Te Haere nei te mau Melo no Haiti i Mua, ma te Pautuutu i roto i te Evanelia
I te taime a aueue ai te fenua i Haiti i te ava‘e tenuare 2010, ua horo o Jean-Elie René i te fare no te hi‘o e te maitai noa ra anei to’na utuafare. I to’na taeraa’tu, te ite ra oia i te hoê o ta’na na tamaroa e toru te ta‘i noa ra i ni‘a i te purumu, e te faaroo ra oia i te tuo a te tahi atu tamaiti i raro a‘e i te fare parari.
Ua imi teie metua tane e 32 matahiti no hea mai te tuo e ua heru i raro a‘e i te fare parari e itehia mai nei e a’na te tamaiti paari e te tino o ta’na vahine hapu, te paruru noa ra â i ta raua aiu e iva ava‘e eiaha ia topahia i te tapo‘i fare.
E papa‘i parau te taea‘e René no te paroita Leogane no te tĭtĭ no Port-au-Prince Haiti. Noa’tu e, ua pohe ta’na vahine, ta’na tamarii fanau-ore-hia, e ua ere hoi i to’na fare, aita oia i mutamuta eaore ra, i riri i to’na huru i taua taime. Te tahi tau mahana e muri mai i te aueueraa fenua, ua itehia te taea‘e René i te fare pureraa, e te aiu i ni‘a i to’na turi e ta’na na tamaroa i piha‘i iho ia’na, te tauturu ana‘e ra i te episekopo i te faanahoraa i te tauturu i te mau melo o te paroita e i te tahi atu mau taata haere mai e noho i te fare pureraa no te tahi maa taime.
E mea aroha roa te aamu o te taea‘e René, e ere râ o’na ana‘e mai te reira te huru. Ua roohia te mau melo o te Ekalesia i Haiti i te hoê aueueraa fenua rahi ino roa i te faito 7.0, tera râ, ua riro taua ati rahi ra ei faaiteraa i te puai o te mau melo no Haiti te haere maira i te rahi. Mai te taea‘e René, e rave rahi melo – te mau melo tahito e te mau melo apî – ua ti‘a ratou i mua i te mau titauraa e ua itehia ia ratou te hau e te tamahanahana i roto i te faaroo e te haapa‘o.
Tamatahia i roto i te Ati
I roto i te roaraa o to ratou mau ati, ua vai puai no ate mau melo o te Ekalesia i roto i te evanelia a tamau noa ai i te utuutu e i te faaitoito te tahi e te tahi e i te mau taata o te oire.
« Oia mau, aita hoê ohipa toe faahou ta matou, te mau mea atoa, te mau tauhaa e to matou mau utuafare, ua mo‘e pauroa. To matou râ faaroo ia Iesu Mesia aita ïa i mou », te parau ïa a Ives Pierre-Louis, episekopo no te paroita Leogane. Ua riro teie ati ei faitoraa ia matou ei mau pipi na te Mesia ».
Ua riro to matou mau feia faatere o te aUtahau‘araa ei hi‘oraa maitai rahi roa no te faaroo e no te iteraa papû na roto i to ratou faarururaa i te mau fifi, ma te haapii i te faaoti i to ratou piiraa i roto i te mau taime fifi e te tautururaa ia vetahi ê i roto i te fifi, te parau ïa a Elder Francisco J. Vinas no te Hitu Ahuru, Peresideni no te Area no Caraïbes.
« Ua faaohipa ratou i ta ratou mau taviri aUtahau‘araa no te haamaitai i te oraraa o te mau melo e te mau melo ore », te na reira ra oia. « Ua rave ratou i te ohipa ma te amuitahi e ua farii ratou i te arata‘iraa no ô mai te Varua ra no te faaitiaifaro i te mau fifi teimaha i te mau mahana atoa ».
Ua riro te mau fifi ta te aueueraa fenua i faatupu ei hopoi‘a teimaha rahi, na te mau episekopo iho â râ i Haiti, te na reira Prosner Colin, peresideni no te tĭtĭ no Port-au-Prince Haiti. Ua amo te mau episekopo e te feia faatere o te Ekalesia i te hopoi‘a no te utuuturaa e no te tautururaa i te mau melo o te paroita e rave rahi hanere, e tae noa’tu i to ratou mau utuafare.
« Te tamau noa nei [te mau episekopo] i te tauturu », te parau ïa a te Peresideni Colin. « Ua ite ratou e, ua ere ratou i te mau mea e rave rahi, tera râ, tei ia ratou ra te evanelia. Ua faaitoito ratou i te [mau melo] ia tamau noa i te ora ma te parau ti‘a ».
Ua riro mai te Episokopo Pierre-Louis ei ti‘a faatere no te oire i muri a‘e i te aueueraa fenua. I roto i te mau hepetoma e te mau amaa i muri mai i te ninaraahia o Haiti, ua horo‘a oia i to’na oraraa no te tavini i te mau melo e te mau melo ore i Leogane – i roto i te hinaaro o te mau taata e rave rahi hanere.
« Ua riro oia ei tavini faahiahia e te haehaa aitâ outou i ite a‘e nei », te na reira ra o Chad Peterson, e taote no Arizona tei parahi i pihai iho i te Episekopo Pierre-Louis ei taata tauturu aufau ore i muri a‘e i te aueueraa fenua.
Te Faaroo no Teie nei e no Amuri a‘e
E rave rahi aamu tei faati‘ahia no te mau melo no Haiti, na roto i to ratou hinaaro puai e te faaroo i te Fatu, ua paturu te reira ia ratou i roto i to ratou mau tamataraa.
« Noa’tu te ati rahi tei farereihia e te Feia Mo‘a faaroo no Haiti, ua î ratou i te ti‘aturiraa i te tau no amuri a‘e », te parau ïa a Elder Wilford W. Anderson no te Hitu Ahuru i roto i ta’na a‘oraa no te amuiraa rahi i te ava‘e eperera 2010. « Mai te mau pionie i mutaa iho ra i te matahiti 1846, ua oto roa to ratou aau, area to ratou varua ra, ua puai ïa. Te haapii atoa mai nei ratou ia tatou e, e ere te ti‘aturiraa, te oaoa e te popou i te ohipa tupu noa mai ma te mana‘o-ore-hia, e hotu râ no te faaroo i roto i te Fatu ».
Ua itehia te hoê faaiteraa o te reira huru haapa‘o e te faaroo, i muri noa a‘e i te aueueraa fenua, a tere noa ai te mau pureraa ma te mau ore.
Noa’tu te ati rahi i tupu i ni‘a i to ratou fenua, ua tae mai te mau melo no Haiti i te pureraa ma te faanehenehe ia ratou i te nehenehe o te Sabati maitai roa a‘e, ma te ataata i ni‘a i te mata. Ua riro te evanelia ei turu‘iraa na te mau taata e rave rahi no te huti mai ia ratou i rapae i to ratou pe‘ape‘a e te mana‘o paruparu.
« Noa’tu e, ua ere ratou i to ratou fare, ta ratou ohipa e te tahi mau melo o te utuafare, ua vai noa te taata ei mau taata maitai, te ti‘aturi e te hi‘oraa anaanatae. E faaroo maere to ratou », te parau ïa a te taea‘e Peterson.
Te tamau noa nei te Ekalesia i te hotu i Haiti. Ua maraa te rahiraa taata e haere nei i te pureraa oro‘a, te na reira ra te Peresideni Colin, e te tamau noa nei te mau taata i Haiti i te rave i te ohipa no te patu faahou i to ratou mau oire.
« E mea maitai roa te mau melo i roto i te taviniraa ia vetahi ê », ta’na ïa parau. « Te haere nei ratou e farerei ia ratou ; te imi nei ratou i te ohipa na ratou e na vetahi ê ».
O Berthony Theodor, e taata ai‘a teie no Haiti e e raatira no te ohipa totauturu a te Ekalesia i Haiti, teie e parau nei e, na roto i teie ati rahi ua roaa ia’na e i te tahi atu mau ti‘a faatere o te Ekalesia i Haiti te tahi mau iteraa faufaa roa.
« Ua ti‘a ia matou ia tavini ia vetahi ê, ma te faaite faahou ia ratou e, ua here roa matou ia ratou », ta’na ïa parau. « Ua haapii faahou mai matou e, aita matou i vai otahi noa i roto i te ao nei, e melo matou no te nunaa o te Fatu ».
Ua parau te taea‘e Theodor e, eita teie aueueraa fenua – e aore râ, te tahi atu huru ati – e iriti ê i te hau eaore ra, te oaoa o te mau melo no Haiti.
« Te faaite papû nei au e, e ore roa te Fatu e haamo‘e i Ta’na mau tamarii », ta’na ïa parau. « Ua ite Oia e, tei hea vau, ua ite oia i to‘u huru. E ore roa Oia e vaiiho otahi noa ia‘u ».