Faariroraa i te amuiraa ei tuhaa no to tatou oraraa

E nehenehe te mau taata atoa e ohipa i roto i te aamu utuafare ! Ua parau mai o Elder Russell M. Nelson e, e nehenehe te mau tamarii e papa’i i te hoê tumu raau fetii (api 91). E nehenehe te mau metua e tauturu ia ratou i te tuuraa i te mau i’oa o to ratou mau tupuna.

A tai’o e aore ra, a faati’a faahou i te aamu a Elder Quentin L. Cook no ni’a i te mau tamarii Hamoa i te horo-ê-raa i te miti faaî (tsunami, api 83). A ani i te mau melo o te utuafare ia feruri e te tomo mai nei te pape i roto i te fare e a faaitoito ia ratou ia imi i te hoê “vahi teitei a’e,” mai te hoê ro’i e aore ra, te hoê parahiraa. A paraparau no ni’a i te mau vahi i reira e itehia ai ia tatou te vahi pae varua teitei a’e i roto i te pape pu’e o te ino ta tatou e farerei nei i teie anotau.

Ua faatia o Elder D. Todd Christofferson i te parau no William Tyndale, tei iriti i te Bibilia i roto i te reo Peretane (api 32). A ani i te mau tamarii paari ia tai’o hoê irava o te papa’iraa mo’a i roto i te hoê reo aita ratou e paraparau. Ia parau ana’e ratou e, aita ta ratou e nehenehe e tai’o, a ani ia ratou ia tai’o i roto i to outou reo ai’a. A paraparau i te faufaa ia farii i te mau papa’iraa mo’a i roto i to outou reo ai’a.

A tai’o faahou outou e to outou utuafare i te hoê a’oraa o te amuiraa rahi no ni’a ia Iesu Mesia. A himene “A Parau mai i te Aamu o Iesu” (Buka himene na te mau tamarii, 57). A opere i te api parau e te penitara. A ani i ta outou mau tamarii ia papa’i i te hoê aamu au-roa-hia no ni’a ia Iesu. A tai’o amui i te reira aamu i roto i te mau papa’iraa mo’a

A tai’o faahou i te a’oraa a te Peresideni Dieter F. Uchtdorf no ni’a i te faaoroma‘i (api 56). Eaha te tahi mau parau tumu o te evanelia e te tahi mau raveraa o te haapii mai ia tatou i te faaoroma’i ? Ei hi’oraa, a feruri na e e haapae e aore ra, e haamata i te arapae e tae roa’tu i te 16 matahiti. Eaha te maitai i roaa ia outou e to outou utuafare na roto i to outou faaiteraa i te faaoroma’i na roto i te peeraa i teie mau parau tumu e i te tahi atu ?

Elder M. Russell Ballard, Elder Bradley D. Foster, Tuahine Julie B. Beck, e te Tuahine Elaine S. Dalton, ua haapii ratou paatoa i te parau no te huru Atua o te mau vahine (api 18, 10, 98, 120). Mai te mea e vahine outou, eaha te mea ta ta ratou a’oraa i faatupu i ni’a ia outou ? Eaha to outou mana’o no ni’a ia outou iho ? Eaha ta outou i haapii mai no ni’a i ta outou opuaraa e te mau horo’a ? Mai te mea e, e tane outou, eaha te mana’o ta teie mau parau poro’i i faatupu i roto ia outou no ni’a i to outou metua vahine, to outou mau tuahine, to outou mau hoa e te tahi atu mau vahine e te feia apî tamahine i roto i to outou oraraa ?

Ua haapii o Elder Jeffrey R. Holland e: “Mai te mea e , e mea repo te hoho’a i roto i te afata teata, a tupohe. Mai te mea e, e mea faufau te hoho’a, a haere i rapae. Mai te mea e te haamata ra te peu i te haere i te au ore, a tapu i te reira. E rave rahi o teie mau mea … o te haape‘ape‘a i to tatou mana’o, o te haaparuparu i to tatou pae varua, e a arata’i ai ia tatou i te hoê mea ino” (api 44). Ei utuafare, a aparau i te mea te ti’a ia outou ia rave no te faariro i to outou fare ei vahi i reira te Varua e parahi ai. A hi’o i te hoho’a peni, te upa, te mau buka, te mau ha’uti video, e te tahi atu mau faaoaoaraa ta outou e a faaore i te mau mea tano ore.

Outou e to outou utuafare, a tai’o faahou i te aamu ta te Peresideni Thomas S. Monson i faaite mai no ni’a i te hoê taure‘are‘a tei parauhia o Jason e to’na utuafare (api 87). A aparau e nahea te iteraa i te faanahoraa o te faaoraraa e nehenehe ai e haamaitai ia tatou.

Ua faaite mai o Elder L. Tom Perry e mea nahea to’na metua vahine i te haapiiraa i ta’na mau tamarii ma te faaohipa i te tahi o te mau materia ta’na i faaohipa no te haapii i te Sotaiete Tauturu (api 29). Eaha te tahi mau rave’a e nehenehe ai oe e faaau i ta oe ohipa i roto i te Ekalesia e ta oe mau hopoi’a no to oe utuafare ?

Ua haapapû faahou o Elder Robert D. Hales i te faufaa i te paraparauraa e i te faarooraa i te tamarii e te feia apî (api 95). Eaha te mau rave’a ta outou e nehenehe e rave no te paraparau i ta outou mau tamarii ? Eaha ta outou i apo mai a faaroo ai outou ia ratou ? E nahea outou ia faaite i to outou hinaaro ia faaroo ? Eaha te taime e ti’a ai ia outou ia faaite i te iteraa papû i te mau tamarii e te feia apî ? Ei hi’oraa, a hi’o i te a’oraa a Elder David A. Bednar (api 40).

E rave rahi mau taata paraparau tei parau mai no ni’a i te faufaa o te Ohipa i te Atua e te Faahaereraa Ia’u iho i Mua (a hi’o i te mau api 22, 54, 60, 95, e te 117). Eaha te ti’a ia outou ia rave no te tauturu i te feia apî i roto i to outou oraraa ia fana’o i teie mau fanahoraa ?