Elder Larry R. Lawrence

Na roto i te mau piiraa rau e te taviniraa i roto i te Ekalesia, ua haapii o Elder Larry Ray Lawrence ia « ti‘aturi i roto i te Fatu ma [to’na] aau atoa » (Maseli 3:5).

Ua fanauhia oia i te ava‘e atete 1947 na Argil e o Mary Lawrence i Cheverly, Maryland, ua paari o Elder Lawrence i Tucson, Arizona. Ua faahope oia i ta’na haapiiraa i roto i te Fare haapiiraa tuatoru no Arizona, i reira hoi to’na fariiraa i te parau tuite Licence i roto i te ohipa faaapu bio e i te hoê parau tuite no te toro‘a taote, e te taote mata.

Ua tomo mai oia i roto i te Ekalesia i te matahiti 1970, i te 23raa o to’na matahiti, e ua faaipoipo ia Laurel Stott i roto i te Hiero no Mesa Arizona i te 5 no novema 1971.

Hou a piihia ai oia i roto i te Pŭpŭ piti no te Hitu Ahuru, ua mau oia i te mau ti‘araa mai te peresideni o te pŭpŭ peresibutero, episekopo, melo apooraa teitei, peresideni tĭtĭ, e peresideni misioni no te tĭtĭ.

Te parau ra o Elder Lawrence e, te haamata ra hoi to’na oraraa i te haere maru rii, e ta raua na tamarii e ono tei paari e tei haapa‘o ia ratou iho, ua piihia a‘era raua o ta’na vahine ia faatere i te misioni no Novosibirsk Russia i Siberie i te matahiti 2001. Ua titauhia ia Elder e i te tuahine Lawrence ia faaohipa i te faaroo a faaru‘e ai raua i to raua fare e te utuafare i muri no te haere e tavini i roto i te hoê fenua aita roa’tu raua i matau i te reo, te taata e te huru o te reva.

« Ua riro mau te reira ei tamataraa rahi no maua i te tuuraa i to maua ti‘aturiraa i roto i te Fatu », te parau ïa a te tuahine Lawrence. « Te mau mea atoa ta maua i haape‘ape‘a, ua afaro pauroa ïa, e ua taui teie iteraa i to maua oraraa ».

Te vai ra te hoê tapa‘o i roto i te piha tutu o te fare misioni o te faahaamana‘o tamau noa mai ia « A hi‘o mai ia‘u nei i to mau mana‘o atoa na ; eiaha e feaa, eiaha e mata‘u » (PH&PF 6:36).

Te faariro nei o Elder e te tuahine Lawrence i to raua iteraa i roto i te misioni ei iteraa rahi a‘e i roto i to raua oraraa e ua feruri raua e, ua faaineine te reira ia raua no ta raua mau hopoi‘a apî na roto i te piiraa o Elder Lawrence i roto i te Hitu Ahuru.

« Aita maua i ite eaha te ohipa i muri nei, ua ite râ maua e, e riro ïa ei ohipa maitai », te parau ïa a Elder Lawrence.