Ua paraparau mai ratou i te feia apî

Ua horo’ahia mai te autahu’araa ia tatou nei ia rave tatou na roto i te i’oa o te Atua. Ua riro tatou ei faarii no te hoê horo’araa. E rave rahi te ohipa i titauhia ia tatou. … A feruri ana’e tatou i to tatou mau piiraa, a feruri i ni’a i ta tatou mau hopoi’a, e a pee ana’e ia Iesu Mesia, to tatou Fatu.

Peresideni Thomas S. Monson, « E horo‘a mai te ineine i te mau haamaitairaa »,64.

Tau hepetoma i ma’iri a’e nei, ua ite au i te hoê diakono apî tei haamata i taua e’a o te itoito ra. Ua faaite mai to’na metua tane ia’u i te hoê hoho’a ta ta’na tamaiti i papa’i e o te faaite ra i te mau ana’iraa parahiraa i roto i ta ratou fare pure, hoê numera no te diakono tata’itahi e ma’itihia no te opere i te oro’a mo’a, e to ratou e’a i roto i te fare pure no te opere i te oro’a mo’a i te mau melo. Ua ataata rii maua o te metua ia feruri e, ma te titau-ore-hia, ua hamani roa te hoê tamaiti i te hoê hoho’a no te haapapu maitai e, e rave maitai oia i ta’na ohipa autahu’araa.

Ua ite au i roto i to’na itoito te hoho’a no roto mai i te buka apî no te Hopoi‘a i te Atua.Te haapiiraa ïa i te mea ta te Fatu e hinaaro ia rave oe, te hamaniraa i te hoê faanahoraa no te rave i te reira, e ia rave i te reira faanahoraa ma te itoito, e ia faaite ia vetahi ê, e mea nahea to outou iteraa rau i te tauiraa ia outou e i te haamaitairaa ia vetahi ê.

Peresideni Henry B. Eyring, Tauturu Matamua i roto i te Peresideniraa Matamua, « A rave i te ohipa ma te itoito atoa », 60.

E mea ti’a i te mau melo paari o te Ekalesia ia ite e, te mau titauraa o te Faahaereraa Ia’u Iho i Mua e te Hopoi‘a i te Atua, e ere ïa i te hoê noa tapura ohipa o te tapa’o. E mau opuaraa te reira i haamauhia e te tamahine e te tamaroa tata’itahi no te tauturu ia ratou ia ti’amâ no te farii i te mau oro’a no te hiero, no te tavini i te misioni, no te tomo i roto i te faaipoiporaa mure ore, e no te farii i te faateiteiraa. Tera râ, e mea ti’a ia maramarama maitai e: mai te mea e, e tamata te mau tamaroa e te mau tamahine o ratou ana’e i te faaoti i te reira mau opuaraa, e pau e e ati rahi ïa te tupu mai !

E te mau metua tane, e te mau metua vahine, e te feia faatere no te feia apî, te faaitoito atu nei matou ia outou ia amui atu i ta outou mau tamarii e i te feia apî i roto i te Faahaereraa Ia’u iho i Mua e te Hopoi‘a i te Atua. E ere o ratou ana’e te tupu i te rahi, o outou atoa râ. E te mea faufaa roa’tu, e tupu amui outou i roto i te natiraa o te faaroo e te auhoaraa o te tauturu ia outou ia haapuai i te tahi e te tahi, e ia vai noa i ni’a i te e’a o te evanelia e a muri noa’tu.

Elder Robert D. Hales no te Pŭpŭ Tino Ahuru Ma Piti Aposetolo, « Ta tatou hopoi‘a i te Atua : Te misioni a te mau metua e te feia faatere no te u‘i apî », 95.

No outou te tahua ha’utiraa, e au mau tamaroa here no te Autahu’araa a Aarona. Ua ineine anei outou e ua hinaaro anei outou e ha’uti i ta outou tuhaa ? Te hinaaro te Fatu i te mau tamaroa maitai atoa ia faaineine e ia horo’a ia’na iho, i teie iho pô, ia ti’amâ no te farii i te hoê piiraa na te peropheta o te Atua ia tavini i te hoê misioni.

Elder Ronald A. Rasband no te Hitu Ahuru, « Te piiraa hanahana o te hoê misionare », 51

Ei diakono, ei haapii e ei tahu’a, e rave outou i te mau ohipa o te tauturu ia outou ia patu i te puai pae varua e ia haapii e ia faaoti i ta outou mau ohipa autahu’araa. Teie te tereraa o te mau ohipa tata’itahi:

Na mua roa, e haapii outou i te hoê parau tumu o te evanelia e aore râ, te hoê hopoi‘a o te autahu‘araa. E ite outou e, eaha ta te Metua i te Ao ra e hinaaro ia rave outou, e e tautoo outou no te farii i te iteraa pae varua no ni‘a i te tumu i riro ai ei mea faufaa.

I muri iho, e hamani outou i te mau faanahoraa no te haa i ni‘a i te mau mea ta oe i apo mai. Te faaitoitohia’tu nei outou ia haamau i ta outou mau faanahoraa i ni‘a i to outou mau hinaaro, to outou huru oraraa, e ta outou mau rave‘a no te tavini ia vetahi ê. Teie te hoê taime nehenehe roa ia amo i te hopoi‘a no to outou iho tupuraa i te rahi, e te faahoturaa i te ti‘aturiraa ia outou iho i te pae varua.

I muri iho e faaite outou i te mau mea ta outou i apo mai e i rave i piha‘i iho ia vetahi ê. Mai te mea e, e rave outou i te reira, e haapuai te reira i to outou iteraa papû e e patu ho‘i outou i te faaroo i roto i te mau taata ati a‘e ia outou. E faarahi outou i to outou aravihi ia paraparau i te evanelia ia vetahi ê. …

… Te faaite papû nei au e, na te ohipa faaroo ta outou e rave nei i roto i te Autahu’araa a Aarona e taui i te oraraa o te mau taata ta outou e tavini nei. Te vai ra te taata e titau nei i ta outou ohipa autahu’araa. Te hinaaro nei to outou utuafare ia outou. Te hinaaro nei ta outou pupu ia outou. Te hinaaro nei te Ekalesia ia outou. Te hinaaro nei te ao ia outou.

David L. Beck, peresideni rahi no te Feia Apî Tamahine, « Te Autahu‘araa a Aarona faahiahia », 54.

Te vai ra te haamaramaramaraa no ni’a i te faanahoraa o te Hopoi‘a i te Atua i roto i te mau reo e rave rahi i ni’a i te itenati DutyToGod.lds.org.

I ni’a i te api matamua o ta outou buka no te Faahaereraa Ia’u Iho i Mua na te Feia Apî Tamahine e ite outou i teie mau parau: « E tamahine here oe na te Metua i te Ao ra, faaineinehia no te haere mai i te fenua nei i teie taime taa’e no te hoê tumu mo’a e te hanahana. »

E te mau tuahine, e parau mau te reira mau parau ! Aita te reira i faahitihia i roto i te hoê aamu moemoea ! E ere anei i te mea faahiahia ia ite e, ua ite to tatou Metua mure ore i te Ao ra ia outou, te faaroo nei ia outou, te tia’i nei ia outou e te here nei ia outou i te hoê here faito ore ? E homa, no te rahi o To’na here ia outou i horo’a mai ai Oia i teie oraraa tahuti nei ia outou ei tao’a horo’a faufaa rahi « i te hoê tau ra », faati‘ahia i to outou iho aamu no te oraraa, no te tamataraa e no te mau rave’a e roaa ai te rahi, te hanahana, te itoito e te here. E te mea hanahana roa’tu, ua horo’a mai Oia ia outou i te hoê horo’a faito ore e aita e nehenehe e parau. Ua horo’a mai te Metua i te Ao ra ia outou i te horo’a rahi a’e i te mau horo’a atoa – te ora mure ore – e te rave’a e te haamaitairaa mure ore o to outou iho « ma te oaoa e a muri noa’tu ; »

Peresideni Dieter F. Uchtdorf, Tauturu Piri i roto i te Peresideniraa Matamua, « To outou oaoa e amuri noa’tu », 124.

E te feia apî no te Te Ekalesia a Iesu Mesia i te Feia Mo’a i te mau Mahana Hopea nei, a haamana’o e, o vai outou ! Ua ma’itihia outou. E tamahine outou na te Atua. Aita e ti’a ia outou i rito noa ei hoê u’i apî tamahine o tei riro mai te mau taata atoa te huru. Ia itoito outou no te ti’a i ni’a, ia « ti’a… i ni’a e ia anaana mai… ia riro to outou maramarama ei hi’oraa no te mau nunaa » (PH&PF 115:5). E imi te ao nei i te rave’a ia ti’aturi outou e, e ere outou i te mea faufaa—e peu tahito ta outou e tei rapae roa outou. E tuo u’ana mai to te ao ia outou ma te maniania ia « faaru’e », ia « tamata i te mau mea atoa », ia « tamata e ia oaoa. » Area te Varua Maitai ra, e muhumuhu mai oia e e ani mai te Fatu ia outou ia « haere … na te e’a o te parau ti’a », ia « haapae… i te mau mea no teie nei ao », e ia « ati atu i te mau fafau ta [outou] i fafau ra » (PH&PF 25:2, 10, 13).

Elaine S. Dalton, peresideni rahi no te Feia Apî Tamahine, « A haamana‘o o vai ra outou ! » 120.

E horo’a mai te Faahaereraa Ia’u Iho I Mua i te hoê rave’a nehenehe roa no te faaamu i to outou iteraa papû te tahi taahiraa i muri i te tahi taahiraa. Ua riro te mau iteraa rau e te mau opuaraa ohipa ei mau taahiraa na’ina’i o te faaamu i to outou iteraa papû no ni’a ia Iesu Mesia a haapii ai i Ta’na mau haapiiraa e a faaohipa tamau ai outou i te reira i roto i to outou oraraa. Na te reira faaamuraa tamau e tapea papû ia outou i ni’a i te e’a.

Mary N. Cook, tauturu matamua i roto i te peresideniraa rahi o te Feia Apî Tamahine, « Eiaha, eiaha, eiaha e faaru‘e ! » 117.

Tei reira te Fatu i te mau taime atoa no tatou eita Oia e vaiiho overe noa ia tatou. Ua haapiihia ia tatou e, ua ite e ua here te Metua i te Ao ra i Ta’na mau tamarii tata’itahi. Ei hoê tamahine faufaa rahi Na’na, e roaa ia outou Ta’na haapapûraa e Ta’na arata’iraa na roto i te mana o te pure.

Ann M. Dibb, tauturu piti i roto i te peresideniraa rahi o te Feia Apî Tamahine, « Ia riro ei mea itoito roa », 114.

No te tahi atu haamaramaramaraa no ni’a i te Faahaereraa Ia’u Iho i Mua, a haere i ni’a i te itenati PersonalProgress.lds.org.