Elder Kevin R. Duncan

Mai to’na tamariiraa ua vai te hinaaro puai i roto ia Elder Kevin Read Duncan ia tavini i te Fatu ei misionare. « Aita roa’tu vau i feaa noa a‘e te mana‘o. Ua ite au i te mau taime atoa e, ua hinaaro vau e tavini i te hoê misioni », ta’na ïa parau.

Na mua roa i te 19raa o to’na mahana fanauraa, ua farerei o Elder Duncan i te hoê Hui Mana Faatere Rahi e tavini ra i roto i te Aupŭpŭ Misionare o tei ani mai ia’na ia tamau aau i te mau haapiiraa misionare. Ua haapa‘o oia i taua titauraa ra, e ua piihia oia i muri a‘e ra i roto i te Misioni no Chile Santiago South. Ua riro to’na riroraa ei misionare ei haapapû-faahou-raa i to’na here i te taviniraa i te Fatu. « Ua ite au e, ua hinaaro vau ia riro ei misionare e hope noa’tu to‘u oraraa », te parau ïa a Elder Duncan.

Ua fanauhia o Elder Duncan i te ava‘e atopa 1960, e tamaiti na David Henry e o LaRene Eliza Cook. Ua paari oia i roto i te hoê utuafare faaapu i West Point, Utaha. Na roto i to’na oraraa i roto i te fare faaapu, na te reira i haapii ia’na eiaha i te rave noa i te ohipa, i te here atoa râ i te ohipa, ta’na ïa parau.

Na taua huru mana‘o ohipa i tauturu ia’na ia haru mai i te parau tuite Licence no te ohipa matutu numera i te fare haapiiraa teite no Brigham Young University, te hoê parau tuite master no te matuturaa tute, e parau tuite taote no te ture. Ua haamata oia i to’na toro‘a ei paruru no te tute, e i muri a‘e, ua haamau oia i te hoê taatiraa no te mau rave‘a aravihi i roto i te mau haavaraa.

Ua faaipoipohia o Elder Duncan e ta’na vahine, o Nancy Elizabeth Smart, i te 27 no tiunu 1986, i roto i te Hiero no Roto Miti. E pae a raua tamarii, ma te tai‘o atoa i te tamarii a Elder Duncan no ta’na vahine matamua, tei pohe i teie nei, o Wendy Wallentine.

Fatata e 20 matahiti i muri a‘e i to’na taviniraa i te hoê misioni i Chili, ua rave faahou o Elder Duncan i te hoê misioni rave ohipa i roto i te ti‘araa faa‘o no te Ekalesia i Amerika Apatoa. A ora ai oia i reira ua piihia oia ia faatere i te Misioni no Chile Santiago North, ma te noho i roto ihoa i te fare misioni i reira oia i te taviniraa ei misionare taure‘are‘a.

Na mua a‘e oia a piihia ai i roto i te Pŭpŭ matamua o te Hitu Ahuru, ua tavini o Elder Duncan ei tauturu no te episekopo, ei taata haapa‘o no te misioni paroita, ei melo apooraa teitei, e ei Hitu Ahuru Area i roto i te Area no Utaha Apatoa.