“Aruma ari paMvura dzaMormoni,” Nyaya dzemuBhuku raMormoni (2023)
Aruma ari paMvura dzaMormoni
Kuva vanhu vaMwari
Aruma aimbova mupirisita wamambo ainzi Noa. Aruma akaedza kuponesa Abinadai, muporofita waMwari, kubva mukuuraiwa naNoa. Asi Noa akashatirirwa Aruma uye aida kuurayawo Alma. Aruma akatiza kubva kuna Noa kuti azvidzivirire. Munguva dzemasikati, Aruma aivanda pedyo nenzvimbo yainzi Mvura dzaMormoni.
Aruma akatenda izvo Abinadai zvaakadzidzisa pamusoro paJesu Kristu. Akakumbira Mwari kuti vamuregerere zvivi nezvikanganiso zvake.
Aruma akasangana nevanhu muchivande uye akavadzidzisa pamusoro paJesu. Akadzidzisa munhu wose uyo aida kuteerera.
Vanhu vazhinji vakatenda zvaitaurwa naAruma. Vakaenda kumvura dzaMormoni kunonzwa Aruma achidzidzisa
Vatendi vaida kudaidzwa kunzi vanhu vaMwari, kubatsira vanoshaya, uye kuudza vanhu pamusoro paMwari. Saka Aruma akavakoka kuti vabhabhatidzwe. Kuburikidza nokubhabhatidzwa, vaizoita chibvumirano, kana vimbiso, naMwari kuVashandira uye nokuchengetedza mirairo Yavo. Mukudzorera, Mwari vaizovaropafadza neMweya Wavo.
Vanhu vakafara zvikuru. Vakaombera maoko avo uye vakati vaida kubhabhatidzwa. Aruma akabhabhatidza mumwe nemumwe wavo muMvura dzaMormoni. Vose vakazadzwa neMweya waMwari uye vakanzwa rudo rwaMwari kwavari. Vakava nhengo dzeChechi yaKristu.
Noa akaona kuti vamwe vevanhu vake vakanga vavakubva munyika yake. Akatuma varanda vake kuti vavatarise. Varanda vakaona vanhu vachienda kunyika yaMormoni kunonzwa dzidziso dzaAruma. Noa akashatirwa zvikuru. Akatuma mauto ake kunouraya Aruma navanhu avo Aruma vaaidzidzisa.
Mwari vakayambira Aruma pamusoro pamauto. Nerubatsiro rwaMwari, Aruma navanhu vake vakabuda munyika vakachengetedzeka. Mauto haana kukwanisa kuvabata. Vakafamba kwemazuva masere murenje uye vakasvika kunyika yakanaka zvikuru. Vakavaka dzimba itsva ikoko. Aruma akadzidzisa vanhu, uye vakachengeta vimbiso yavo kuna Mwari.