai i to’na iho hinaaro aore râ no te paari ore e e horo‘a oia i te faaueraa aore râ te mau parau haamaitairaa taa ê atu i ta te Fatu i ma‘iti i te horo‘a mai te au i te faaroo o te taata, eita ïa taua mau parau ra e faatupuhia. No reira, e te mau taea‘e, eiaha roa te hoê peresibutero e feaa ia horo‘a atu i te hoê haamaitairaa no te faaora no to’na mata‘u e ore oia e ite i te mea e parau. E nehenehe ta te mau parau e faahitihia i roto i te hoê haamaitairaa no te faaoraraa e faaiteitei e e faaitoito i te faaroo o te feia e faaroo ra ia ratou, te manuïaraa râ o te haamaitairaa ia au ïa i te faaroo e te hinaaro o te Fatu, eiaha râ ia au i te mau parau tei faahitihia e te peresibutero o te haamaitai ra.

E te feia apî tane e te feia paari a‘e, a haapa‘o maitai mai i te mea ta‘u e parau i teie nei. A faaohipa ai tatou i te mana feaa ore o te autahu‘araa a te Atua e a faaherehere ai tatou i Ta’na fafauraa e e faaroo e e pahono Oia i te pure faaroo, e ti‘a ia tatou ia haamana‘o noa e eita te faaroo e te mana faaora no te autahu‘araa e horo‘a mai i te hoê hopearaa au ore i te hinaaro o te Taata o oia ho‘i teie autahu‘araa. Ua haapiihia teie haapiiraa i roto i te heheuraa e faaue ra i te mau peresibutero no te Ekalesia ia tuu i to ratou rima i ni‘a i te feia ma‘i. Teie te fafauraa a te Fatu « e tupu a ho‘i teie ite taata e faaroo to’na ia‘u nei ia faaorahia oia, e aore oia i faataahia no te pohe ra, e faaorahia ïa oia » (PH&PF 42:48 ; faahauhia te papa‘i opa) Mai te reira atoa i roto i te tahi ê atu heheuraa apî ua parau te Fatu e « ia ani ra te hoê mai te au i te hinaaro o te Atua… e ravehia ïa mai te au i ta’na i ani maira » (PH&PF 46:13).¹⁴

No teie mau mea atoa, te haapii nei tatou e tae noa’tu te mau tavini a te Fatu, ma te faaohiparaa i To’na mana hanahana i roto i te hoê ohipa e ua nava‘i ho‘i te faaroo no te faaora, eita te horo‘araa i te hoê haamaitairaa autahu‘araa o te faaora i te hoê taata ma‘i, mai te mea e ere teie faaoraraa i te hinaaro o te Fatu.

Ei mau tamarii na te Atua, o tei ite i To’na aroha rahi e To’na ite rahi i te mea maitai a‘e no to tatou oraraa maitai mure ore, e ti‘a ia tatou ia ti‘aturi Ia’na. Te ture matamua no te evanelia o te faaroo ïa i te Fatu ra ia Iesu Mesia, e te faaroo o te ti‘aturiraa ïa. Ua itehia ia‘u taua ti‘aturiraa ra i roto i te hoê a‘oraa ta to‘u fetii i horo‘a i te oro‘a hunaraa a te hoê tamahine apî tei pohe i te hoê ma‘i rahi. Ua parau oia i teie nei mau parau tei faahitimahuta ia‘u e tei faaitoito ia‘u : « Ua ite au e te hinaaro o te Fatu ia pohe oia. Ua atuatu-maitai-hia oia e te mau taote. Ua farii oia i te mau haamaitairaa autahu‘araa. Ua tuuhia to’na i‘oa i ni‘a i te tabula i‘oa no te pure i roto i te hiero. Ua hanere te pure i faaotihia ia maitai ho‘i oia. E ua ite au e ua nava‘i te faaroo i roto i teie nei utuafare e e faaorahia oia maoti râ o te hinaaro ïa o te Fatu ia faaho‘i atu ia’na i te fare i teie taime ». Ua ite atoa vau i taua huru ti‘aturiraa ra i roto i te mau parau a te metua tane no te tahi atu tamahine taa ê tei pohe i te ma‘i ‘cancer’ i to’na apîraa ra. Ua parau oia e, « tei roto te faaroo o to matou utuafare ia Iesu Mesia, e ere tei ni‘a i te manuïaraa o te mau mea ». I to‘u hi‘oraa e parau mau roa taua mau haapiiraa. E rave tatou i te mau mea atoa ta tatou e nehenehe e rave no te faaoraraa i te hoê taata tei herehia e tatou, e i muri iho e ti‘aturi tatou i te Fatu no te hopearaa.

Te faaite nei au i to‘u iteraa papû no ni‘a i te mana o te autahu‘araa a te Atua, no te mana no te pure faaroo e no te parau mau no teie nei mau parau tumu. Te faaite papû nei au no ni‘a i te Fatu o Iesu Mesia, e tavini tatou Ia’na, e horo‘a to’na Ti‘a-faahou-raa i te iteraa papû no te oraraa tahuti-ore, na roto i Ta’na Taraehara te vaira te rave‘a no te ora mure-ore, oia ho‘i te horo‘a rahi a‘e a te Atua, i te i‘oa o Iesu Mesia, amene.